જામનગર : કાલાવડ શહેરમાં દારૂબંધીના લીરેલીરા, પોલીસની કામગીરી પર સવાલ

ગુજરાતમાં દારૂબંધી હોવા છતા જામનગર જિલ્લાના કાલાવડ શહેરમાં ખુલ્લેઆમ દારૂનું વેચાણ થઈ રહ્યું હોવાના દ્રશ્યો સામે આવતા તંત્રની કામગીરી પર ગંભીર સવાલો ઉભા થયા છે. કાલાવડના મીઠી વાડી વિસ્તારમાં બેફામ રીતે દારૂ વેચાઈ રહ્યો છે. ચોંકાવનારી વાત એ છે કે આ ગેરકાયદેસર પ્રવૃત્તિ કાલાવડ ટાઉન પોલીસ સ્ટેશનથી માત્ર 500 મીટરના અંતરે જ ચાલી રહી છે.

વાયરલ થયેલા વીડિયોમાં સ્પષ્ટપણે જોઈ શકાય છે કે દેશી દારૂનું વેચાણ કોઈ પણ પ્રકારના ડર વગર થઈ રહ્યું છે. આ દ્રશ્યો સોશિયલ મીડિયા પર ઝડપથી વાયરલ થયા છે, જેના કારણે જાહેર જનતામાં અનેક પ્રશ્નો ઉભા થયા છે. અગાઉ પણ આવા જ દારૂના વેચાણના વીડિયો સામે આવ્યા હતા, છતાં પોલીસ દ્વારા કોઈ નક્કર કાર્યવાહી કરવામાં આવી ન હોવાનું જણાઈ રહ્યું છે. આ સ્થિતિમાં “શું પોલીસ બુટલેગરોને છાવરી રહી છે?” તેવો સવાલ વારંવાર પૂછાઈ રહ્યો છે.

કાલાવડ નજીકના પોલીસ સ્ટેશનથી નજીકના અંતરે જ આ ઘટના બની છે અને દેશી દારૂનું ખુલ્લેઆમ વેચાણ થઈ રહ્યું છે તેવા વીડિયો સોશિયલ મીડિયામાં વાયરલ થયા છે. આ વીડિયો વાયરલ થયા પછી જ કાલાવડ પોલીસ અને જામનગર એલસીબી દ્વારા આ મામલે વધુ તપાસ શરૂ કરવામાં આવી છે.

જોકે આ કાર્યવાહી રહી રહીને પોલીસ જાગી હોવાનું સૂચવે છે. જ્યારે આટલા મોટા પાયે અને પોલીસ સ્ટેશનની નજીક દારૂનું વેચાણ થતું હોય ત્યારે પોલીસને આ બાબતની જાણ ન હોય તે માનવું મુશ્કેલ છે. આ ઘટનાએ કાયદાનું પાલન કરાવતી એજન્સીઓની કાર્યક્ષમતા અને પ્રામાણિકતા પર પ્રશ્નાર્થ ઊભો કર્યો છે. પ્રજાના મનમાં સવાલ છે કે શું પોલીસ ખરેખર દારૂબંધીનો કડકાઈથી અમલ કરાવી રહી છે અથવા તો અમુક તત્વોને છૂટછાટ આપવામાં આવી રહી છે. આ વાયરલ વીડિયોએ સમગ્ર મામલાને લોકો સમક્ષ ઉજાગર કર્યો છે અને જવાબદાર અધિકારીઓ દ્વારા તાત્કાલિક અને કડક પગલાં લેવાય તેવી અપેક્ષા રાખવામાં આવી રહી છે.

ગુજરાતના તમામ જિલ્લાના સમાચાર વાંચવા માટે અહીં ક્લિક કરો

Input Credit : Divyesh Vayeda