Toll Tax : શું હવે દેશભરમાંથી ટોલ બૂથ હટી જશે ? ફાસ્ટેગના બદલે જીપીએસ દ્વારા ટોલ ટેક્સ વસૂલવાની તૈયારી
હાલમાં ફાસ્ટેગ દ્વારા ટોલ કલેક્શન કરવામાં આવી રહ્યું છે, પરંતુ જીપીએસ અને ઓટોમેટિક નંબર પ્લેટ રેકગ્નિશન સિસ્ટમ દ્વારા ટોલ કલેક્શન શરૂ થવા પર તમામ ટોલ નાકા દૂર કરવા પડશે.
આગામી દિવસોમાં દેશભરમાંથી ટોલ પ્લાઝા હટાવવામાં આવી શકે છે. કેન્દ્રીય માર્ગ પરિવહન અને ધોરીમાર્ગ મંત્રાલય ટોલ વસૂલાત માટે નવી ટેકનોલોજીના ઉપયોગ તરફ આગળ વધી રહ્યું છે. ઓટોમેટિક નંબર પ્લેટ રેકગ્નિશન સિસ્ટમ અને GPS આધારિત ટોલ કલેક્શન સિસ્ટમ આગામી થોડા મહિનામાં લાગુ કરવામાં આવશે હોવાની માહિતી મળી રહી છે.
ત્યારે આ દરમિયાન, નેશનલ હાઈવે ઓથોરિટી ઓફ ઈન્ડિયા (NHAI) ના નિષ્ણાતોએ સૂચવ્યું છે કે ટોલ વસૂલાત માટે વાહનોમાં GPS ફરજિયાત બનાવવા માટે કેટલાક કડક નિયંત્રણો મૂકવા જોઈએ. જો શક્ય હોય તો, તેને વાહન વીમા સાથે જોડવું જોઈએ. એટલે કે જીપીએસ ફીટ હોય ત્યારે જ વાહનનો વીમો લેવો જોઈએ.
દેશમાંથી હટાવવામાં આવશે ટોલ બૂથ?
વાસ્તવમાં, હાલમાં ફાસ્ટેગ દ્વારા ટોલ કલેક્શન કરવામાં આવી રહ્યું છે, પરંતુ GPS અને ઓટોમેટિક નંબર પ્લેટ રેકગ્નિશન સિસ્ટમ દ્વારા ટોલ કલેક્શન શરૂ થવા પર તમામ ટોલ નાકા દૂર કરવા પડશે. NHAI માને છે કે દેશમાં મોટી સંખ્યામાં લોકો ટોલથી બચવા માટે વાહનમાં જીપીએસ લગાવશે નહીં કે નંબર પ્લેટને કોઈપણ કપડા કે કાગળથી ઢાંકી શકાશે નહીં. તેવી જ રીતે, ઘણા લોકો હેરાફેરી કરીને ટોલ ટાળવા માંગે છે. આવી સ્થિતિમાં નવી સિસ્ટમ દ્વારા ટોલ વસૂલાત માટે નક્કર વ્યવસ્થા કરવી જોઈએ. દરેક વાહનમાં જીપીએસ ફીટ કરવા માટે વીમાની ફરજિયાત શરતોમાં જીપીએસ ઉમેરવું જોઈએ. જો કોઈ વાહનમાં જીપીએસ નથી અને તે સક્રિય નથી, તો તેનો વીમો લેવો જોઈએ નહીં. જો કોઈ વ્યક્તિ ટોલના હિસાબે વાહન સાથે જોડાયેલા પાકીટમાં પૂરતું બેલેન્સ ન રાખે તો તેના પર પણ દંડ વસૂલવાની વ્યવસ્થા કરવી જોઈએ.
કેમ લાગી શકે છે gps અને ઓટોમેટિક નંબર પ્લેટ રેકગ્નિશન સિસ્ટમ ?
મંત્રાલય ઇચ્છે છે કે તેના તમામ રાષ્ટ્રીય ધોરીમાર્ગો અને એક્સપ્રેસવે પરના ટોલ પ્લાઝાને કારણે લોકોને તેમની મુસાફરીમાં વિલંબ ન થાય. હાલમાં, FASTag દ્વારા ટોલ વસૂલાતને કારણે, ટોલ પર લાગતો સમય ઓછો થયો છે. ત્યારે જીપીએસ દ્વારા એ માપવામાં આવશે કે નેશનલ હાઈવે અને એક્સપ્રેસ વે પર વાહન કેટલા કિલોમીટર ચાલ્યું છે. ત્યારબાદ કેમેરા દ્વારા વાહનની નંબર પ્લેટ સ્કેન કરવામાં આવશે. જે સિસ્ટમને જણાવશે કે વાહનમાં કઈ કંપનીનું FASTag વોલેટ લગાવવામાં આવ્યું છે. ત્યાર બાદ અંતર પ્રમાણે ટોલ કપાશે.
આ સિસ્ટમ લાગુ પડતા શું જરુરી બનશે?
આ નવી સિસ્ટમ લાગુ પડતા આગામી એક વર્ષમાં તમામ વાહનોમાં જીપીએસ લગાવવું ફરજિયાત બની જશે. ઓટોમોબાઈલ કંપનીઓ માટે નવા વાહનોમાં જીપીએસ સ્થાપિત કરવું સંપૂર્ણપણે ફરજિયાત રહેશે. વાહનવ્યવહાર વિભાગ માત્ર GPS ટ્રેકરના આધારે વાહનનો રજીસ્ટ્રેશન નંબર જારી કરશે. FASTag વોલેટમાં પર્યાપ્ત બેલેન્સ રાખવું પડશે. જો પૈસા ન હોય તો એકથી બે અઠવાડિયાનો સમય આપવામાં આવશે. જો નિર્ધારિત સમયની અંદર રિચાર્જ નહીં કરવામાં આવે તો ફાસ્ટેગને બ્લોક કરવામાં આવશે. FASTag વૉલેટ બ્લૉક થયા પછી પણ, જો નિર્ધારિત સમયગાળામાં રિચાર્જ નહીં કરવામાં આવે તો RC પણ બ્લૉક કરવામાં આવશે.
