Breaking News: રેપર બાદશાહની મુશ્કેલીમાં વધારો! ‘ટટીરી’ ગીત બદલ લોરેન્સ બિશ્નોઈ ગેંગે આપી જાનથી મારવાની ધમકી

બોલિવૂડના પ્રખ્યાત સિંગર અને રેપર બાદશાહની મુશ્કેલીઓ ‘ટટીરી’ ગીતને કારણે ઓછી થવાનું નામ નથી લઈ રહી. સોશિયલ મીડિયા પર માફી માંગ્યા બાદ પણ બાદશાહ વિવાદોમાં ઘેરાયેલો છે.

એક તરફ હરિયાણા પોલીસને તેની ધરપકડના આદેશ મળી ચૂક્યા છે, તો બીજી તરફ હવે લોરેન્સ બિશ્નોઈ ગેંગે તેને જાનથી મારી નાખવાની ધમકી આપી છે. ‘ટટીરી’ ગીતને લઈને વધી રહેલા વિવાદ વચ્ચે એક નવા અપડેટ સામે આવ્યા છે. જાણકારી અનુસાર, પાણીપતમાં થયેલા એક ફાયરિંગના કેસની જવાબદારી લેતા બિશ્નોઈ ગેંગે તેના માટે એક નોટ શેર કરી છે.

બિશ્નોઈ ગેંગે આપી ‘ધમકી’

બિશ્નોઈ ગેંગે બાદશાહ માટે જાહેર કરેલી નોટમાં લખ્યું છે કે, ‘જય મહાકાલ, જય શ્રીરામ, રામ-રામ તમામ ભાઈઓને. આજે અસંધ રોડ, પાણીપતમાં વેસ્ટર્ન યુનિયન (હવાલા કારોબાર) સાથે જોડાયેલા ગેરી અને શેંકીની ઓફિસ પર જે ફાયરિંગ થયું છે, તેની જવાબદારી હું રનદીપ મલિક અને અનિલ પંડિત (USA) લઈ રહ્યા છીએ. આ લોકો હવાલા દ્વારા દેશના પૈસા વિદેશ મોકલીને દેશના અર્થતંત્રને નુકસાન પહોંચાડી રહ્યા હતા. અમે તેમને પહેલા ફોન કરીને ચેતવણી પણ આપી હતી પરંતુ તેમને સમજાયું નહીં. આજની ઘટના માત્ર એક ટ્રેલર છે, પિક્ચર હજી બાકી છે. વધુમાં જે પણ લોકો હવાલાનું કામ કરે છે, તેઓ સમય રહેતા સુધરી જાય નહીંતર તેમનું અંજામ ખૂબ જ ખરાબ આવશે.’

આ જ નોટમાં આગળ બાદશાહને ધમકી આપતા લખ્યું છે કે, ‘સિંગર બાદશાહ, તેં હરિયાણાની સંસ્કૃતિને બગાડવાનો પ્રયાસ કર્યો છે. વર્ષ 2024માં તારા ક્લબમાં તને ટ્રેલર બતાવ્યું હતું. હવે પછી સીધી તારા માથામાં ગોળી મારીશું.’ આ નોટ લોરેન્સ બિશ્નોઈ ગેંગના નામે લખવામાં આવી હતી.

‘ટટીરી’ વિવાદ મામલે માહોલ ગરમાયું

જણાવી દઈએ કે, હાલમાં જ મહિલા આયોગના ચેરપર્સન રેણુ ભાટિયાએ પણ બાદશાહને ખુલ્લા શબ્દોમાં ચેતવણી આપી હતી અને કહ્યું હતું કે, હવે મહિલા આયોગ હરિયાણાની દીકરીઓની સુરક્ષા માટે ઊભું થઈ ગયું છે. ‘ટટીરી’ વિવાદ મામલે રેણુ ભાટિયાએ રેપર સિંગર બાદશાહની ધરપકડ કરવાની માંગ કરી છે. આ સાથે જ તેમના શો પર પ્રતિબંધ મૂકવા અને તેમનો પાસપોર્ટ જપ્ત કરવાની પણ વિનંતી કરી છે.

આ પણ વાંચો: વીકએન્ડને રસપ્રદ બનાવવા OTT પર કઈ ફિલ્મો અને વેબ સિરીઝ જોઈ શકો છો જાણો