Gujarat : અમદાવાદમાં વહેલી સવારે ભારે વરસાદ નોંધાયો, જામનગર-રાજકોટ-ગોંડલ અને ડભોઇમાં સાંબેલાધાર વરસાદ નોંધાયો

અમદાવાદ શહેરમાં વહેલી સવારે વરસાદ નોંધાયો

અમદાવાદમાં આજે વહેલી સવારે 5 કલાકે શરૂ થયેલો વરસાદ આશરે 1 કલાક વરસ્યો હતો. વરસાદને કારણે શહેરના નિચાણવાળા વિસ્તારોમાં પાણી ભરાયા હતા. કેટલાક વિસ્તારોમાં ગટર અને કેમિકલયુક્ત પાણી બેક મારતા સ્થાનિકો પરેશાન થયા હતા. નેશનલ હાઇવે નંબર-8 પર ગટરમાંથી કેમિકલયુક્ત પાણી બેક મારતા પાણી ભરાયા હતા. બરોડા એક્સપ્રેસ-વેથી જશોદાનગર જવાના સર્વિસ રોડ પર પાણી ભરાયા હતા. રાહદારીઓ ગટર અને કેમિકલયુક્ત પાણીમાંથી પસાર થવા મજબૂર બન્યા હતા.

જામનગર જિલ્લામાં સાંબેલાધાર વરસાદ નોંધાયો

જામનગર જિલ્લામાં પણ સાર્વત્રિક વરસાદ નોંધાયો હતો. છેલ્લા 24 કલાકમાં જિલ્લાભરમાં બેથી સાત ઇંચ વરસાદ નોંધાયો હોવાના અહેવાલો મળી રહ્યા છે. જામનગર જિલ્લાના કાલાવડમાં સાત ઇંચ વરસાદ ખાબક્યો છે. ધ્રોલમાં પણ સાડા છ ઇંચ વરસાદ ખાબક્યો છે. જામનગર શહેરમાં ત્રણ ઇંચ વરસાદ નોંધાયો છે. તો લાલપુર અને જામજોધપુરમાં બે-બે ઇંચ વરસાદ નોંધાયો છે. મોટીબાણુગાર, રામપર, ધુંવાવ સહિતના ગામોમાં પાણી ભરાયા છે. કોઝવે પર બે ફૂટથી વધુ પાણી ભરાતા વાહનવ્યવહારને અસર થઇ છે.

જામનગરનો રણજીતસાગર ડેમ ઓવરફલો થયો

ભારે વરસાદને કારણે જામનગરનો રણજીત સાગર ડેમ ઓવરફ્લો થયો છે. રણજીત સાગર ડેમમાં ઓક્ટોબર સુધી ચાલે એટલું જ પાણી હતું. ભારે વરસાદને પગલે એક જ રાતમાં જળસંકટ દૂર થયું છે.

રાજકોટ જિલ્લામાં સાંબેલાધાર વરસાદ નોંધાયો

તો રાજકોટ જિલ્લામાં છેલ્લા 24 કલાકમાં સાર્વત્રિક મેઘમહેર થઇ છે. જિલ્લાના લોધિકામાં 5.5 ઈંચ, ગોંડલમાં 5 ઈંચ વરસાદ ખાબક્યો છે. રાજકોટ શહેરમાં સરેરાશ 4 ઈંચ વરસાદ નોંધાયો છે. તો જિલ્લાના ઉપલેટા, કોટડા સાંગાણી, જેતપુર, પડધરીમાં 3 ઈંચ વરસ્યો છે.

ડભોઇમાં વહેલી સવારે વરસાદ નોંધાયો

વડોદરાના ડભોઇ શહેર અને તાલુકામાં પણ વહેલી સવારથી વરસાદ નોંધાયો છે. વરસાદના પગલે રોડ રસ્તા પાણી પાણી થયા છે. ટંગીવાળા, સીમરીયા, ગોપાલપુરા, પણસોલી, ભીલાપુરમાં વરસાદ નોંધાયો છે.