Birthday Special :રાહુલ રોય છે બિગ બોસનો પહેલો વિનર, જાણો ક્યાં ગાયબ છે, ફિલ્મ આશિકીથી ફેમસ થયો હતો આ એક્ટર
નવેમ્બર 2020માં કારગીલમાં તેની વેબ ફિલ્મ 'LAC: લિવ ધ બેટલ'ના શૂટિંગ દરમિયાન રાહુલ (Rahul Roy)ને બ્રેઈન સ્ટ્રોક આવ્યો હતો. આ કારણે 52 વર્ષીય અભિનેતાને બોલવામાં તકલીફ થાય છે.
Birthday Special : એક સમયે ‘બોલીવુડના સુપરસ્ટાર’ કહેવાતા અભિનેતા રાહુલ રોય (Rahul Roy)નો જન્મ 9 ફેબ્રુઆરી, 1968ના રોજ મુંબઈમાં થયો હતો. આજે તેમનો જન્મદિવસ છે. બોલિવૂડમાં નસીબ અજમાવતા પહેલા તેણે હિમાચલ પ્રદેશના સનાવરમાં આવેલી લોરેન્સ સ્કૂલમાં અભ્યાસ પૂર્ણ કર્યો. રાહુલે મહેશ ભટ્ટ (Mahesh Bhatt) ની આશિકી (Aashiqui)થી બોલિવૂડમાં પ્રવેશ કર્યો હતો, જે બ્લોકબસ્ટર હિટ રહી હતી.
ઓછા બજેટમાં બનેલી આ ફિલ્મે બોક્સ ઓફિસ પર ઘણા રેકોર્ડ તોડ્યા અને ઘણી કમાણી કરી અને રાહુલ રોય રાતોરાત સુપરસ્ટાર બની ગયો. આ ફિલ્મના તેના ડાયલોગ્સ, ગીતો લોકોને ખૂબ પસંદ આવ્યા હતા.
મોટા પ્રોડક્શન હાઉસ રાહુલ રોય સાથે કામ કરવા ઈચ્છતા હતા
‘આશિકી'(Aashiqui)ની સફળતા બાદ બોલિવૂડના લગભગ તમામ મોટા પ્રોડક્શન હાઉસ રાહુલ રોય સાથે કામ કરવા ઈચ્છતા હતા. તેણે ઘણી ફિલ્મો સાઈન પણ કરી, પરંતુ કમનસીબે, તેમાંથી ઘણી બોક્સ ઓફિસ પર ફ્લોપ ગઈ.
એક ફિલ્મ હિટ થયા પછી તેના નસીબે રાહુલ રોયને જાણે છોડી દીધો. તેણે ફિલ્મ ‘દિલ કા રિશ્તા’ પણ સાઈન કરી હતી પરંતુ નિર્માતાના આકસ્મિક અવસાનને કારણે તેની ફિલ્મ ક્યારેય પૂર્ણ થઈ શકી ન હતી. તેમની અન્ય ઘણી ફિલ્મો જેમ કે ‘પ્રેમભિષેક’, ‘તુને મેરા દિલ લે લિયા’, ‘વજ્ર’ અને ‘જબ દિલ મિલે’ પણ વિવિધ કારણોસર રિલીઝ થઈ શકી નથી.
બ્રેઈન સ્ટ્રોકના કારણે હોસ્પિટલમાં દાખલ કરવામાં આવ્યા હતા
રાહુલ ઘણા ટીવી શોમાં પણ જોવા મળ્યો છે. તેણે 1998ના સોપ ઓપેરા ‘કૈસે કહું’ અને ‘કરિશ્મા – ધ મિરેકલ ઓફ ડેસ્ટિની’માં અભિનય કર્યો હતો. 2006માં શરૂ થયેલી બિગ બોસની (Bigg Boss Season 1) પ્રથમ સિઝન પણ રાહુલ રોયે જીતી હતી, પરંતુ આ જીત પણ તેની કારકિર્દી આગળ વધારી શકી ન હતી. 52 વર્ષની ઉંમરે રાહુલને બ્રેઈન સ્ટ્રોક આવ્યો હતો, જેના પછી તે બરાબર બોલી શકતા નથી. રાહુલને માર્ચ 2021માં હોસ્પિટલમાંથી રજા આપવામાં આવી હતી અને તે ધીમે ધીમે સ્વસ્થ થઈ રહ્યો છે.
