Numerology: અંકશાસ્ત્રમાં ઉલ્લેખ છે એ મૂળાંક અને ભાગ્યાંક શું છે? જાણો તેનાથી ભવિષ્ય કેવી રીતે જાણી શકાય?

આપણા જીવનમાં મૂળાંક અને ભાગ્યાંકનું ખૂબ મહત્વ છે. કેટલીકવાર આપણને જન્મનો સમય કે સ્થળ ખબર હોતી નથી. આવી સ્થિતિમાં કુંડળી બનાવવી મુશ્કેલ બની જાય છે. આવી સ્થીતિમાં અંકશાસ્ત્ર(Numerology) મદદ રૂપ બને છે, અંકશાસ્ત્ર ભવિષ્યની ઘટનાઓની આગાહી કરવા માટેનું એક માધ્યમ છે, જે લોકો પાસે તેના જન્મનો સમય કે વિગત નથી તે અંક દ્વારા ભવિષ્યના અનુમાનોને જાણી શકે છે. અંકશાસ્ત્ર મૂળાંક અને ભાગ્યાંક પર આધારીત છે, તમને સવાલ થશે કે મૂળાંક અને ભાગ્યાંક શું છે અને તે કેવી રીતે મેળવી શકાય તો, આજે અમે આ અહેવાલ દ્વારા તમને મૂળાંક (Mulank) અને ભાગ્યાંક(Bhagyank) વિશે માહિતી આપશું.

મૂળાંક શું છે

મૂળાંક એટલે તમારી જન્મતારીખ. એટલે કે, જો તમારો જન્મ 2 માર્ચે થયો હોય, તો તમારો મૂળાંક 2 હશે. મૂળાંક આપણા સ્વભાવ, ગુણ, ખામી, ખુબીઓ વગેરે વિશે જણાવે છે. જીવનમાં આપણા માટે શું ઉપયોગી છે અને શું નથી, તે મૂળાંક દ્વારા જાણી શકાય છે. તે તમારા મિત્રો અને દુશ્મનો વિશે પણ જણાવે છે.

તે તમારી કારકિર્દી, જીવન સાથી, કાર્યસ્થળ અને નસીબ વિશે પણ માહિતી આપે છે. મૂળાંક નંબરો 1 થી 9 સુધી ગણવામાં આવે છે. જે લોકો 9 થી વધુ તારીખે જન્મ્યા હતા તેઓ તેમના જન્મદિવસની સંખ્યાને એકસાથે ઉમેરીને તેમના મૂળાંક મેળવી શકે છે. ઉદાહરણ તરીકે, જે લોકો 11 તારીખે જન્મ્યા છે, તેમનો મૂળાંક 2 હશે. (1+1=2). એ જ રીતે, અન્ય મૂળાંકો તેમને એકસાથે ઉમેરીને મેળવી શકાય છે.

ભાગ્યાંક શું છે

ભાગ્ય અંકનો ઉપયોગ જાતકની મહત્વપૂર્ણ તારીખ અને ઘટનાઓ અંગે જાણવા માટે થાય છે. ભાગ્યાંકની ગણતરી મૂળાંકની ગણતરી કરતાં થોડી વિસ્તૃત હોય છે. આમાં જાતકની જન્મ તારીખ, મહિનો અને વર્ષ ત્રણેયને ઉમેરીને જે સંખ્યા પ્રાપ્ત થાય છે તે વ્યક્તિનો ભાગ્ય અંક કહેવામાં આવે છે.

તેને એવી રીતે સમજો કે જો કોઈ વ્યક્તિની જન્મ તારીખ 31/5/2022 છે, તો બધાને જોડીને જે સંખ્યા પ્રાપ્ત થશે તે તેનો ભાગ્યાંક હશે. જેમ કે 3+1+5+2+0+2+2=15=1+5=6 આ જન્મ તારીખે જન્મેલ વ્યક્તિનો ભાગ્યાંક 6 છે. વિવાહ, કાર્યસ્થળ, લકી સિટી, લકી નંબર વગેરે વિશે ભાગ્યાંક દ્વારા જાણવામાં આવે છે.

(નોંધ: આ લેખમાં આપવામાં આવેલી માહિતી સામાન્ય ધારણાઓ પર આધારિત છે. Tv9 ગુજરાતી તેની પુષ્ટિ કરતું નથી. તેનો અમલ કરતા પહેલા કૃપા કરીને સંબંધિત નિષ્ણાતનો સંપર્ક કરો)