સલમાનના બીગબોસમાં શાહરુખની એન્ટ્રી !, પઠાણ ફિલ્મનું કરશે પ્રમોશન

શાહરૂખ ખાન અને દીપિકા પાદુકોણની ફિલ્મ પઠાણ 25 જાન્યુઆરીએ સિનેમાઘરોમાં રિલીઝ થવા જઈ રહી છે. ત્યારે  આવતીકાલે એટલે કે 10 જાન્યુઆરીએ ફિલ્મનું ટ્રેલર રિલીઝ થશે. આ ફિલ્મને લઈને ચારો તરફ ચર્ચા છે, પરંતુ અત્યાર સુધી ફિલ્મના કોઈ પણ સ્ટાર તેનું પ્રમોશન કરતા નજરે પડ્યા નથી. કલાકારો અને નિર્માતાઓ સોશિયલ મીડિયાના માધ્યમથી જ ફિલ્મનું પ્રમોશન કરી રહ્યા છે. જો કે, હવે એવા સમાચાર છે કે શાહરૂખ ખાન સલમાન ખાનના શો બિગ બોસ સીઝન 16 થી પઠાણનું પ્રમોશન શરૂ કરી શકે છે.

મળતી માહિતી મુજબ, શાહરૂખ ખાન સલમાનના શો બિગ બોસમાં પઠાણને પ્રમોટ કરતો જોવા મળશે. આ શો 19 જાન્યુઆરીએ ટેલિકાસ્ટ થશે. હવે જ્યારે બંને ખાન સાથે જોવા મળશે ત્યારે શોની મજા બમણી થઈ જશે. ઉલ્લેખનીય છે કે, શાહરૂખ ખાન પણ પોતાની ફિલ્મ દિલવાલેના પ્રમોશન માટે સલમાનના આ રિયાલિટી શોમાં ગયો હતો. એટલું જ નહીં, દીપિકા પાદુકોણે બિગ બોસમાં ‘X X X: Xander Cage’નું પ્રમોશન પણ કર્યું છે.

વિવાદો વચ્ચે આવતીકાલે ટ્રેલર રીલિઝ

દેશના ઘણા ભાગોમાં પઠાણને લઈને હોબાળો ચાલી રહ્યો છે. આ ફિલ્મના વિરોધમાં અનેક સંસ્થાઓ સામે આવી છે. સોશિયલ મીડિયા પ્લેટફોર્મ ટ્વીટર પર પણ ફિલ્મ સામે બહિષ્કારનો ટ્રેન્ડ ચાલી રહ્યો છે. આ સમગ્ર વિવાદની શરૂઆત ફિલ્મના પ્રથમ ગીત બેશરમ રંગની રિલીઝ સાથે થઈ હતી. આ ગીતમાં દીપિકાએ પહેરેલી બિકીનીનો રંગ કેસરી છે અને તેનાથી હિંદુઓની ભાવનાઓને ઠેસ પહોંચી હોવાનો આક્ષેપ કરવામાં આવ્યો હતો. આ સીન હટાવવાની માંગ હવે ફિલ્મના બહિષ્કાર સુધી પહોંચી ગઈ છે.

સલમાનને પણ પઠાણમાં કર્યો છે કેમિયો

બિગ બોસમાં પ્રમોશનનું એક કારણ એ પણ માનવામાં આવી રહ્યું છે કે સલમાન ખાન પણ પઠાણમાં નજર આવવાનો છે. શાહરૂખની ફિલ્મમાં સલમાને કેમિયો કર્યો છે. આવી સ્થિતિમાં, બંને સ્ટાર્સને એક જ પ્લેટફોર્મ પર એકસાથે જોવું એ ફિલ્મ માટે નફાકારક સોદો સાબિત થઈ શકે છે. તમને જણાવી દઈએ કે યશ રાજ બેનર હેઠળ બનેલી આ ફિલ્મનું નિર્દેશન સિદ્ધાર્થ મલ્હોત્રાએ કર્યું છે.

ચાર વર્ષથી વધુ સમય બાદ શાહરુખની મોટા પડદે એન્ટ્રી

શાહરૂખ ખાનના ફેન્સ ઘણા સમયથી પઠાનના ટ્રેલરની રાહ જોઈ રહ્યા હતા. હવે રાહ જોવાનો સમય પૂરો થવાનો છે. શાહરૂખ ખાન ચાર વર્ષથી વધુ સમય બાદ પઠાન સાથે મોટા પડદા પર વાપસી કરવા જઈ રહ્યો છે. તેની છેલ્લી ફિલ્મ ઝીરો હતી જે બોક્સ ઓફિસ પર કંઈ ખાસ કમાલ કરી શકી ન હતી. હવે મેકર્સની સાથે શાહરૂખ ખાનને પણ પઠાન પાસેથી ઘણી આશાઓ છે. આ ફિલ્મના ઘણા પોસ્ટર અને બે ગીતો રિલીઝ થઈ ચૂક્યા છે.