Education : IIT મદ્રાસ બનશે વૈશ્વિક યુનિવર્સિટી, આફ્રિકાથી એશિયા સુધી ખોલવામાં આવશે કેમ્પસ, આ દેશોએ તેમની કોલેજો ખોલવા કરી વિનંતી
IIT મદ્રાસના (IIT madras) ડાયરેક્ટર પ્રોફેસર વી કામકોટીએ જણાવ્યું કે, તાન્ઝાનિયા અને અન્ય આફ્રિકન દેશો ઉપરાંત IIT મદ્રાસને શ્રીલંકા અને નેપાળ તરફથી પણ કેમ્પસ ખોલવા માટે વિનંતીઓ મળી છે.
ઈન્ડિયન ઈન્સ્ટિટ્યૂટ ઓફ ટેક્નોલોજી (IIT) મદ્રાસને વૈશ્વિક યુનિવર્સિટી (Global University) બનાવવાની તૈયારીઓ થઈ રહી છે. સરકાર આફ્રિકન દેશ તાન્ઝાનિયામાં IIT મદ્રાસનું કેમ્પસ ખોલવાનું વિચારી રહી છે. સરકાર વિશ્વના નકશા પર દેશની અગ્રણી એન્જિનિયરિંગ સંસ્થાની સ્થાપના કરવા માંગે છે. આ બાબતથી વાકેફ અધિકારીઓના જણાવ્યા અનુસાર, IIT કાઉન્સિલની સ્થાયી સમિતિના અધ્યક્ષ ડૉ. કે. રાધાકૃષ્ણનની અધ્યક્ષતાવાળી 16 સભ્યોની સમિતિ દ્વારા ડ્રાફ્ટ રિપોર્ટ તૈયાર કરવામાં આવ્યો છે. જેમાં આઈઆઈટીને લઈને આ ભલામણો કરવામાં આવી છે. હવે સમિતિ સંભવિત રોડમેપ પર કામ કરી રહી છે.
ઈન્ડિયન એક્સપ્રેસ સાથેની વાતચીતમાં IIT મદ્રાસના ડાયરેક્ટર પ્રોફેસર વી કામકોટીએ જણાવ્યું હતું કે, તાન્ઝાનિયા અને અન્ય આફ્રિકન દેશો ઉપરાંત આઈઆઈટી મદ્રાસને કેમ્પસ ખોલવા માટે શ્રીલંકા અને નેપાળ તરફથી પણ વિનંતીઓ મળી છે. ડેટા સાયન્સ અને આર્ટિફિશિયલ ઈન્ટેલિજન્સ તેમજ એનર્જી સિસ્ટમ્સ જેવા ઉભરતા ક્ષેત્રોમાં અભ્યાસક્રમો શરૂ કરવા વિનંતી કરવામાં આવી છે. અત્રે એ નોંધનીય છે કે તાજેતરમાં જાહેર કરાયેલા NIRF રેન્કિંગમાં IIT મદ્રાસ પ્રથમ સ્થાને હતું. આ કારણે ઘણા દેશો અહીં એન્જિનિયરિંગ ઈન્સ્ટિટ્યૂટના કેમ્પસ ખોલવા આતુર છે.
IIT Madras : આ અભ્યાસક્રમોની વધી રહી છે માંગ
પ્રોફેસર કામકોટીએ કહ્યું, “IIT મદ્રાસ વિદેશમાં કેમ્પસ ખોલવા માટે તાન્ઝાનિયા સહિત ઘણા દેશો સાથે ચર્ચા કરી રહી છે. અમે આમાંના ઘણા સ્થળોએ કેમ્પસ ખોલવાનું વિચારી રહ્યા છીએ. ખાણકામ કાર્યક્રમો આફ્રિકન દેશો માટે ખૂબ જ મહત્વપૂર્ણ છે. દરેક જગ્યાએ ડેટા સાયન્સ કોર્સની માંગ છે. હાલમાં, વ્યક્તિગત IITએ વિદેશમાં પ્રવેશ કરવો જોઈએ કે ઘણી IITએ એકસાથે આવું કરવાનો પ્રયાસ કરવો જોઈએ તે અંગે ચર્ચાઓ ચાલી રહી છે.
કેમ્પસની માંગ કરતા દેશોના બજારનો થઈ રહ્યો છે અભ્યાસ
IIT મદ્રાસના ડિરેક્ટર પ્રોફેસર કામકોટી રાધાકૃષ્ણન સમિતિના સાત IIT ડિરેક્ટરોમાંના એક છે. કેટલાક દેશોમાં બજારની માંગનો અભ્યાસ કરવાના પ્રયાસો પણ કરવામાં આવી રહ્યા છે, જેમણે ભારતીય સંસ્થાઓના કેમ્પસ સ્થાપવાની વિનંતી કરી છે. પ્રોફેસર કામકોટીએ કહ્યું, “અમે જોઈ રહ્યા છીએ કે ક્યા પ્રકારના કોર્સ ઓફર કરી શકાય. કેમ્પસ વિનંતીઓ પર કેટલાક દેશ-વિશિષ્ટ અભ્યાસક્રમો હોઈ શકે છે, જેમ કે કેટલાક દેશો માટે, કેટલાક વિષયો સંબંધિત હોઈ શકે છે. અમે તે દેશોમાં સંભવિતતા, રોજગાર ક્ષમતાના આધારે વિવિધ મોડલ તૈયાર કરીશું.
