ગુજરાતની આ યુવતીએ અમેરિકામાં હાંસલ કરી એવી સિદ્ધી, કે તમને પણ જાણીને થશે ગર્વ

અમેરિકા ખાતે વસતાં નાના – નાનીના ઘરે ઉચ્ચ અભ્યાસ માટે પહોંચેલી નૈત્રી પટેલની US નેવીમાં પસંદગી થઇ છે. આ યુવતી દક્ષિણ ગુજરાતના ચીખલી પાટીદાર સમાજ અને વાંઝણા ગામમાંથી આવે છે. કહેવામાં આવી રહ્યું છે કે દક્ષિણ ગુજરાતની આ પહેલી યુવતી હશે જેણે આ સિદ્ધિ મેળવી છે.

10 અઠવાડિયાની આકરી ટ્રેનિંગમાંથી પસાર થયા બાદ યુએસ નેવીમાં નિમણૂંક પામતાં નૈત્રી પટેલના પરિવારજનોનો ઉત્સાહ પણ ખૂબ વધ્યો છે. અમેરિકાને કર્મભૂમિ બનાવનારા ગુજરાતીઓ હવે ત્યાં પણ અલગ – અલગ ક્ષેત્રોમાં પોતાનો ડંકો બજાવી રહ્યા છે.

એવું કહેવાતું કે વિદેશમાં વસતા ગુજરાતીઓ ફક્ત હોટેલ કે મોટેલના બિઝનેસ પૂરતા જ સીમિત રહી જાય છે. પરંતુ હવે ગુજરાતીઓની ઓળખ વ્હાઈટ હાઉસ સુધી પહોંચી ચુકી છે. અને હવે તેઓ પણ નેવી જેવી ફિલ્ડની પસંદગી કરી રહ્યા છે.

ઉચ્ચ અભ્યાસ માટે અમેરિકાના મિસીસીપી ખાતે વસતાં પોતાના નાના અને નાનીના ઘરે નેત્રી ગઈ હતી. જ્યાં પોતાનો અભ્યાસ પૂર્ણ કર્યા બાદ તેણીએ યુએસ નેવીમાં જોડાવવાનો નિર્ણય કર્યો હતો.

યુએસ નેવીને દુનિયાભરમાં સૌથી આકરી અને સખત ગણાય છે. તેથી યુવતીઓ નેવીમાં ટ્રેનિંગ લેવાનો વિચાર પણ ભાગ્યે જ કરે છે. તેવામાં પરિવાર થોડો અમસંજસમાં હતો કે નૈત્રીને યુએસની નેવી ટ્રેનિંગ માટે મોકલવી કે નહિ.

પરંતુ નૈત્રીનો આત્મવિશ્વાસ ગજબનો હતો. તેણીએ જે ધાર્યું હતું તે કરી બતાવવાનું નક્કી કરી દીધું. 10 અઠવાડિયાની આકરી ટ્રેનિક બાદ તેણીને યુએસની નેવીમાં સેઇલર માટે પસંદગી થઈ ગઈ.

નૈત્રીની આ સિદ્ધિથી માત્ર મિસીસીપીમાં રહેતા એનઆરઆઈ પરિવારો જ નહીં પરંતુ ચીખલીમાં રહેતા તેના પરિવારજનોમાં પણ આનંદની અને ગર્વની લાગણી વ્યાપી ગઈ છે.

નૈત્રીના પિતા નિરવ પટેલ જણાવે છે કે શિકાગો ખાતે આવેલા નેવલ બેઝ ટ્રેનિંગ સેન્ટર આવેલુ છે. જ્યાં બધા ઉમેદવારોને 10 અઠવાડિયાની ટ્રેનિંગ આપવામાં આવે છે. દર અઠવાડિયે આ ટ્રેનિંગ સેશન વધુ ને વધુ સખ્ત બનાવવામાં આવે છે. જેના કારણે મોટા ભાગના ઉમેદવારો અધવચ્ચેથી હિંમત હારીને ટ્રેનિંગ છોડી દેતા હોય છે. નૈત્રી જેવા ઘણા ઓછા ઉમેદવારો એવા હોય છે જે આ સિદ્ધિ મેળવવામાં સફળ રહે છે.

આ પણ વાંચો: Surat: સુરત શહેરનાં વાતાવરણમાં પલટો, શહેરનાં અનેક વિસ્તારોમાં વરસાદની ધમાકેદાર એન્ટ્રી

આ પણ વાંચો: Surat: કોરોનાના કારણે મુશ્કેલીમાં મુકાયેલા 150 પરિવારોને અમેરિકાના ગુજરાતી પરિવારોએ કરી 8 લાખની સહાય