Fixed Deposit : આ 10 બેંકની FD પર સૌથી વધુ વ્યાજ મળી રહ્યું છે, રોકાણ પહેલા જાણો ક્યાં રોકાણ કરવું રહેશે શ્રેષ્ઠ
બેંકોએ એક તરફ હોમ લોનના વ્યાજ દરમાં વધારો કરવાનું શરૂ કર્યું છે તો બીજી તરફ FD રેટ વધારવામાં આવ્યા છે. આનાથી FD પરના રિટર્નમાં વધારો થયો છે.
રેપો રેટ(Repo Rate) વધાર્યા પછી હોમ લોન (Home Loan) મોંઘી થઈ ગઈ પરંતુ ફિક્સ ડિપોઝિટમાં પૈસા મૂકનારાઓને લાભ થયો છે. બેંકોએ એક તરફ હોમ લોનના વ્યાજ દરમાં વધારો કરવાનું શરૂ કર્યું છે તો બીજી તરફ FD રેટ વધારવામાં આવ્યા છે. આનાથી FD પરના રિટર્નમાં વધારો થયો છે. મોંઘવારી વચ્ચે લોકોને થોડી રાહત મળી છે. તાજેતરમાં સ્ટેટ બેંક, એક્સિસ બેંક, ફેડરલ બેંક, HDFC બેંક અને ICICI બેંક સહિત ઘણી બેંકોએ FD દરમાં વધારો કર્યો છે.
સ્ટેટ બેંક ઓફ ઈન્ડિયાનો FD દર સામાન્ય ખાતા પર 2.90 થી 5.50 ટકા છે જ્યારે વરિષ્ઠ નાગરિકો માટે આ દર 3.40 થી 6.30 ટકા છે. HDFC બેંકની FD પર સામાન્ય થાપણો પર 2.50 થી 5.60 ટકા વ્યાજ મળી રહ્યું છે, જ્યારે વરિષ્ઠ નાગરિકો માટે આ દર 3.40 થી 6.30 ટકા છે. IDBI બેંક સામાન્ય ખાતા પર 2.70 થી 5.60 ટકા અને વરિષ્ઠ નાગરિકોને 3.20 થી 6.35 ટકા વ્યાજ આપી રહી છે. પંજાબ નેશનલ બેંક સામાન્ય ખાતા પર 3.00 થી 5.25 ટકા અને વરિષ્ઠ નાગરિકના ખાતા પર 3.50 થી 5.75 ટકા વ્યાજ આપી રહી છે.
કઈ બેંકમાં કેટલું રિટર્ન મળી રહ્યું છે
કેનરા બેંક સામાન્ય FD પર 2.90 થી 5.75 ટકા અને વરિષ્ઠ નાગરિકો માટે 2.90 થી 6.25 ટકા વ્યાજ આપી રહી છે. એક્સિસ બેંક તેની FD પર સામાન્ય થાપણદારોને 2.50 થી 5.75 ટકા અને વરિષ્ઠ નાગરિકોને 2.50 થી 6.50 ટકા આપે છે. બેંક ઓફ બરોડા સામાન્ય થાપણદારોને FD પર 2.80 થી 5.35 ટકા અને વરિષ્ઠ નાગરિકોને 3.30 થી 6.35 ટકા વ્યાજ આપે છે. IDFC બેંકની FD પર, સામાન્ય ખાતા પર 2.85 થી 5.20 ટકા અને વરિષ્ઠ નાગરિકોને 3.35 થી 5.95 ટકા વ્યાજ મળી રહ્યું છે. એ જ રીતે પંજાબ એન્ડ સિંધ બેંક તેની FD પર સામાન્ય થાપણદારોને 3.00 થી 5.40 ટકા અને વરિષ્ઠ નાગરિકોને 3.50 થી 5.90 ટકા વ્યાજ આપી રહી છે.
HDFC બેંકે તાજેતરમાં વધારો કર્યો
તાજેતરના વધારામાં HDFC બેંકનું નામ છે. નવા દર નવ મહિનાથી વધુ સમયની એફડી માટે અમલમાં આવ્યા છે. HDFC બેંકના નવા FD વ્યાજ દરમાં વધારો કાર્યકાળના આધારે 10 થી 20 બેસિસ પોઈન્ટની વચ્ચે છે. આમાં વરિષ્ઠ નાગરિકોને 0.50 ટકા વધારાનું વળતર મળે છે. બેંકે તેની વેબસાઇટ પર જણાવ્યું છે કે HDFC બેંકનો FD વ્યાજ દરમાં વધારો 18 મે, 2022 થી અમલમાં આવ્યો છે અને તે 2 કરોડ રૂપિયાથી ઓછી થાપણો પર લાગુ થશે. અગાઉ ICICI બેન્ક, ફેડરલ બેન્ક, સ્ટેટ બેન્ક અને એક્સિસ બેન્કે પણ FDના દરમાં વધારો કર્યો છે.
થોડા દિવસો પહેલા જ રિઝર્વ બેંકે અચાનક રેપો રેટમાં 40 બેસિસ પોઈન્ટનો વધારો કર્યો હતો. આ વધારા બાદ બેંકોએ હોમ લોનના દરમાં વધારો કરવાનું શરૂ કર્યું. તેની સાથે જ એફડીના દર પણ વધવા લાગ્યા છે. રેપો રેટમાં વધારાને કારણે હોમ લોન મોંઘી બને છે જ્યારે FD વધુ વળતર આપે છે.
