8th Pay Commission: આ સરકારી કર્મચારીઓને મોજ ! એરિયરમાં મળી શકે છે લગભગ 18 લાખ રૂપિયા

કેન્દ્રીય સરકારી કર્મચારીઓ લાંબા સમયથી 8મા પગાર પંચની ભલામણો અને તેના અમલીકરણની રાહ જોઈ રહ્યા છે. પગાર પંચ હાલમાં વિવિધ કર્મચારી સંગઠનો સાથે ચર્ચા કરી રહ્યું છે. રિપોર્ટ તૈયાર કરવામાં અને તેના અમલીકરણમાં જેટલો વધુ સમય લાગશે, તેટલી જ બાકી રકમ એટલે કે એરિયરની સંભાવના વધી શકે છે.

જો 8મા પગાર પંચમાં 2.57ના ફિટમેન્ટ ફેક્ટરને ધ્યાનમાં લેવામાં આવે, તો લેવલ 6થી લેવલ 8 સુધીના કર્મચારીઓને નોંધપાત્ર એરિયર મળી શકે છે. ખાસ કરીને લેવલ 8ના કર્મચારીઓ માટે 24 મહિનાના સંભવિત એરિયરની રકમ લગભગ રૂ. 18 લાખ સુધી પહોંચી શકે છે. જોકે, આ ગણતરી સંભવિત ફિટમેન્ટ ફેક્ટર અને અમલીકરણમાં થતા વિલંબના આધારે છે; અંતિમ રકમ સરકારના નિર્ણય બાદ જ સ્પષ્ટ થશે.

8મું પગાર પંચ ક્યારે રિપોર્ટ આપશે?

8મા પગાર પંચે સપ્ટેમ્બર 2026 દરમિયાન જયપુર, ચેન્નાઈ, પુડુચેરી અને ચંદીગઢમાં મહત્વપૂર્ણ બેઠકો પૂર્ણ કરી છે. હવે આગામી બેઠક 7 અને 8 ઓક્ટોબર, 2026ના રોજ બેંગલુરુમાં યોજાવાની છે.

નવેમ્બર 2025માં કેન્દ્ર સરકારે પગાર પંચને પોતાનો અંતિમ અહેવાલ રજૂ કરવા માટે 18 મહિનાનો સમય આપ્યો હતો. આ સમયગાળા પ્રમાણે કમિશને મે 2027 સુધીમાં પોતાનો અહેવાલ રજૂ કરવાનો રહેશે. જોકે, અગાઉના પગાર પંચના અનુભવને જોતા રિપોર્ટ તૈયાર કરવામાં થોડો વધુ સમય લાગી શકે છે. નિષ્ણાતોના અંદાજ મુજબ માર્ચથી ઓગસ્ટ 2027 વચ્ચે રિપોર્ટ સરકારને સોંપાઈ શકે છે.

કયા ભથ્થાં પર એરિયર મળશે?

કેન્દ્રીય કર્મચારીઓમાં સૌથી મોટો પ્રશ્ન એ છે કે 8મા પગાર પંચના કારણે વધનારા તમામ ભથ્થાં પર એરિયર મળશે કે નહીં. ઉપલબ્ધ ગણતરી મુજબ એરિયરની મુખ્ય ગણતરી મૂળ પગારમાં થયેલા વધારાના આધારે કરવામાં આવે છે.

હાઉસ રેન્ટ એલાઉન્સ એટલે કે HRA મૂળ પગાર સાથે જોડાયેલું હોવાથી, મૂળ પગારમાં વધારો થતાં HRAમાં પણ વધારો થઈ શકે છે. બીજી તરફ, ટ્રાન્સપોર્ટ એલાઉન્સ એટલે કે TPTA મોંઘવારી ભથ્થા (DA) સાથે જોડાયેલું છે. DAમાં વર્ષમાં બે વખત ફેરફાર થતો હોવાથી તેની ગણતરી અલગ રીતે થાય છે. આથી સંભવિત એરિયરની ગણતરી મુખ્યત્વે જૂના મૂળ પગાર અને નવા મૂળ પગાર વચ્ચેના તફાવતને ધ્યાનમાં રાખીને કરવામાં આવે છે.

