Breaking News: ટ્રમ્પનું વાઇલ્ડ કાર્ડ પ્લે- પુતિનના શરણે જઈ રશિયા સાથે કરી ડીઝલ ડીલ, યુક્રેન પર ભીષણ હુમલો કરી જશ્ન મનાવ્યો !

યુક્રેનના ઝાપોરિઝિયા વિસ્તારમાં થયેલા ભીષણ રશિયન હવાઈ હુમલામાં ત્રણ બાળકો સહિત ઓછામાં ઓછા આઠ લોકોના મોત થયા છે. સ્થાનિક સંરક્ષણ પરિષદના સહ-અધ્યક્ષ ઇવાન ફેદોરોવના જણાવ્યા અનુસાર, શનિવારે રહેણાંક ઇમારતો પર રશિયન બોમ્બ પડવાથી આ દુર્ઘટના સર્જાઈ હતી, જેમાં 16 અન્ય લોકો ગંભીર રીતે ઘાયલ થયા છે.

સંપૂર્ણ પાયે શરૂ થયેલા યુદ્ધના સાડા ચાર વર્ષ કરતાં વધુ સમય વીતી ગયા પછી પણ રશિયા તરફથી બોમ્બમારો યથાવત છે; છેલ્લા ચાર દિવસમાં જ યુક્રેનમાં 55થી વધુ લોકોએ પોતાના જીવ ગુમાવ્યા છે. આ હુમલો અમેરિકી રાષ્ટ્રપતિ ડોનાલ્ડ ટ્રમ્પ દ્વારા રશિયા સાથે મોટા પાયે ડીઝલ આયાત કરવાના કરારની જાહેરાત કર્યાના બીજા જ દિવસે થયો છે. ટ્રમ્પના આ નિર્ણયે વર્ષોથી રશિયા પર લાદવામાં આવેલા અમેરિકી રાજદ્વારી અને આર્થિક દબાણના વલણને સંપૂર્ણપણે પલટી નાખ્યું છે.

ટ્રમ્પનું ચોંકાવનારું પગલું

અમેરિકાની મધ્યસત્ર ચૂંટણીઓ પહેલાં ઇંધણના વધતા ભાવો પર અંકુશ મેળવવાના ઉદ્દેશથી ટ્રમ્પે આ ડીલની જાહેરાત કરી છે. શુક્રવારે સોશિયલ મીડિયા પર ટ્રમ્પે જણાવ્યું હતું કે રશિયન રાષ્ટ્રપતિ વ્લાદિમીર પુતિન સાથે ફોન પર થયેલી વાતચીત દરમિયાન આ સમજૂતી નક્કી થઈ છે.

કરાર હેઠળ રશિયા તાત્કાલિક 3 લાખ ટનથી વધુ ડીઝલનો પુરવઠો પૂરો પાડશે, જે પછી નવેમ્બરમાં 5 લાખ ટન અને ટૂંક સમયમાં 10 લાખ ટન વધારાનું ડીઝલ મોકલવામાં આવશે. આ પછી ટૂંકા ગાળામાં વધુ 30 લાખ ટન ડીઝલ સપ્લાય કરવામાં આવશે. ટ્રમ્પનો આ નિર્ણય ગયા મહિને જ તેમના દ્વારા હસ્તાક્ષર કરાયેલા એ વ્યાપક રશિયા-વિરોધી પ્રતિબંધ કાયદાથી તદ્દન વિપરીત છે, જેનો હેતુ યુદ્ધ માટે રશિયાની તેલ અને ગેસની આવક રોકવાનો હતો.

ઝેલેન્સકીએ સમજૂતીની આકરી ટીકા કરી

યુક્રેનના રાષ્ટ્રપતિ વોલોદિમિર ઝેલેન્સકીએ આ સમજૂતીની સખત નિંદા કરતાં તેને મજબૂત સાથીઓ દ્વારા લેવાયેલો એક નબળો નિર્ણય ગણાવ્યો હતો. સોશિયલ મીડિયા પોસ્ટમાં ઝેલેન્સકીએ ચેતવણી આપી હતી કે અમેરિકાનું આ પગલું રશિયાને વધુ આતંક ફેલાવવા માટે નાણાકીય સંસાધનો પૂરા પાડશે. તેમણે ઉમેર્યું, “આનાથી રશિયાને મોટો ફાયદો થશે. તેને વધુ લોકોની હત્યા કરવાનો, યુદ્ધને લંબાવવાનો અને અમેરિકા પ્રત્યે ઓછું સન્માન દાખવવાની તક મળશે.”

આ જાહેરાત એવા સમયે થઈ જ્યારે ટ્રમ્પના વિશેષ દૂત સ્ટીવ વિટકોફ અને જમાઈ જેરેડ કુશનર મિયામી ખાતે યુક્રેનના પ્રતિનિધિઓ સાથે શાંતિ દરખાસ્ત પર ચર્ચા કરી રહ્યા હતા. ઝેલેન્સકીએ નિરાશા વ્યક્ત કરતા કહ્યું કે વાતચીતમાં સામેલ તેમની ટીમનો ઉપયોગ માત્ર એક દેખાડા ખાતર કરવામાં આવી રહ્યો છે, જે સાથી રાષ્ટ્રો વચ્ચે યોગ્ય વ્યવહાર નથી.

રશિયન તેલ ખરીદવા પર ભારતને સલાહ આપનારા ટ્રમ્પે પુતિન સાથે કરી મોટી ડીલ

શુક્રવારે પુતિન સાથેની વાતચીત બાદ ટ્રમ્પે કહ્યું કે મોસ્કો તાત્કાલિક અમેરિકાને ડીઝલ સપ્લાય કરશે. આ અનપેક્ષિત જાહેરાત એવા સમયે થઈ છે જ્યારે અમેરિકાએ રશિયન તેલ અને ગેસ ખરીદનારાઓ પર ભારે ટેરિફ લગાવવા માટે કાયદો બનાવી રાખ્યો છે.

અમેરિકી રાષ્ટ્રપતિએ ‘ટ્રુથ સોશિયલ’ પર લખ્યું: “મેં હમણાં જ રશિયાના રાષ્ટ્રપતિ વ્લાદિમીર પુતિન સાથે અત્યંત સફળ વાતચીત પૂર્ણ કરી છે. આ દરમિયાન સહમતિ સધાઈ છે કે રશિયા તાત્કાલિક અમેરિકન અને વૈશ્વિક બજારને 3 લાખ ટનથી વધુ ડીઝલ સપ્લાય કરશે. નવેમ્બરમાં રશિયા 5 લાખ ટન અને ત્યારબાદ તુરંત 10 લાખ ટન ડીઝલ પહોંચાડશે. આ ઉપરાંત પોતાની રિફાઈનરીઓની સ્થિતિ અનુસાર તે ટૂંકા સમયમાં 30 લાખ ટન ડીઝલની આપૂર્તિ કરશે.” આ સાથે જ અમેરિકાએ રશિયન ડીઝલના વેચાણ પર એપ્રિલ 2027 સુધી લાદવામાં આવેલા પ્રતિબંધો હટાવી લીધા છે.

ચાર્ટ બન્યા પછી પણ મળી શકે છે ટ્રેનની કન્ફર્મ ટિકિટ! જાણો રેલવેનો આ ખાસ નિયમ