BAPS મંદિરના ઉદ્ઘાટન પ્રસંગે પહોંચ્યા ‘જેઠાલાલ’, કહ્યું- આ ભગવાનનો ચમત્કાર છે, જુઓ વીડિયો

વડાપ્રધાન નરેન્દ્ર મોદીએ સંયુક્ત આરબ અમીરાત (UAE)ના અબુ ધાબીમાં BAPSના પ્રથમ હિન્દુ મંદિરનું ઉદ્ઘાટન કર્યું છે. 27 એકરમાં બનેલા આ સુંદર મંદિર માટે લગભગ 7000 કરોડ રૂપિયાનો ખર્ચ કરવામાં આવ્યો છે. આ ઉદ્ઘાટન સમારોહમાં દેશના ઘણા પ્રખ્યાત ચહેરાઓએ ભાગ લીધો હતો.

તારક મહેતા કા ઉલ્ટા ચશ્મા ફેમ દિલીપ જોશી એટલે કે જેઠાલાલ પણ અબુ ધાબીમાં આયોજિત ભવ્ય ઉદઘાટન સમારોહનો ભાગ બન્યા હતા. આ ખાસ પ્રસંગે તેમણે મંદિરના નિર્માણ માટે પરવાનગી આપવા બદલ દુબઈના શાસક (દુબઈના રાજા)ની પ્રશંસા કરી.

દિલીપ જોશીએ કર્યા વખાણ

ANI સાથે વાત કરતાં દિલીપ જોશીએ શેર કર્યું કે, “આજે આ મંદિર જોયા પછી પણ વિશ્વાસ કરવો મુશ્કેલ છે કે આ જગ્યાએ આટલું સુંદર BAPS મંદિર બનાવવામાં આવ્યું છે. જ્યારે આપણા વડાપ્રધાન નરેન્દ્ર મોદીએ આ મંદિરનો શિલાન્યાસ કર્યો ત્યારે હું પણ અહીં હાજર હતો. હું ચોક્કસપણે કહેવા માંગુ છું કે દુબઈના શાસક (રાજા) ખૂબ જ દયાળુ છે. તેમણે આ મંદિરના નિર્માણ માટે માત્ર મંજુરી જ નથી આપી પરંતુ એક સારી જગ્યા પણ આપી હતી. આ ખરેખર ભગવાનનો ચમત્કાર છે.”

ઉદ્ઘાટનમાં અનેક મોટા ચહેરાઓએ હાજરી આપી

દિલીપ જોશીએ વધુમાં કહ્યું કે, “મારી પ્રાર્થના છે કે આ મંદિરમાંથી સૌહાર્દનો સંદેશ આખી દુનિયામાં ફેલાય.” 14 ફેબ્રુઆરી 2024 બુધવારના રોજ અબુ ધાબીમાં આયોજિત કાર્યક્રમમાં માત્ર દિલીપ જોશી જ નહીં, અભિનેતા અક્ષય કુમારથી લઈને વિવેક ઓબેરોય અને ગાયક-સંગીતકાર શંકર મહાદેવન સુધીની ઘણી બોલીવુડ હસ્તીઓ હાજર રહી હતી. બોચાસણવાસી અક્ષર પુરુષોત્તમ સ્વામિનારાયણ સંસ્થા (BAPS) દ્વારા આ પ્રથમ હિન્દુ મંદિર અબુધાબીમાં બનાવવામાં આવ્યું છે.

ભવિષ્યમાં હજારો પ્રવાસીઓ આવશે

આ મંદિરના ઉદ્ઘાટન પ્રસંગે વડાપ્રધાન નરેન્દ્ર મોદીએ કહ્યું કે, આ મંદિર વિશ્વ માટે એકતા અને સંવાદિતાનું પ્રતિક બની રહેશે. તેમણે આ મંદિરના નિર્માણમાં UAE સરકારની ભૂમિકાની પણ પ્રશંસા કરી હતી. આ દરમિયાન પીએમ મોદીએ વિશ્વાસ વ્યક્ત કર્યો કે, આવનારા ભવિષ્યમાં હજારો યાત્રીઓ આ મંદિરને જોવા માટે અબુ ધાબી આવશે.