ડ્રેગનની ખુલી પોલ: પાકિસ્તાન બાદ હવે ઈરાનને ‘પડદા પાછળ’થી મદદ કરતું ઝડપાયું ચીન!

દુનિયા અત્યારે બે મોટા સંઘર્ષો જોઈ રહી છે – એક બાજુ ભારત અને પાકિસ્તાન, તો બીજી તરફ અમેરિકા અને ઈરાન. પરંતુ આ બંને સંઘર્ષોમાં પડદા પાછળ રહીને એક ત્રીજો ખેલાડી ‘ગ્રેટ ગેમ’ રમી રહ્યો છે, અને તે છે ચીન. ચીન પોતાના અત્યાધુનિક જાસૂસી સેટેલાઇટ્સ દ્વારા ભારત અને અમેરિકાના સૈન્ય ઠેકાણાઓની પળેપળની માહિતી પાકિસ્તાન અને ઈરાનને પહોંચાડી રહ્યું હોવાની વિગતો સામે આવી છે.

પાકિસ્તાન અને ભારત વચ્ચેના સંઘર્ષમાં ચીની દખલ

મે 2025માં જમ્મુ-કાશ્મીરના પહેલગામમાં થયેલા આતંકી હુમલા બાદ ભારતે ‘ઓપરેશન સિંદૂર’ શરૂ કર્યું હતું. આ ઓપરેશન દરમિયાન ભારતીય સેના જ્યારે પાકિસ્તાની આતંકી ઠેકાણાઓને નેસ્તનાબૂદ કરી રહી હતી, ત્યારે પાકિસ્તાનને બચાવવા માટે ચીને આકાશમાંથી બાજ નજર રાખી હતી. ચીને ભારતના સૈન્ય મૂવમેન્ટની ‘રિયલ ટાઈમ’ માહિતી પાકિસ્તાન સાથે શેર કરી હતી, જેના આધારે પાકિસ્તાને પોતાની રડાર અને એર ડિફેન્સ સિસ્ટમમાં ફેરફાર કર્યા હતા.

ઈરાન-અમેરિકા યુદ્ધમાં ચીનનો છૂપો સાથ

માત્ર પાકિસ્તાન જ નહીં, ચીને ઈરાનને પણ ગુપ્ત રીતે ‘TEE-01B’ નામનો જાસૂસી સેટેલાઇટ વેચ્યો છે. ફાઈનાન્શિયલ ટાઈમ્સના અહેવાલ મુજબ, આ સેટેલાઇટ દ્વારા ઈરાનની સેનાએ સાઉદી અરેબિયા, જોર્ડન અને ઈરાકમાં આવેલા અમેરિકી સૈન્ય મથકોના સચોટ લોકેશન મેળવ્યા હતા. માર્ચ 2026માં થયેલા હુમલામાં અમેરિકાને જે મોટું નુકસાન થયું, તેની પાછળ ચીની કંપની ‘MizarVision’ દ્વારા પૂરા પાડવામાં આવેલા સેટેલાઇટ ફોટા જવાબદાર હોવાનું કહેવાય છે.

નવું જોખમ: હથિયાર નહીં, માહિતી છે અસલી પાવર

ચીન સતત હથિયારો સપ્લાય કરવાની ના પાડી રહ્યું છે, પરંતુ જે રીતે તે સેટેલાઇટ ફીડ અને કો-ઓર્ડિનેટ્સ દુશ્મન દેશોને આપી રહ્યું છે, તે હથિયારો કરતાં પણ વધુ ઘાતક સાબિત થઈ રહ્યું છે. ભારત અને અમેરિકા જેવા દેશો માટે આ ‘અદ્રશ્ય દુશ્મન’ હવે એક મોટો પડકાર બની ગયો છે. શું ચીન આ રીતે દુનિયાને એક મોટા યુદ્ધ તરફ ધકેલી રહ્યું છે? તે હવે સૌથી મોટો સવાલ છે.