Maharashtra : મુંબઈ પોલીસે દરોડામાં પકડ્યું 2435 કરોડનું ડ્રગ્સ, 7 આરોપીઓની ધરપકડ
મહારાષ્ટ્રમા (Maharashtra ) પકડાયેલા ડ્રગ્સ કેસમાં તપાસ આગળ વધી હતી. પોલીસને આરોપી પ્રેમશંકર સિંહ દ્વારા માહિતી મળી હતી કે તે ગુજરાતમાં અંકલેશ્વરથી મોટા પાયે ડ્રગ્સ બનાવે છે.
મુંબઈ (Mumbai ) પોલીસના એન્ટી નાર્કોટિક્સ સેલે બે દરોડામાં લગભગ 2435 કરોડ રૂપિયાનું ડ્રગ્સ (Drugs ) જપ્ત કર્યું છે. સાથે જ 7 આરોપીઓની ધરપકડ કરવામાં આવી છે. જેમાંથી પાંચ જ્યુડિશિયલ કસ્ટડીમાં છે. જ્યારે બે આરોપી પોલીસ કસ્ટડીમાં છે. સમગ્ર મામલો આ વર્ષે 29 માર્ચનો છે જ્યારે પોલીસે બાતમીના આધારે મુંબઈના ગોવંડી વિસ્તારમાં દરોડો પાડ્યો હતો અને સમીઉલ્લા ખાન નામના ડ્રગ પેડલરને પકડી પાડ્યો હતો, જેની પાસેથી અઢીસો ગ્રામ ડ્રગ્સ મળી આવ્યું હતું. જેની કિંમત 36 લાખ 50 હજાર રૂપિયા હતી.
સમીઉલ્લા પાસેથી મળેલી માહિતીના આધારે પોલીસે આરોપી નંબર બે અયુબ શેખની ધરપકડ કરી હતી. જેમની પાસેથી અઢી કિલો ડ્રગ્સ મળી આવ્યું હતું. જેની આંતરરાષ્ટ્રીય બજારમાં કિંમત 4 કરોડ રૂપિયા હતી. બંને આરોપીઓની ધરપકડ બાદ પોલીસે 2 વચેટિયાઓની ધરપકડ કરી હતી. જેમાંથી એક મહિલા આરોપી રેશ્મા ચંદન અને બીજી રિયાઝ મેમણ છે.
ગેંગના માસ્ટરમાઇન્ડની ધરપકડ
પોલીસે કુલ 4 આરોપીઓને ઝડપી લીધા હતા. જે બાદ પોલીસે તેમની તપાસ આગળ વધારી હતી અને આ સમગ્ર રેકેટનો સૌથી મોટો માસ્ટરમાઈન્ડ એટલે કે આરોપી નંબર 5 પ્રેમશંકર સિંહ ઝડપાઈ ગયો હતો. આ પ્રેમશંકર એ જ આરોપી છે જે તમામ ડ્રગ્સ બનાવતો હતો. પોલીસે પ્રેમશંકર સિંહના ગોડાઉનમાં દરોડો પાડીને 701 કિલો ડ્રગ્સ જપ્ત કર્યું હતું. જેની આંતરરાષ્ટ્રીય બજારમાં કિંમત 1403 કરોડ રૂપિયા આંકવામાં આવી છે. પ્રેમશંકરની ધરપકડ બાદ આરોપી નંબર 6 કિરણ પવારની ધરપકડ કરવામાં આવી હતી. જે અંબરનાથની એક ફેક્ટરીનો મેનેજર છે. તેમાંથી પણ પોલીસે 450 ગ્રામ ડ્રગ્સ જપ્ત કર્યું હતું, જેની કિંમત 90 લાખ રૂપિયા હતી.
ગુજરાતમાં પણ દરોડા પાડવામાં આવ્યા હતા
મહારાષ્ટ્રમા પકડાયેલા ડ્રગ્સ કેસમાં તપાસ આગળ વધી હતી. પોલીસને આરોપી પ્રેમશંકર સિંહ દ્વારા માહિતી મળી હતી કે તે ગુજરાતમાં અંકલેશ્વરથી મોટા પાયે ડ્રગ્સ બનાવે છે. જે બાદ પોલીસે 13 ઓગસ્ટના રોજ ગુજરાતના અંકલેશ્વરમાં દરોડો પાડીને ગિરિરાજ દીક્ષિત નામની વ્યક્તિની ધરપકડ કરી હતી. જેમની પાસેથી પોલીસે 513 કિલોથી વધુ ડ્રગ્સ જપ્ત કર્યું હતું, જેની બજાર કિંમત આશરે 1026 કરોડ રૂપિયા હોવાનું કહેવાય છે.