અનુષ્કા શર્મા અને વિરાટ કોહલીની કંપની કમાણીની તક આપશે, રોકાણની વિગતો માટે વાંચો અહેવાલ

જો તમે વિરાટ કોહલી અથવા અનુષ્કા શર્માના ચાહક છો તો ટૂંક સમયમાં તમે તેમની વીમા કંપનીમાં રોકાણ કરી શકશો.  IRDAI એ બંને જાણીતી હસ્તીઓના રોકાણ સાથે ગો ડિજિટ જનરલ ઈન્સ્યોરન્સ કંપનીનો IPO લાવવાની મંજૂરી આપી દીધી છે. જો કે સેબીની પરવાનગી મળવાની બાકી છે. આ IPO લગભગ રૂપિયા 1250 કરોડનો હશે.  આ કંપની અન્ય વીમા કંપનીઓ કરતા થોડી અલગ પડે છે. ગો ડિજીટ જનરલ ઈન્સ્યોરન્સ એ ક્લાઉડ આધારિત જનરલ ઈન્સ્યોરન્સ સર્વિસ ઓફર કરનાર કંપનીઓ પૈકીની એક છે.  જાણો તેની સંપૂર્ણ વિગતો…

IPOના પેપર ઓગસ્ટમાં ફાઈલ થયા હતા

ગો ડિજીટ જનરલ ઈન્સ્યોરન્સે આ વર્ષે 17 ઓગસ્ટે આઈપીઓ લાવવા માટે પેપર્સ ફાઈલ કર્યા હતા. વિરાટ કોહલી અને અનુષ્કા શર્મા પણ કેનેડાના ફેરફેક્સ ગ્રૂપના રોકાણ સાથે આ સામાન્ય વીમા કંપનીમાં રોકાણ ધરાવે છે. IRDAએ શુક્રવારે કંપનીના IPOને મંજૂરી આપી દીધી છે.

IPOમાં 1250 કરોડના નવા શેર ઈશ્યુ કરવામાં આવશે

ગો ડિજીટ જનરલ ઈન્સ્યોરન્સ કંપનીના આઈપીઓમાં રૂ. 1250 કરોડના નવા શેર હશે. આ સિવાય હાલના શેરધારકોના 10,94,45,561 શેર ઓફર ફોર સેલ (OFS) માટે રાખવામાં આવશે. કંપની આઈપીઓમાંથી એકત્ર કરાયેલા નાણાંનો ઉપયોગ તેની મૂડીનો આધાર વધારવા, સોલ્વન્સી લેવલ જાળવી રાખવા અને અન્ય કોર્પોરેટ જરૂરિયાતો પૂરી કરવા માટે કરશે.

પ્રી-આઈપીઓ પ્લેસમેન્ટ કરશે

મીડિયા રિપોર્ટ્સ અનુસાર, કંપની પોતાનો સંપૂર્ણ IPO લાવતા પહેલા પ્રી-આઈપીઓ પ્લેસમેન્ટ પણ કરી શકે છે. તે લગભગ 250 કરોડ રૂપિયા હોઈ શકે છે. જો આવું થાય છે, તો પછી જ્યારે સંપૂર્ણ IPO આવે છે, તો કંપની નવા ઇશ્યૂનું કદ ઘટાડી શકે છે.

ગો ડિજીટ વિવિધ પ્રકારના વીમા ઓફર કરે છે

ગો ડિજીટ જનરલ ઈન્સ્યોરન્સ વિવિધ પ્રકારના સામાન્ય વીમા ઓફર કરે છે. આમાં મોટર વાહન વીમો, આરોગ્ય વીમો, મુસાફરી વીમો, મિલકત વીમો અને મેરિટાઇમ વીમો જેવા ઉત્પાદનોનો સમાવેશ થાય છે.

ગો ડિજીટ જનરલ ઈન્સ્યોરન્સ એ ક્લાઉડ આધારિત જનરલ ઈન્સ્યોરન્સ સર્વિસ ઓફર કરનાર દેશની પ્રથમ કંપનીઓમાંની એક છે. કંપનીએ એક એપ્લિકેશન પ્રોગ્રામિંગ ઈન્ટરફેસ વિકસાવ્યું છે જે એકસાથે બહુવિધ ચેનલ ભાગીદારો સાથે કામ કરે છે. કંપનીએ અત્યાર સુધીમાં 1.65 કરોડથી વધુ વીમા પોલિસી ઈશ્યુ કરી છે.