લેવલ 8ના કર્મચારીઓને કેટલો ફાયદો થઈ શકે?

હવે વાત કરીએ લેવલ 8ના કર્મચારીઓની. હાલમાં લેવલ 8ના કર્મચારીઓનો લઘુત્તમ મૂળ પગાર રૂ. 47,600 છે.

જો 8મા પગાર પંચમાં 2.57નો ફિટમેન્ટ ફેક્ટર લાગુ કરવામાં આવે, તો મૂળ પગાર વધીને આશરે રૂ. 1,22,332 થઈ શકે છે. એટલે કે જૂના મૂળ પગારની સરખામણીમાં દર મહિને આશરે રૂ. 74,732નો તફાવત થઈ શકે છે. જો નવા પગારના અમલીકરણમાં 24 મહિનાનો વિલંબ થાય, તો આ ગણતરી પ્રમાણે એરિયરની રકમ આશરે રૂ. 17,93,568 થઈ શકે છે. જો ફિટમેન્ટ ફેક્ટર 2.15 રાખવામાં આવે, તો 24 મહિનાના એરિયરની ગણતરી આશરે રૂ. 13,13,760 થાય છે. જ્યારે 2.28ના ફિટમેન્ટ ફેક્ટર પર આ રકમ આશરે રૂ. 14,62,272 થઈ શકે છે.

લેવલ 6 અને લેવલ 7 માટે પણ એરિયરની શક્યતા

લેવલ 6ના કર્મચારીઓ માટે હાલમાં લઘુત્તમ મૂળ પગાર રૂ. 35,400 છે. જો 2.15નો ફિટમેન્ટ ફેક્ટર લાગુ થાય અને 24 મહિનાના વિલંબને ધ્યાનમાં લેવામાં આવે, તો એરિયરની ગણતરી આશરે રૂ. 9,77,040 થાય છે. તે જ રીતે, 2.28ના ફિટમેન્ટ ફેક્ટર પર આ રકમ આશરે રૂ. 10,87,488, જ્યારે 2.57ના ફિટમેન્ટ ફેક્ટર પર આશરે રૂ. 13,33,872 થઈ શકે છે.

લેવલ 7ના કર્મચારીઓનો હાલનો લઘુત્તમ મૂળ પગાર રૂ. 44,900 છે. 2.15ના ફિટમેન્ટ ફેક્ટર હેઠળ 24 મહિનાના એરિયરની ગણતરી આશરે રૂ. 12,39,240 થાય છે. જ્યારે 2.57ના ફિટમેન્ટ ફેક્ટર પર આ રકમ આશરે રૂ. 16,91,832 સુધી પહોંચી શકે છે.

અંતિમ નિર્ણય બાદ જ સ્પષ્ટ થશે એરિયરની વાસ્તવિક રકમ

અહીં નોંધવું જરૂરી છે કે ઉપરોક્ત તમામ આંકડા સંભવિત ફિટમેન્ટ ફેક્ટર અને 24 મહિનાના વિલંબને આધારે કરવામાં આવેલી ગણતરી છે. 8મા પગાર પંચ દ્વારા અંતિમ ભલામણો રજૂ થયા બાદ અને કેન્દ્ર સરકાર દ્વારા તેને મંજૂરી આપવામાં આવ્યા પછી જ કર્મચારીઓના નવા મૂળ પગાર, એરિયર અને અન્ય ભથ્થાંની વાસ્તવિક રકમ સ્પષ્ટ થશે.

અર્થાત્, જો અમલીકરણમાં વિલંબ થાય અને ફિટમેન્ટ ફેક્ટર વધારે રાખવામાં આવે, તો કર્મચારીઓને એકસાથે મળનારી એરિયરની રકમમાં નોંધપાત્ર વધારો થઈ શકે છે. જોકે, હાલ આ રકમને અંતિમ ગણવી યોગ્ય નથી.