US Iran Talks Breaking News: અમેરિકા-ઈરાન તણાવ વચ્ચે પાકિસ્તાન બન્યું ‘મધ્યસ્થ’, યુદ્ધ રોકાશે કે વધુ ઉગ્ર બનશે?
પાકિસ્તાનની રાજધાની ઈસ્લામાબાદમાં આજે અમેરિકા અને ઈરાન વચ્ચે મહત્વપૂર્ણ શાંતિ ચર્ચા શરૂ થઈ રહી છે. બે અઠવાડિયાના સીઝફાયર બાદ આ બેઠક યુદ્ધને અંત લાવી શકે છે કે તણાવ વધારી શકે છે.
મધ્ય પૂર્વમાં ચાલી રહેલા વિનાશ અને સંઘર્ષને અટકાવવા માટે પાકિસ્તાનમાં ચર્ચા માટે મંચ તૈયાર કરવામાં આવ્યો છે. આજે તેની રાજધાની ઈસ્લામાબાદમાં અમેરિકા અને ઈરાન વચ્ચે ઉચ્ચસ્તરીય ચર્ચા યોજાવાની છે. બંને દેશો લાંબા સમયથી એકબીજાના કટ્ટર વિરોધી રહ્યા છે, તેથી આ બેઠકને અત્યંત મહત્વપૂર્ણ માનવામાં આવી રહી છે. પરંતુ ઈરાનની તરફથી હજુ અનિશ્ચિતતા યથાવત છે. આ અનિશ્ચિતતાનું મુખ્ય કારણ ઈરાન દ્વારા ઈઝરાયેલ અને લેબનાન સાથે જોડાયેલી એક શરત છે.
પાકિસ્તાનની શંકાસ્પદ ભૂમિકા
આ ચર્ચા અંગે પાકિસ્તાન પોતે પણ સસ્પેન્સ ઊભું કરી રહ્યું છે. કારણ કે પાકિસ્તાનના રક્ષા પ્રધાન ખ્વાજા આસિફના એક સોશિયલ મીડિયા પોસ્ટે પરિસ્થિતિને વધુ જટિલ બનાવી દીધી છે અને પાકિસ્તાન પોતે જ એક મોટા ‘વિલન’ તરીકે સામે આવી રહ્યું છે. પાકિસ્તાની રક્ષા પ્રધાન ખ્વાજા આસિફના એક નિવેદને ઈઝરાયેલને સૈન્ય તૈયારીઓ તેજ કરવા માટે મજબૂર કરી દીધું છે. તેમણે વધુમાં જણાવ્યું કે ગાઝા પછી ઈરાન અને હવે લેબનોનમાં પણ હિંસા યથાવત છે. તેમના આ નિવેદનથી પરિસ્થિતિ વધુ સંવેદનશીલ બની ગઈ છે. જોકે, વધતા દબાણ વચ્ચે તેમણે પોતાનો પોસ્ટ ડિલીટ કરી દીધો હતો, પરંતુ તેની અસર પહેલેથી જ દેખાવા લાગી છે.
અમેરિકાની તરફથી જેરેડ કુશનર અને ઉપપ્રમુખ જેડી વેન્સ એ નેતૃત્વ સંભાળ્યું છે. જ્યારે ઈરાને પોતાના અનુભવી વિદેશ મંત્રી અબ્બાસ અરાઘચી અને સંસદ અધ્યક્ષ મોહમ્મદ બાઘર ગાલીબાફને મોકલ્યા છે. આ પ્રતિનિધિમંડળની સુરક્ષા વ્યવસ્થા પાકિસ્તાની સેનાના પ્રમુખ આસીમ મુનીર પોતાની દેખરેખ હેઠળ રાખી રહ્યા છે.
