નવસારીની 14 વર્ષીય સગીરાને સ્નેપચેટથી ફોસલાવીને કર્યું અપહરણ, પોલીસે દિલ્હી પહોંચી સગીરાને બચાવી

જો તમારા બાળકો પણ સોશિયલ મીડિયા પર વધુ એક્ટિવ રહે છે. તો સાચવજો. જી હાં, કારણ કે નવસારીના ગણદેવીમાં એક સગીર બાળકીને સ્નેપચેટ ચલાવવું ભારે પડ્યું. સોશિયલ મીડિયા પર અમુક શખ્સોએ બાળકી સાથે મિત્રતા કરી અને પછી અપહરણ કર્યું હતું. જો કે પોલીસે ગણતરીના કલાકોમાં જ 4 આરોપીને ઝડપી લીધા અને બાળકીને બચાવી લીધી.

સમગ્ર ઘટનાની વાત કરીએ તો, નવસારીના ગણદેવીમાં રહેતી એક 14 વર્ષીય બાળકી. જે સોશિયલ મીડિયા પર એક્ટિવ રહેતી હતી.  ત્યારે સ્નેપચેટ પર બાળકીની સમીર પઠાન નામના શખ્સ સાથે મિત્રતા થઇ. જે બાદ તેણે બાળકીને ફોસલાવીને વિશ્વાસમાં લીધી અને મોકો જોઇને, 10 નવેમ્બરે તેનું અપહરણ કરી લીધું. જે બાદ બાળકીને દાહોદથી રાજસ્થાન અને દિલ્હી વાયા ઉત્તર પ્રદેશ લઇ ગયા.

અપહરણ બાદ આરોપી શખ્સોએ બાળકીના પરિજનોને વોટ્સએપ કોલ કરીને રૂપિયા 1 કરોડની ખંડણી માગી હતી. જો કે હાલ તો બાળકી મળી જતા પરિજનો ખુશ છે.

પરિજનોએ જ્યારે અપહરણની વાત પોલીસને જણાવી. ત્યારે જિલ્લા પોલીસે, LCB અને રેન્જ IGની ટીમે ટેક્નિકલ સર્વેલન્સના આધારે તપાસ હાથ ધરી. જો કે પોલીસ માટે આ મોટો પડકાર હતો કે ક્યાંક અપહ્યત બાળકીની હત્યા ન થઇ જાય. તે માટે પોલીસે સાવચેતીથી કાર્યવાહી કરી અને પરિજનોને આરોપીની સાથે સતત કોન્ટેક્ટમાં રાખ્યા. જે બાદ ટેક્નિકલ સર્વેલન્સના આધારે લખનઉ હાઇવે પર ટોલનાકા પાસે 4 આરોપી શખ્સોને ઝડપી લીધા અને 48 કલાક જેટલા સમયમાં બાળકીને છોડાવી લીધી.

ઘટનાનો મુખ્ય આરોપી સમીર પઠાન પોલીસના સકંજામાં છે. તો, ગુનામાં સામેલ મોહિત સેવક, પ્રદીપ ચૌધરી અને અભિષેક ચૌધરીને પણ ઝડપડ્યા.

ઘટનાની તપાસમાં એવો ખુલાસો થયો કે, પહેલા બાળકીને દાહોદથી રાજસ્થાન લઇ જવાઇ હતી. જો કે રાજસ્થાન પોલીસ સાથે મળીને પણ તપાસ કરી. પરંતુ શખ્સો બાળકીને દિલ્હી લઇ ગયા અને નીલવિહાર ઝૂંપડપટ્ટીમાં રાખી હતી. જે બાદ દિલ્હીની સ્પેશિયલ ટીમે પણ તપાસ કરી. પરંતુ શખ્સો ત્યાંથી પણ ફરાર થઇ ગયા અને ઉત્તર પ્રદેશ જતા હતા.

આ પણ વાંચો : નવસારી પોલીસે કર્યુ એ કામ કે તમે પણ કરી ઉઠશો સલામ, જુઓ વીડિયો

ત્યારે યુપીની STF સાથે મળીને ગુજરાત પોલીસે આરોપીને લખનઉમાંથી ઝડપી લીધા. હવે, પોલીસે તમામ આરોપી સામે કાર્યવાહી હાથ ધરી છે. મહત્વનું છે, ગુજરાત, રાજસ્થાન, દિલ્હી અને યુપી પોલીસના 50થી વધુ કર્મચારીઓએ બાળકીને બચાવી. આધુનિક જમાનામાં બાળકો સોશિયલ મીડિયા વાપરે છે. પરંતુ તે ક્યાંય મુશ્કેલીનો ફંદો ન બની જાય તે ધ્યાન રાખવું જરૂરી છે.

(ઈનપુટ ક્રેડિટ – નિલેશ ગામીત, નવસારી)