વેનેઝુએલા પર અમેરિકાના ઓપરેશનના થોડા દિવસો પછી અમેરિકાના રાષ્ટ્રપતિ ડોનાલ્ડ ટ્રમ્પે ક્યુબાને હવે ખુલે આમ ધમકી આપી છે. તેમણે કહ્યું હતું કે ક્યુબાએ તાત્કાલિક અમેરિકા સાથે કરાર કરવો જોઈએ, નહીં તો તેનો તેલ અને નાણાંનો પુરવઠો સંપૂર્ણપણે કાપી નાખવામાં આવશે. ટ્રમ્પે તેમના સોશિયલ મીડિયા પ્લેટફોર્મ, ટ્રુથ સોશિયલ પર લખ્યું હતું કે, “ક્યુબાને હવે તેલનો એક ટીપું કે ડોલર પણ નહીં મળે. ક્યુબાએ મોડું થાય તે પહેલાં ડિલ કરવી જોઈએ.”

ટ્રમ્પે હવે ક્યુબાને આપી ધમકી

ટ્રમ્પે કહ્યું હતું કે ક્યુબા ઘણા વર્ષોથી વેનેઝુએલાના તેલ અને નાણાં પર નિર્ભર છે. તેમનું નિવેદન એવા સમયે આવ્યું છે જ્યારે ક્યુબાના રાષ્ટ્રપતિ મિગુએલ ડિયાઝ-કેનેલે અમેરિકાના પગલાંની આકરી ટીકા કરી છે. ટ્રમ્પે સોશિયલ મીડિયા પર એક પોસ્ટ શેર કરીને જાહેરાત કરી હતી કે માર્કો રુબિયો ક્યુબાના રાષ્ટ્રપતિ બનશે. ટ્રમ્પે જવાબ આપ્યો, “આ મને સારું લાગે છે.” જોકે, ટ્રમ્પ વહીવટીતંત્રે રુબિયો અંગે આવી કોઈ નીતિ કે યોજનાનો ઉલ્લેખ કર્યો નથી. ટ્રમ્પ દ્વારા આ નિવેદનને અતિશયોક્તિ માનવામાં આવી રહી છે.

અમેરિકાની કાર્યવાહીનો વિરોધ

શનિવારે, ક્યુબાની રાજધાની હવાનામાં યુએસ એમ્બેસી સામે હજારો લોકોની સામે, ડિયાઝ-કેનેલે જણાવ્યું હતું કે અમેરિકાએ વેનેઝુએલા પર હુમલો કર્યો હતો અને તેના રાષ્ટ્રપતિને પકડી લીધા હતા. તેમણે આને રાજ્ય આતંકવાદ ગણાવ્યો હતો અને કહ્યું હતું કે તે આંતરરાષ્ટ્રીય કાયદાનું ખુલ્લેઆમ ઉલ્લંઘન છે. ડિયાઝ-કેનેલના મતે, અમેરિકાએ એક શાંતિપ્રિય દેશ પર હુમલો કર્યો હતો જે તેના માટે કોઈ ખતરો નહોતો.

ક્યુબાનો વેનેઝુએલા સાથે શું સંબંધ છે?

હાલમાં, ક્યુબા તેની તેલની જરૂરિયાતોનો લગભગ 30% વેનેઝુએલામાંથી મેળવે છે. બદલામાં, ક્યુબા હજારો ડોકટરો અને તબીબી સ્ટાફને વેનેઝુએલા મોકલે છે. નિષ્ણાતો કહે છે કે જો વેનેઝુએલાના તેલનો પુરવઠો બંધ થઈ જાય, તો ક્યુબાનો વીજ સંકટ વધુ ખરાબ થઈ શકે છે, કારણ કે દેશની વીજ વ્યવસ્થા પહેલાથી જ નાજુક છે.

નિકોલસ માદુરોના રક્ષણ માટે ક્યુબાના એજન્ટોને પણ તૈનાત કરવામાં આવ્યા હતા. વેનેઝુએલામાં યુએસ કાર્યવાહી દરમિયાન બત્રીસ ક્યુબન સૈનિકો માર્યા ગયા હતા. યુએસ સેક્રેટરી ઓફ સ્ટેટ માર્કો રુબિયોએ જણાવ્યું હતું કે ક્યુબા સરકાર ગંભીર મુશ્કેલીમાં છે. જોકે, ટ્રમ્પે કહ્યું હતું કે લશ્કરી કાર્યવાહીની જરૂર વગર ક્યુબા પોતાની જાતે જ તૂટી પડશે.

ક્યુબાએ અમેરિકા પર ગંભીર આરોપ લગાવ્યા

આ સમગ્ર ઘટના પર ક્યુબાએ તીવ્ર પ્રતિક્રિયા આપી છે. ક્યુબાના રાષ્ટ્રપતિ મિગુએલ ડિયાઝ-કેનેલે અમેરિકાની લશ્કરી કાર્યવાહીની કડક નિંદા કરી છે. હવાનામાં અમેરિકન દૂતાવાસ સામે એક રેલીમાં તેમણે કહ્યું કે અમેરિકાએ વેનેઝુએલા પર હુમલો કરીને આંતરરાષ્ટ્રીય કાયદાનું ઉલ્લંઘન કર્યું છે.

ક્યુબાના રાષ્ટ્રપતિએ કહ્યું કે કોઈ દેશના રાષ્ટ્રપતિને પકડવા અને તેની સરકારને ઉથલાવવાનો પ્રયાસ કરવો એ “રાજ્ય આતંકવાદ” સમાન છે. તેમણે તેને આંતરરાષ્ટ્રીય કાયદાનું ઉલ્લંઘન ગણાવ્યું અને વિશ્વભરના દેશોને આ કાર્યવાહી પર ધ્યાન આપવાની અપીલ કરી.

Breaking News: વેનેઝુએલા બાદ ટ્રમ્પની નજર હવે ગ્રીનલેન્ડ પર, લશ્કરી વડાને આપ્યો આદેશ, ગમે ત્યારે હુમલો કરવાની તૈયારીમાં અમેરિકા, આ સ્ટોરી વાંચવા અહીં ક્લિક કરો