Home Loan Rates : આ 5 બેંકો ઓફર કરી રહી છે સૌથી સસ્તી હોમ લોન, જાણો શું છે વ્યાજ દર

ભારતીય રિઝર્વ બેંકે (Reserve Bank of India) રેપો રેટ 4.40 થી વધારીને 4.90 ટકા કર્યો છે. RBI ગવર્નર શક્તિકાંત દાસે(Shaktikanta Das) 8 જૂને રેપો રેટમાં 50 બેસિસ પોઈન્ટના વધારાની જાહેરાત કરી હતી. આરબીઆઈની આ જાહેરાત બાદ તમામ બેંકોએ પણ તમામ પ્રકારની લોનના વ્યાજદર (Home Loan Rates)માં વધારો કરવાનું શરૂ કરી દીધું છે. જો કે રેપો રેટ વધાર્યા બાદ તમામ પ્રકારની લોન મોંઘી થઈ ગઈ છે, પરંતુ હોમ લોન લેનારા લોકો પર તેની ખરાબ અસર પડશે. વાસ્તવમાં, હોમ લોનની ચુકવણી બાકીની લોન કરતાં ઘણી લાંબી ચાલે છે અને તેની રકમ પણ ઘણી વધારે છે.

કઈ બેંક સૌથી સસ્તી હોમ લોન આપી રહી છે

રિઝર્વ બેંક દ્વારા રેપો રેટમાં વધારા બાદ તમામ બેંકોએ લોનના વ્યાજદરમાં વધારો કર્યો છે. જો કે, તમામ બેંકો દ્વારા ઓફર કરવામાં આવતા હોમ લોનના વ્યાજ દરો અલગ-અલગ છે. અહીં અમે તમને એવી 5 બેંકો વિશે જણાવવા જઈ રહ્યા છીએ જે લોન મોંઘી હોવા છતાં પણ અન્ય બેંકોની સરખામણીમાં સૌથી સસ્તી હોમ લોન આપી રહી છે.

બેંક ઓફ મહારાષ્ટ્ર સૌથી સસ્તી હોમ લોન ઓફર કરી રહી છે

સૌથી ઓછા વ્યાજ દરે હોમ લોન આપતી 5 બેંકોમાં તમામ સરકારી બેંકોનો સમાવેશ થાય છે. બેંક ઓફ મહારાષ્ટ્ર 6.8 ટકાના સૌથી ઓછા વ્યાજ દરે સૌથી સસ્તી હોમ લોન ઓફર કરી રહી છે. જ્યારે પંજાબ એન્ડ સિંધ બેંક મહત્તમ વ્યાજ દરમાં 7.75 ટકાના દરે પોસાય તેવી લોન આપે છે. તમને જણાવી દઈએ કે હોમ લોનના વ્યાજ દર લોનની રકમ અને કાર્યકાળના આધારે બદલાય છે.

રેપો રેટ 35 દિવસમાં 0.90 ટકા વધ્યો

જણાવી દઈએ કે 35 દિવસની અંદર રિઝર્વ બેંકે રેપો રેટમાં 0.90 ટકાનો વધારો કર્યો છે. 4 મે, 2022ના રોજ, આરબીઆઈએ રેપો રેટમાં 40 બેસિસ પોઈન્ટનો વધારો કરીને 4 થી 4.40 ટકા કર્યો. આ પછી 8 જૂને RBIએ ફરી એકવાર રેપો રેટ વધારવાની જાહેરાત કરી હતી. આ વખતે ભારતીય રિઝર્વ બેંકે રેપો રેટમાં 50 બેસિસ પોઈન્ટનો વધારો કર્યો, જેના કારણે રેપો રેટ 4.40 ટકાથી વધીને 4.90 ટકા થયો.