Income Tax New Website: લોન્ચ થઈ ઇન્કમ ટેક્સ વિભાગની નવી વેબસાઈટ ,જાણો તેના મહત્વના 5 ફીચર

Income Tax New Website: આખરે ઇંતેજાર બાદ 7 જૂને રાતે આવકવેરા વિભાગની નવી વેબસાઇટ www.incometax.gov.in શરૂ કરવામાં આવી છે. તે પહેલાં કરતાં વધુ સારી અને સુલભ બનાવવામાં આવી છે. આવકવેરા સંબંધિત કેટલાક કામ માટે આવકવેરા વિભાગ દ્વારા આવકવેરા ઇ-ફાઇલિંગ વેબસાઇટ 6 દિવસ માટે બંધ હતી.

ખુબ કરાવ્યો ઇંતેજાર ગઈકાલે મોડી સાંજ સુધી આ આવકવેરા પોર્ટલ શરૂ થઈ શક્યું હતું જ્યારે લોકો સવારથી જ તેની રાહ જોતા હતા. આવકવેરા વિભાગે 1 થી 6 તારીખ સુધી વેબસાઇટ બંધ રાખી હતી અને કહ્યું હતું કે નવી વેબસાઇટ 7 જૂનથી શરૂ કરવામાં આવશે. તેથી લોકોને આશા હતી કે નવી વેબસાઇટ સવારથી જ ઉપલબ્ધ થશે પરંતુ તેમ થયું નહીં.

incometaxindiaefilling.gov.in અગાઉની સત્તાવાર વેબસાઈટ હતી. સરકારના ઈ-ગવર્નન્સ યોજના અંતર્ગત આ નવું પોર્ટલ તૈયાર કરાયું છે. તેનું ‘હોમ પેજ’ ‘ઇ-ફાઇલિંગ 2.0’ તરીકે ઓળખાય છે. આ એક સંપૂર્ણપણે નવું પોર્ટલ છે જે તમારા માટે ઇ-ફાઇલિંગને સરળ બનાવે છે. તેમાં કહેવામાં આવ્યું છે કે, “આ પોર્ટલનો ઉદ્દેશ કરદાતાઓ અને સાથી પક્ષોને આવકવેરા સંબંધિત સેવાઓ માટે સિંગલ વિંડો પ્રદાન કરવાનો છે.” ઓનલાઇન ટેક્સ પેમેન્ટ સિસ્ટમ અને મોબાઈલ એપ ૧૮ જૂનથી ઉપલબ્ધ કરાવાશે.

નવી વેબસાઇટમાં આ 5 વિશેષ સુવિધાઓ છે >> નવી વેબસાઇટ વધુ યુઝર ફ્રેન્ડલી છે, જે આઇટીઆર ફાઇલ કરવાનું અને રિફંડ ઝડપથી મેળવવું સરળ બનાવશે.

>> તમામ વ્યવહારો, અપલોડ્સ અને બાકી પ્રોસિજર એક જ ડેશબોર્ડ પર નજરે પડશે જેથી વપરાશકર્તાઓ તેમની સમીક્ષા કરી શકે અને જરૂર મુજબની કાર્યવાહી કરી શકે. એટલે કે, આઇટીઆર ફાઇલ કરવું, તેની સમીક્ષા કરવા અને કોઈપણ પગલાં લેવાનું સરળ બનશે.

>> આઇટીઆર તૈયાર કરવા ઓનલાઇન અને ઓફલાઇન બંને પરિસ્થિતિઓ માટે વિના મૂલ્યે સોફ્ટવેર ઉપલબ્ધ છે. તેમાં કરદાતાઓને ગાઈડ કરવાની સુવિધા પણ છે અને પૂર્વ ફાઇલિંગનો વિકલ્પ પણ છે જેથી ન્યૂનતમ ડેટા એન્ટ્રી કરવી પડશે.

>> ડેસ્ક ટોપ પોર્ટલની તમામ આવશ્યક સુવિધાઓ મોબાઇલ એપ્લિકેશન પર પણ ઉપલબ્ધ છે.

>>નવા પોર્ટલમાં નવી ટેક્સ પેમેન્ટ સિસ્ટમ રજૂ કરવામાં આવી છે જેમાં નેટ બેન્કિંગ, યુપીઆઈ, આરટીજીએસ, એનઇએફટી વગેરે જેવા અનેક પેમેન્ટ વિકલ્પો હશે.