વિદેશી રોકાણકારોનું મનપસંદ સ્થળ બન્યું ભારત, પહેલા ત્રિમાસિક ગાળામાં FDIમાં બમણાથી વધુનો ઉછાળો
ચાલુ નાણાકીય વર્ષમાં વિદેશી રોકાણકારોએ ભારતીય બજારમાં મોટા પ્રમાણમાં રોકાણ કર્યું છે. જૂન ક્વાર્ટરમાં FDI બમણું થઈને 22.53 અરબ ડોલર થઈ ગયું. શેરબજારમાં FDIમાં 168 ટકાનો ઉછાળો નોંધાયો હતો.
FDI in India: વર્તમાન નાણાકીય વર્ષના પ્રથમ એપ્રિલ-જૂન ક્વાર્ટરમાં દેશમાં ઈક્વિટી વિદેશી પ્રત્યક્ષ રોકાણ (એફડીઆઇ)નો પ્રવાહ બમણાથી પણ વધારે 17.57 અરબ ડોલર થયો છે. શનિવારે એક સત્તાવાર નિવેદનમાં કહેવામાં આવ્યું છે કે નીતિગત સુધારાઓ અને વેપારમાં સરળતાને કારણે FDI નો પ્રવાહ વધ્યો છે.
ચાલુ નાણાકીય વર્ષના પ્રથમ ત્રણ મહિનામાં દેશમાં કુલ એફડીઆઈનો પ્રવાહ 22.53 અરબ ડોલર રહ્યો, જે એક વર્ષ અગાઉ આ સમયગાળા દરમિયાન 11.84 અરબ ડોલર હતો. તેમાં કહેવામાં આવ્યું છે કે નાણાકીય વર્ષના પ્રથમ ક્વાર્ટરમાં FDI ઇક્વિટી ઇનફ્લો 168 ટકા વધીને 17.57 અબજ ડોલર થયો છે, જે એક વર્ષ પહેલા આ જ સમય ગાળામાં 6.56 અબજ ડોલર હતો. કુલ FDI ઇક્વિટી ઇનફ્લોમાં સૌથી વધારે 27 ટકા હિસ્સો ઓટોમોબાઇલ ક્ષેત્રનો રહ્યો. ત્યારબાદ કમ્પ્યુટર સોફ્ટવેર અને હાર્ડવેર (17 ટકા) અને સર્વિસ સેક્ટર (11 ટકા)નો હિસ્સો રહ્યો.
કર્ણાટકને સૌથી વધુ FDI મળ્યું
માહિતી અનુસાર, સમીક્ષા હેઠળના સમયગાળા દરમિયાન એકલા કર્ણાટકને FDI ઇક્વિટી ઇનફ્લોનો 48 ટકા હિસ્સો મળ્યો છે. તે પછી મહારાષ્ટ્ર 23 ટકા સાથે અને દિલ્હીને 11 ટકા હીસ્સો છે. વાણિજ્ય અને ઉદ્યોગ મંત્રાલયે કહ્યું કે એફડીઆઈ નીતિના મોરચે સરકારે લીધેલા પગલાં, રોકાણની સરળતા અને વેપારમાં સરળતાએ દેશમાં એફડીઆઈનો પ્રવાહ વધાર્યો છે.
FDIમાં સતત સુધારો થઈ રહ્યો છે
વાણિજ્ય અને ઉદ્યોગ મંત્રી પિયુષ ગોયલે તાજેતરમાં કહ્યું હતું કે દેશમાં સીધું વિદેશી રોકાણ (FDI) વધી રહ્યું છે અને આ વર્ષે મે મહિનામાં તે વધીને 12.1 અરબ ડોલર પર પહોચી ગયું છે. ભારતને 2020-21માં અત્યાર સુધીનો સૌથી વધુ FDI પ્રવાહ મળ્યો છે. તે 10 ટકા વધીને 81.72 અરબ ડોલર થયું છે. તેમજ મે 2021માં FDI 12.1 અરબ ડોલર રહ્યું જે મે 2020ની તુલનામાં 203 ટકા વધારે છે.
માર્ચમાં FDIમાં ઘટાડો જોવા મળ્યો હતો
એપ્રિલ 2021 માં દેશમાં આવનારું કુલ ફોરેન ડીરેક્ટ ઈન્વેસ્ટમેન્ટ 6.24 અરબ ડોલર રહ્યું. એપ્રિલ 2020 ની સરખામણીમાં આ 38 ટકા વધારે છે. એપ્રિલ 2020 માં દેશમાં કુલ 4.53 અરબ ડોલરનું FDI આવ્યું હતું. માર્ચ 2021 માં વાર્ષિક ધોરણે FDI માં ઘટાડો જોવા મળ્યો હતો. આ વર્ષે માર્ચમાં કુલ FDI 2.87 અરબ ડોલર હતું. જે ગયા વર્ષના સમાન ગાળામાં 4.27 અબજ ડોલર હતું. ફેબ્રુઆરીમાં પણ FDIમાં ઘટાડો નોંધાયો હતો. ફેબ્રુઆરી 2021 માં કુલ FDI 2.58 અરબ ડોલર હતુ જે ગયા વર્ષના સમાન સમયગાળામાં 3.36 અરબ ડોલર રહ્યું હતું.
આ પણ વાંચો : શું ધીમે ધીમે ગાયબ થઈ જશે 2000 રૂપિયાની નોટ? જાણો શું છે RBIની યોજના
આ પણ વાંચો : Gold Price Today : ટૂંક સમયમાં સોનું 50,000 ના સ્તરે પહોંચવાનું નિષ્ણાંતોનું અનુમાન , જાણો આજના લેટેસ્ટ રેટ