ગાંધીનગર મનપાની ચૂંટણીમાં કરેલા ખર્ચ મુદ્દે વિવાદ, વિપક્ષે શાસક પર ઉઠાવ્યા સવાલ

ગાંધીનગર (Gandhinagar) મહાનગરપાલિકાની ચૂંટણી (Municipal Election) દરમિયાન ભાજપના 44માંથી 41 ઉમેદવારોના ચૂંટણી ખર્ચનો (Election Expenditure) મુદ્દો ફરી એકવાર ગરમાયો છે. આ મુદ્દે ગાંધીનગર મનપાના વિરોધ પક્ષના નેતા અને અન્ય ફરિયાદીએ ફરી એકવાર પુરાવા કલેક્ટર સમક્ષ રજૂ કર્યા છે અને કાયદાકીય પગલાં લેવા માગણી કરી છે. આ સમગ્ર મુદ્દે કલેક્ટરે (Collector) 23મી જૂને હિયરિંગ મોટે બોલાવ્યા છે.

ખર્ચની વિગતો મુદ્દે વિરોધપક્ષે વાંધો ઉઠાવ્યો

ગાંધીનગર મહાનગરપાલિકાની ચૂંટણી દરમિયાન ભારતીય જનતા પાર્ટીના 41 ઉમેદવારોએ આપેલી ખર્ચની વિગતો મુદ્દે વિરોધપક્ષે વાંધો ઉઠાવ્યો છે. ચૂંટણી બાદ આ સમગ્ર મુદ્દે ફરિયાદીએ ચૂંટણીપંચનું ધ્યાન દોર્યું હતું. ફરિયાદીનું કહેવું છે કે, 41 ભારતીય જનતા પાર્ટીના ઉમેદવારોનો ચૂંટણી ખર્ચ એક સરખો જ કેવી રીતે હોઈ શકે ? મહત્વનું છે કે, ભાજપના 45માંથી 41 ઉમેદવારોએ ચૂંટણીનો ખર્ચ 1,33,380 રૂપિયા દર્શાવ્યો હતો.