રશિયા-યુક્રેન વચ્ચે મધ્યસ્થી બનવામાં ચીનને મળશે સફળતા? યુદ્ધ વચ્ચે જિનપિંગ મોસ્કોની મુલાકાતે, પુતિન સાથે કરશે બેઠક
રશિયા અને યુક્રેન વચ્ચે યુદ્ધ શરૂ થયા બાદ રાષ્ટ્રપતિ શી જિનપિંગ આજે પ્રથમ વખત ચીનથી મોસ્કો પહોંચશે. બેઇજિંગે જિનપિંગની મુલાકાતને 'શાંતિ માટેની મુલાકાત' ગણાવી છે. જિનપિંગ ત્રણ દિવસ સુધી રશિયામાં રહેશે.
રશિયા અને યુક્રેન વચ્ચે 13 મહિનાથી વધુ સમયથી ચાલી રહેલા યુદ્ધના અંતના કોઈ સંકેત દેખાતા નથી. અમેરિકા અને યુરોપીયન દેશોના સમર્થનને કારણે યુક્રેન પણ રશિયાને જવાબ આપવામાં પાછીહટ નથી કરી રહ્યું. યુદ્ધની વચ્ચે આજે એટલે કે સોમવારે ચીનના રાષ્ટ્રપતિ શી જિનપિંગ રશિયાની મુલાકાતે મોસ્કો પહોંચવાના છે. જ્યાં તેઓ વ્લાદિમીર પુતિનને મળશે.
જિનપિંગ રશિયાની મુલાકાતે
ચીનના રાષ્ટ્રપતિની મોસ્કોની આ મુલાકાતને ‘વિઝિટ ફોર પીસ’ ગણાવી છે અને કહ્યું છે કે જિનપિંગ રશિયા અને યુક્રેન વચ્ચે ચાલી રહેલા યુદ્ધમાં મધ્યસ્થીની ભૂમિકા ભજવવા માંગે છે. જો કે જિનપિંગ આમાં કેટલા સફળ થાય છે તે તેમની મુલાકાત બાદ જ ખબર પડશે. આખું વિશ્વ ઇચ્છે છે કે રશિયા અને યુક્રેન વચ્ચે એક વર્ષથી વધુ સમયથી ચાલી રહેલું યુદ્ધ બંધ થાય અને શાંતિ પ્રવર્તે.
શી જિનપિંગની રશિયા મુલાકાત પર પશ્ચિમી દેશો પણ નજર રાખી રહ્યા છે. પશ્ચિમી દેશોને લાગે છે કે જિનપિંગ રશિયા અને યુક્રેન વચ્ચેની શાંતિ મંત્રણાને આગળ વધારી શકે છે. વોલ સ્ટ્રીટ જર્નલે પોતાના અહેવાલમાં જણાવ્યું છે કે શી જિનપિંગ પ્રથમ વખત યુક્રેનના રાષ્ટ્રપતિ વોલોદિમિર ઝેલેન્સકી સાથે ફોન પર વાત કરવાની પણ યોજના બનાવી શકે છે.
આજે ડિનર કાલે મહત્વની મિટિંગ
પુતિનના વિદેશ નીતિ સલાહકારે રશિયન સમાચાર એજન્સીઓને જણાવ્યું છે કે શી અને પુતિન મંગળવારે વાતચીત કરશે. આ પહેલા સોમવારે બંનેની અનૌપચારિક મુલાકાત થશે અને ત્યાર બાદ તેઓ સાથે ડિનર કરશે. બંને દેશો વચ્ચે મંગળવારે થનારી બેઠકમાં વ્યાપક ભાગીદારી, વ્યૂહાત્મક સંબંધો પર કરાર પર હસ્તાક્ષર થવાની પણ શક્યતા છે.
રશિયા અને યુક્રેન વચ્ચેના યુદ્ધને લઈને ચીન અત્યાર સુધી સંપૂર્ણપણે તટસ્થ દેખાઈ રહ્યું છે. ન તો તેણે યુક્રેનનો પક્ષ લીધો છે કે ન તો તે રશિયા વિરુદ્ધ યુરોપિયન દેશોના કોઈ પગલામાં જોડાયો છે. નાટો સહિત પશ્ચિમી દેશોએ પણ ઘણી વખત ચીનની રણનીતિની ટીકા કરી છે.
જિનપિંગની મુલાકાત પર પુતિને શું કહ્યું?
બીજી તરફ, પુતિને શી જિનપિંગની મોસ્કો મુલાકાતના એક દિવસ પહેલા રવિવારે યુક્રેન યુદ્ધનો અંત લાવવાની બીજિંગની ઈચ્છાને આવકારી હતી. પુતિને કહ્યું કે શી સાથેની તેમની વાતચીતથી ઘણી અપેક્ષાઓ છે.
