Breaking News : ડ્રગ્સ-હવાલા નેટવર્ક સામે EDની મોટી કાર્યવાહી, ગુજરાતમાં અનેક સ્થળોએ રેડ, જુઓ Video
એન્ફોર્સમેન્ટ ડિરેક્ટોરેટ (ED) દ્વારા 21 સ્થળોએ દરોડા પાડી ₹1.33 કરોડ રોકડ, વિદેશી ચલણ, સોનું અને બેંક ખાતામાં રહેલી રકમ જપ્ત કરવામાં આવી છે. અમદાવાદ, મુંબઈ, સુરત, અંકલેશ્વર સહિતના વિસ્તારોમાં થયેલી આ કાર્યવાહીમાં સલીમ ઇસ્માઇલ ડોલા અને તેના સાથીદારો તપાસના કેન્દ્રમાં છે. ED આંતરરાષ્ટ્રીય ડ્રગ્સ નેટવર્ક અને હવાલા કૌભાંડની તપાસ કરી રહી છે.
એન્ફોર્સમેન્ટ ડિરેક્ટોરેટ (ED) દ્વારા ગુજરાત સહિત દેશના વિવિધ શહેરોમાં મોટા પાયે દરોડાની કાર્યવાહી કરવામાં આવી છે. EDની ટીમોએ અમદાવાદ, સુરત, અંકલેશ્વર અને મુંબઈ સહિત કુલ 21 સ્થળોએ એકસાથે દરોડા પાડ્યા હતા. આ કાર્યવાહી દરમિયાન ₹1.33 કરોડથી વધુ રોકડ રકમ, વિદેશી ચલણ, સોનું અને બેંક ખાતાઓમાં રહેલી મોટી રકમ અંગેની માહિતી મળી આવી છે.
EDની મોટા પાયે દરોડાની કાર્યવાહી
EDની તપાસનો કેન્દ્રબિંદુ સલીમ ઇસ્માઇલ ડોલા અને તેના સાથીદારો છે. તપાસ એજન્સીનો આરોપ છે કે આ લોકો ડ્રગ્સના ગેરકાયદેસર ધંધા અને હવાલા મારફતે થતા નાણાકીય વ્યવહારો સાથે સંકળાયેલા હોઈ શકે. આ મામલે કેમિકલ સપ્લાયર્સ, હવાલા ઓપરેટરો અને બેનામી મિલકતો ધરાવતા લોકોની પણ તપાસ કરવામાં આવી રહી છે.
વિદેશી ચલણ પણ જપ્ત
દરોડા દરમિયાન લગભગ 2200 અમેરિકન ડોલર સહિતનું વિદેશી ચલણ પણ જપ્ત કરવામાં આવ્યું છે. ઉપરાંત તપાસકર્તાઓને ભારત અને દુબઈમાં આવેલી કરોડો રૂપિયાની મિલકતો સંબંધિત મહત્વના દસ્તાવેજો પણ મળ્યા છે. આ દસ્તાવેજોના આધારે ED હવે ગેરકાયદેસર રીતે કમાયેલી રકમ ક્યાં અને કેવી રીતે રોકાણ કરવામાં આવી હતી તેની તપાસ કરી રહી છે.
આંતરરાષ્ટ્રીય ડ્રગ્સ નેટવર્ક પર્દાફાશ
સૂત્રોના જણાવ્યા મુજબ, આ સમગ્ર મામલો આંતરરાષ્ટ્રીય ડ્રગ્સ નેટવર્ક અને હવાલા દ્વારા થતી મની લોન્ડરિંગ પ્રવૃત્તિઓ સાથે જોડાયેલો હોઈ શકે છે. ED હાલ તમામ નાણાકીય વ્યવહારો અને મિલકતોની વિગતવાર તપાસ કરી રહી છે.
આ કાર્યવાહીનો મુખ્ય હેતુ ડ્રગ્સના ગેરકાયદેસર વેપાર અને તેનાથી મળતી ગુનાહિત આવક પર કાબૂ મેળવવાનો છે. આગામી દિવસોમાં તપાસમાં વધુ મોટા ખુલાસા થવાની શક્યતા પણ વ્યક્ત કરવામાં આવી રહી છે.
ચટાકેદાર પકોડી માત્ર જીભનો સ્વાદ નહીં, પેટની તકલીફો પણ કરશે દૂર! જાણો તેના ફાયદા આ સ્ટોરી વાંચવા અહીં ક્લિક કરો
