ડિસ્કો-દાંડિયાના આધુનિક જમાના વચ્ચે જૂનાગઢમાં (Junagadh) પ્રાચીન ગરબીઓની (Traditional Garba )બોલબોલા છે ખાસ કરીને વણઝારી ચોકની ગરબીની પરંપરા સચવાયેલી છે. આ પ્રાચીન ગરબીઓએ અનેક કલાકારોને સ્ટેજ આપ્યું છે તથા અનેક નામાંકિત કલાકારો આ પ્રાચીન ગરબીઓના ભાગ બની ચૂક્યા છે. નવાબી કાળથી ચાલતી વણઝારી ચોકની ગરબીએ (Garbi) પ્રાચીન સંસ્કૃતિનો વારસો સતત જાળવી રાખ્યો છે. અહીં સળગતી ઈંઢોણીનો રાસ, ભૂવા રાસ, ટીપણી રાસ, સાડી રાસ, વીછુડાનો રાસ આ પ્રાચીન ગરબીની આગવી ઓળખ છે.
આ રાસ દીકરીઓ ખુબજ શ્રદ્ધા અને ઉમંગથી રમે છે. ભૂવા રાસ અને સળગતી ઈંઢોણીનો રાસ રમતી દીકરીઓ સતત અડધો કલાકથી વધુ સમય સુધી બંને હાથોમાં સળગતી મસાલ અને માથે સળગતી હિંડોણી લઈ માની આરાધના કરે છે. રાસ રમતી અને માની આરાધના કરતી આ દીકરીઓ ખરેખર જોનારાઓને અચંબિત કરી મૂકે છે. નવાબી કાળથી ચાલતી આ પ્રાચીન ગરબીનો વારસો જાળવવા આયોજકો નવરાત્રિના એક માસ અગાઉથી કામે લાગી જાય છે.
આ રાસમાં ભાગ લેતી દીકરીઓની પસંદગી કરીને તેમને ખાસ તાલીમ પણ આપવામાં આવે છે.આ ગરબીમાં રમતી દીકરીઓ પાસેથી એક પણ રૂપિયાની ફી લેવાતી નથી ગરબે રમતી દીકરીઓના ટ્રેડિશનલ ડ્રેસ પણ આયોજકો તરફથી નિશુલ્ક આપવામાં આવે છે તથા અવનવી લાણીઓ પણ રાસ રમતી દીકરીઓને આપવામાં આવે છે.નવાબની મંજૂરીથી શરૂ થયેલી ગરબીમાં મુસ્લિમ બાળકીઓ પણ ખુબજ ઉત્સાહથી ભાગ લે છે. વણઝારી ચોકની આ પ્રાચીન ગરબીની દૈનિક 15થી 20 હજાર લોકો અચૂક મુલાકાત લે છે.
Published On - 1:58 pm, Fri, 30 September 22