Breaking News: PM Modi ની અપીલનો અસરકારક પ્રભાવ, અમદાવાદની IT કંપનીઓનો 50%થી વધુ સ્ટાફ હવે Work From Home
અમદાવાદની અનેક IT કંપનીઓએ ફરી Work From Home મોડલ અપનાવવાનું શરૂ કર્યું છે. વડાપ્રધાન મોદીની અપીલ અને હાલની પરિસ્થિતિને ધ્યાનમાં રાખીને કર્મચારીઓની સુરક્ષા સાથે ખર્ચ બચતને પણ પ્રાથમિકતા આપવામાં આવી રહી છે.
અમદાવાદમાં ફરી એકવાર વર્ક ફ્રોમ હોમ ટ્રેન્ડને વેગ મળતો જોવા મળી રહ્યો છે. વડાપ્રધાન નરેન્દ્ર મોદીની અપીલ બાદ શહેરની અનેક IT કંપનીઓએ કર્મચારીઓ માટે ઘરેથી કામ કરવાની વ્યવસ્થા વધારી છે. ખાસ કરીને હાલની વૈશ્વિક અને સુરક્ષા સંબંધિત પરિસ્થિતિને ધ્યાનમાં રાખીને કંપનીઓ ફરીથી હાઈબ્રિડ અને વર્ક ફ્રોમ હોમ મોડલ તરફ વળી રહી છે.
અમદાવાદમાં વધ્યો WFH ક્રેઝ
અમદાવાદની જાણીતી એક IT કંપનીએ પોતાના 50 ટકાથી વધુ કર્મચારીઓને વર્ક ફ્રોમ હોમની સુવિધા આપી છે. કંપનીનું માનવું છે કે આ નિર્ણય કર્મચારીઓની સુરક્ષા અને કાર્યક્ષમતાને ધ્યાનમાં રાખીને લેવામાં આવ્યો છે. કંપનીના અધિકારીઓ અનુસાર, કર્મચારીઓ ઘરેથી પણ સરળતાથી કામ કરી શકે છે અને ડિજિટલ ટેક્નોલોજીના કારણે ઓફિસ જેવી જ પ્રોડક્ટિવિટી જાળવી શકાય છે.
IT કંપની આપી રહી છે WFHને પ્રોત્સાહન
કોવિડ મહામારી દરમિયાન વર્ક ફ્રોમ હોમ મોડલ ખૂબ જ લોકપ્રિય બન્યું હતું. તે સમયે લગભગ તમામ IT કંપનીઓએ ઘરેથી કામ કરવાની વ્યવસ્થા અપનાવી હતી. જોકે, છેલ્લા દોઢેક વર્ષથી ઓફિસ વર્કને ફરી પ્રાથમિકતા આપવામાં આવી રહી હતી અને કર્મચારીઓને ઓફિસ પરત બોલાવવામાં આવ્યા હતા. પરંતુ હવે બદલાતી પરિસ્થિતિઓને કારણે કંપનીઓ ફરીથી વર્ક ફ્રોમ હોમ મોડલ અપનાવી રહી છે.
કર્મચારીઓ માટે આ મોડેલ છે લાભદાયી
કર્મચારીઓ માટે પણ આ મોડલ અનેક રીતે લાભદાયી સાબિત થઈ રહ્યું છે. રોજિંદા ટ્રાફિકની સમસ્યામાંથી રાહત મળે છે તેમજ ઇંધણના ખર્ચમાં ઘટાડો થાય છે. સાથે જ ઓફિસમાં વીજળી અને અન્ય સંચાલન ખર્ચમાં પણ બચત થઈ શકે છે. ઘણા કર્મચારીઓએ જણાવ્યું કે ઘરેથી કામ કરવાથી સમય બચી રહ્યો છે અને પરિવાર સાથે વધુ સમય વિતાવવાનો મોકો મળે છે.
શું માને છે નિષ્ણાંતો?
IT ક્ષેત્રના નિષ્ણાતો માને છે કે આવનારા સમયમાં હાઇબ્રિડ વર્ક કલ્ચર વધુ મજબૂત બનશે. કેટલીક કંપનીઓ સંપૂર્ણ ઓફિસ મોડલ કરતાં લવચીક કાર્ય પદ્ધતિને વધુ મહત્વ આપી રહી છે. ટેક્નોલોજીના વધતા ઉપયોગને કારણે હવે કર્મચારીઓ કોઈપણ સ્થળેથી સરળતાથી કામ કરી શકે છે.
અમદાવાદમાં Work From Homeની ફરી વધતી પ્રવૃત્તિએ સ્પષ્ટ કર્યું છે કે IT સેક્ટર હવે બદલાતી પરિસ્થિતિઓ પ્રમાણે ઝડપી નિર્ણય લેવા તૈયાર છે. કર્મચારીઓની સુરક્ષા, ખર્ચમાં બચત અને કાર્યક્ષમતાને ધ્યાનમાં રાખીને કંપનીઓ નવી કાર્ય સંસ્કૃતિ અપનાવી રહી છે.
