Breaking News : અમેરિકામાં શટડાઉન ! લાખો કર્મચારીઓના પગાર અટકી ગયા, મેડિકલ અને બીજી સેવાઓ પર પડશે સીધી અસર

યુનાઇટેડ સ્ટેટ્સમાં ફેડરલ સરકાર એટલે કે ટ્રમ્પ વહીવટીતંત્ર સત્તાવાર રીતે બંધ થઈ ગયું છે. રાષ્ટ્રપતિ ડોનાલ્ડ ટ્રમ્પનું રિપબ્લિકન વહીવટ મંગળવારે સેનેટમાં ફંડિંગ બિલ પસાર કરવામાં નિષ્ફળ ગયું. ફેડરલ સરકારનું ફંડ અડધી રાતે સમાપ્ત થાય છે, જેનો અર્થ છે કે સરકાર સ્થગિત થઈ જશે. આ ગતિરોધ ફેડરલ સેવાઓમાં વિક્ષેપ પાડશે અને ઘણા ફેડરલ કર્મચારીઓને રજા પર જવું પડશે. વ્હાઇટ હાઉસે શટડાઉન માટે ડેમોક્રેટ્સને જવાબદાર ઠેરવ્યા છે. 6 વર્ષમાં યુનાઇટેડ સ્ટેટ્સમાં આ પહેલું સરકારી શટડાઉન છે.

Democrat Shutdown. pic.twitter.com/w5GKHQQDuj

— The White House (@WhiteHouse) October 1, 2025

શટડાઉન ટાળવાના પ્રયાસો નિષ્ફળ

શટડાઉન ટાળવાના છેલ્લા પ્રયાસમાં, યુએસ સેનેટે મંગળવારે ફંડિંગ પર મતદાન કર્યું. રિપબ્લિકન બિલ સેનેટમાં 55-45 મતથી નકારી કાઢવામાં આવ્યું. જો કે, તેને પસાર થવા માટે 60 મતોની જરૂર હતી. ડેમોક્રેટિક પાર્ટીએ આરોપ લગાવ્યો હતો કે, રાષ્ટ્રપતિ ટ્રમ્પ અને તેમની રિપબ્લિકન પાર્ટી આરોગ્યસંભાળની માંગણીઓ સ્વીકારી રહી નથી, તેથી તેઓ બિલને મંજૂરી ન આપીને સરકારી ફંડને અવરોધિત કરી રહ્યા છે. હવે જરૂરી સેવાઓ પૂરી પાડતી સંસ્થાઓ સિવાયની તમામ ફેડરલ એજન્સીઓએ કામગીરી બંધ કરવી પડશે.

શટડાઉન એટલે?

શટડાઉનનો અર્થ એ છે કે, યુનાઇટેડ સ્ટેટ્સમાં સરકારી એજન્સીઓ અસ્થાયી રૂપે બંધ થઈ જશે. આ શટડાઉન હેઠળ બિન-આવશ્યક ગણાતા ફેડરલ કર્મચારીઓને પગાર વિના રજા પર મોકલવામાં આવશે. લશ્કરી કર્મચારીઓ સહિત આવશ્યક કર્મચારીઓને પણ પગાર વિના કામ કરવું પડશે.

આની અસર શું?

યુનાઇટેડ સ્ટેટ્સમાં શટડાઉનના પરિણામે કુલ સરકારી કર્મચારીઓના 40%, આશરે 7,00,000-8,00,000 કર્મચારીઓને પગાર વિના કામચલાઉ રજા (ટેમ્પરરી રજા) પર મોકલવામાં આવશે. આ સમય દરમિયાન કાયદા અમલીકરણ, સરહદ સુરક્ષા, મેડિકલ અને હવાઈ જેવી આવશ્યક સર્વિસ ચાલુ રહેશે. વધુમાં શટડાઉન ટ્રાન્સપોર્ટ સેવાઓને અસર કરશે અને ઘણી એરલાઇન્સે ફ્લાઇટ વિલંબ (Late) અંગે ચિંતા વ્યક્ત કરી છે. જો શટડાઉન લાંબા સમય સુધી ચાલુ રહેશે, તો તે બજાર અને અર્થતંત્રને અસર કરી શકે છે.

6 વર્ષમાં આ પહેલું સરકારી શટડાઉન

યુનાઇટેડ સ્ટેટ્સમાં, સરકાર ચલાવવા માટે દર વર્ષે બજેટ પસાર કરવું જરૂરી છે પરંતુ જો સેનેટ અને ગૃહ કોઈ કારણોસર અસંમત થાય છે, તો ફંડિંગ બિલ પસાર થતું નથી. પરિણામે, સરકારી એજન્સીઓ પગાર મેળવી શકતી નથી. આના કારણે બિન-આવશ્યક સેવાઓ અને કચેરીઓ બંધ થઈ જાય છે. છેલ્લા 6 વર્ષમાં આ પહેલું સરકારી શટડાઉન છે. આંકડા મુજબ, વર્ષ 1981 થી યુનાઇટેડ સ્ટેટ્સમાં 15 સરકારી શટડાઉન થયા છે. છેલ્લું સરકારી શટડાઉન 22 ડિસેમ્બર, 2018 ના રોજ શરૂ થયું હતું અને 25 જાન્યુઆરી, 2019 અથવા તો 35 દિવસ સુધી ચાલ્યું હતું.