Vadodara: મકરપુરા પોલીસ સ્ટેશનના PI વી.એન. મહિડા સસ્પેન્ડ, જુગાર કેસના આરોપીઓને છાવરવાનો હતો આરોપ

વડોદરા (Vadodara)ના મકરપુરાના PI વી.એન. મહિડાને સસ્પેન્ડ કરવામાં આવ્યા છે. પોલીસ કમિશનર શમશેર સિંહે PIને સસ્પેન્ડ કરવાનો આદેશ કર્યો છે. મકરપુરા (Makarpura) પોલીસ સ્ટેશનના બે કોન્સ્ટેબલની બદલી બાદ હવે PIને સસ્પેન્ડ કરાયા છે. પોલીસ કોન્સ્ટેબલ તુલસી અને પોલીસ કોન્સ્ટેબલ રાજેન્દ્રની બદલી કરી દેવામાં આવી છે. જુગારકેસના આરોપીઓને છાવરવામાં આવ્યા હોવાની ફરિયાદ ઉઠી હતી તેના પગલે પોલીસ કમિશનરે (Police Commissioner) PIને સસ્પેન્ડ કર્યા છે.

મકરપુરાના PIને કરાયા સસ્પેન્ડ

સમગ્ર ઘટનાની એવી વિગત એવી છે કે થોડા દિવસ પહેલા મકરપુરા પોલીસ દ્વારા એક સ્થળે જુગારની રેડ કરવામાં આવી હતી. આ રેડ દરમિયાન જે આરોપીઓને પકડવામાં આવ્યા હતા તેમને છાવરવામાં આવ્યા હોવાના આક્ષેપ સાથેની એક અરજી પોલીસ કમિશનરને મોકલવામાં આવી હતી. પોલીસ કમિશનર પાસે આવેલી આ અરજીની તપાસ DCB ઝોન-3 યશપાલ ઝઘાનિયાને સોંપવામાં આવી હતી. યશપાલ ઝઘાનિયા દ્વારા સમગ્ર મામલે તપાસ કરવામાં આવી હતી. જેમા તપાસમાં જે આક્ષેપો હતા તેને સમર્થન મળતા શુક્રવારે(2 સપ્ટે.એ) ખુદ DCB ઝોન-3 દ્વારા બે પોલીસ કોન્સ્ટેબલની બદલી કરી દેવામાં આવી હતી.

સાથે જ આ સમગ્ર મામલે પોલીસ કમિશનર દ્વારા જે મુદ્દાઓની તપાસ માગવામાં આવી હતી તેનો અહેવાલ પોલીસ કમિશનરને સોંપવામાં આવ્યો હતો અને આ રિપોર્ટના આધારે પોલીસ કમિશનર શમશેરસિંઘ દ્વારા PI વી.એન. મહિડાને સસ્પેન્ડ કરવામાં આવ્યા છે. ભૂતકાળમાં પણ વી.એન. મહિડા જે પણ પોલીસ મથકોમાં રહ્યા છે ત્યાં વિવાદ કરતા રહ્યા છે અને ફરી એકવાર મકરપુરામાં તેમને મુક્યા બાદ આ જ પ્રકારની પરિસ્થિતિ સર્જાઈ છે.

ઈનપુટ ક્રેડિટ- યુનુસ ગાઝી- વડોદરા