Sushant Singh Rajput નાં મોતનાં એક વર્ષ બાદ વાયરલ થઈ રહી છે તેની યાદો, જાણો સિરિયલથી લઈ ફિલ્મો સુધીની સફર

બોલિવૂડનાં દિવંગત અભિનેતા સુશાંત સિંહ રાજપૂત એક બહુમુખી અભિનેતા રહ્યા છે. તેમના મૃત્યુને એક વર્ષ થવા જઈ રહ્યું છે. આ એક વર્ષમાં, તેમના કુટુંબ અથવા તેમના ચાહકો તેમને ભૂલી શક્યા નથી. સુશાંતના મૃત્યુના સમાચારથી તેમના પરિવાર અને ચાહકો તેમજ ઉદ્યોગ પણ હચમચી ઉઠ્યું હતું. સુશાંતને યાદ કરીને તેમના પરિવારજનો, મિત્રો અને ચાહકો તેમની સાથે સંબંધિત ચિત્રો અને વીડિયો શેર કરતા જોવા મળે છે.

દરમિયાન, હવે સુશાંતનો એક થ્રોબેક વીડિયો ઇન્ટરનેટ પર વાયરલ થઈ રહ્યો છે. આ વીડિયોમાં સુશાંત સીઆઈડીના એક એપિસોડમાં જોવા મળી રહ્યા છે. વીડિયો જોઈને ફરી એકવખત બધાએ તેમના અભિનયને મજબુત માન્યો.

જેમ કે બધા જાણે છે કે સુશાંત સિંહ રાજપૂતે તેમની કારકિર્દીની શરૂઆત નાના પડદાથી કરી હતી. તેમણે હિટ ટીવી સીરિયલ ‘પવિત્ર રિશ્તા’ માં કામ કર્યું હતું. આ સીરિયલમાં તે અભિનેત્રી અંકિતા લોખંડે સાથે જોવા મળ્યા હતા. આ શોમાં સુશાંત ‘માનવ’ તરીકે છે.

તેમણે લોકોના દિલ ઉપર એક અલગ છાપ છોડી દીધી હતી. આ શોની સાથે જ તેમને ઘરે ઘરે ઓળખ મળી હતી. આ પછી, તેમણે ટીવી છોડી દીધું અને બોલિવૂડ તરફ વળ્યા અને વર્ષ 2013 માં ફિલ્મ ‘કાઇ પો છે!’ થી તેમણે બોલિવૂડમાં ડેબ્યૂ કર્યું હતું. પરંતુ ફરી એકવાર તે ટીવી પર પાછા ફર્યા હતા, CID ના ખાસ એપિસોડમાં ડિટેક્ટીવ બનીને. આ સાથે જ, આ દિવસોમાં સીઆઈડીનો આ એપિસોડ ફરી એકવાર વાયરલ થતો જોવા મળી રહ્યો છે.

આપને જણાવી દઈએ કે વર્ષ 2015 માં સોની ટીવી પર પ્રસારિત થનારો સીઆઈડીની વિશેષ એપિસોડમાં તેઓ દેખાયા હતા. ખરેખર, તેઓ આ શો પર પોતાની ફિલ્મ ‘વ્યોમકેશ બક્ષી’ના પ્રમોશન માટે આવ્યા હતા. સુશાંત CID ના આ એપિસોડમાં, એસીપી પ્રદ્યુમ્ન, દયા, જીત સાથે મુંબઇ અને કોલકાતામાં થતી હત્યાઓના કેસોનું નિરાકરણ કરતા જોવા મળ્યા હતા. અભિનેતાનો આ વીડિયો ચાહકોને ખૂબ જ પસંદ છે.

સુશાંત સિંહ રાજપૂતની વર્કફ્રન્ટ વિશે વાત કરીએ તો તેમણે વર્ષ 2013 માં ફિલ્મ ‘કાઇ પો છે!’ થી તેમણે બોલિવૂડમાં ડેબ્યૂ કર્યું હતું. આ ફિલ્મમાં સુશાંતના અભિનયની ખૂબ પ્રશંસા થઈ હતી. ‘કાઇ પો છે!’ (Kai Po Che!) પછી તેમણે ‘શુદ્ધ દેશી રોમાંસ’ (Shuddh Desi Romance), ‘પીકે’ (PK), ‘એમએસ ધોની: ધ અનટોલ્ડ સ્ટોરી’ (M.S. Dhoni: The Untold Story), ‘કેદારનાથ’ (Kedarnath) અને ‘છીછોરે’ (Chhichhore) જેવી મોટી ફિલ્મો કરી હતી.

તે જ સમયે, તેમની આગામી ફિલ્મ ‘દિલ બેચારા’ (Dil Bechara) 24 જુલાઈએ ઓટીટી પ્લેટફોર્મ પર રિલીઝ થઈ છે. ડિઝની હોટસ્ટાર પર રિલીઝ થયેલી તેમની ફિલ્મે બોક્સ ઓફિસ પર સારું પ્રદર્શન કર્યું હતું.