ભાવનગરમાં ફરી એકવાર પેપર થયુ લીક, NCC સર્ટિફિકેટની પરીક્ષાના કલાક પહેલા જ પેપર ફુટતા પરીક્ષા કરાઈ રદ

ભાવનગરમાં ફરી એકવાર પેપર ફુટવાની ઘટના સામે આવી છે. NCC સર્ટિફિકેટની પરીક્ષાનુ પેપર ફુટ્યુ હોવાનુ સામે આવતા પરીક્ષા રદ કરવાની ફરજ પડી હતી. ભાવનગર અને અમરેલી જિલ્લાના 448 જેટલા કેટેડ પરીક્ષા આપવાના હતા. પરંતુ પરીક્ષાના એક કલાક અગાઉ જ પેપર ફુટી જતા પરીક્ષા રદ કરાઈ છે. ત્યારે પરીક્ષા આપવા આવેલા કેડેટનો ગુસ્સો ભભુકી ઉઠ્યો હતો.

ભાવનગર શહેર અને જિલ્લામાં તોડકાંડ, ડમીકાંડ, જીએસટી કાંડ, પેપરકાંડની ઘટનાઓ એક બાદ એક સામે આવી રહી છે. હાલ પેપર ફુટવા અંગે એનસીસી તરફથી આ અંગે કોઈ પ્રતિક્રિયા સામે આવી નથી. NCC વિભાગના ઉચ્ચ અધિકારીઓનો સતત સંપર્ક કરવાના પ્રયાસ છતા તેઓ મીડિયા સમક્ષ આવ્યા ન હતા અને કોઈ પ્રતિક્રિયા પણ આપી નથી.

આ પણ વાંચો: ડુંગળીની નિકાસને કેન્દ્ર સરકારે આપી લીલી ઝંડી, કોંગ્રેસે નિર્ણયને ગણાવ્યો દેખાડા સમાન, ડુંગળી પતી ગયા પછી હટાવાઈ નિકાસબંધી!

ભાજપ સરકારને પેપર લીકનું વ્યસન થઈ ગયુ છે- આપ નેતા પ્રવિણ રામ

આ પેપર ફુટવાની ઘટના અંગે આમ આદમી પાર્ટીના નેતા પ્રવિણ રામે તેમના સોશિયલ મીડિયા એકાઉન્ટ એક્સ પર પ્રતિક્રિયા આપી સરકાર પર પ્રહાર કર્યા. પ્રવિણ રામે જણાવ્યુ કે ભાજપ સરકારને પેપર લીકનું વ્યસન થઈ ગયુ છે. આ પેપરલીકની ઘટનાને પ્રવિણ રામે સરકાર માટે શરમજનક ગણાવી. તેમણે જણાવ્યુ કે જો પેપરલીકની ઘટનાઓ અટકાવી ન શકાય તો મોટા મોટા કાયદાઓ ઘડવાનો શો અર્થ? તેમણે સરકાર પર પ્રહાર કર્યો કે સરકાર પેપરલીકની ઘટનાઓ અટકાવી ન શક્તી હોય તો સ્વૈચ્છિક રાજીનામુ આપી દેવુ જોઈએ.

ભાવનગરમાં અગાઉ પણ બીકોમની સેમેસ્ટર 6ની પરીક્ષાનું  ફુટ્યુ હતુ પેપર

આપને જણાવી દઈએ કે ભાવનગર યુનિવર્સિટીમાં ગત એપ્રિલમાં પણ બીકોમમાં સેમેસ્ટર 6નુ ફાયનાન્સ એકાઉન્ટનુ પેપરલીક થયુ હતુ.  એ બાદ ભાવનગરમાં ચકચારી ડમી કાંડ પણ સામે આવ્યો હતો. જેમા અનેક મોટા નામો બહાર આવ્યા હતા.

Input Credit- Ajit Gadhvi- Bhavnagar

ગુજરાતના તમામ જિલ્લાના સમાચાર વાંચવા માટે અહીં ક્લિક કરો