Breaking News : ઝઘડિયાની મેટ્રોપોલિટન એક્ઝિકેમ દુર્ઘટનામાં માનવ અધિકાર આયોગનો સુઓમોટો, બે સપ્તાહમાં રિપોર્ટ માંગ્યો

ભરૂચ: ઝઘડિયા જીઆઈડીસીમાં આવેલીમેટ્રોપોલિટનએક્ઝિકેમ કેમિકલ કંપનીમાં ગત 23 એપ્રિલ 2026ના રોજ થયેલા ભીષણ વિસ્ફોટ અને આગની ઘટનાના પડઘા હવે છેક દિલ્હી સુધી પડ્યા છે. આ ગંભીર દુર્ઘટનામાં થયેલી જાનહાનિના મીડિયા અહેવાલોના આધારે નેશનલ હ્યુમન રાઇટ્સ કમિશન (NHRC) એ સત્તાવાર રીતે ‘SUO MOTU નોંધ લીધી છે.

આયોગે આ મામલે અત્યંત કડક વલણ અપનાવતા ગુજરાતના મુખ્ય સચિવ અને ભરૂચ પોલીસ અધિક્ષકને નોટિસ પાઠવી રિપોર્ટ માંગ્યો છે. NHRC એ રાજ્ય સરકાર પાસે આગામી બે અઠવાડિયામાં આ આખી ઘટનાનો વિગતવાર રિપોર્ટ માંગ્યો છે. આ ઘટનામાં અત્યારસુધી 3 લોકોએ જીવ ગુમાવ્યો છે.

આયોગે રિપોર્ટમાં કઈ વિગતો માંગી છે?

• પીડિતોની સ્થિતિ: દુર્ઘટનામાં કુલ 3 લોકોના કરુણ મોત નીપજ્યા છે. હાલમાં 10 કામદારો હોસ્પિટલમાં જીવન-મરણ વચ્ચે ઝોલા ખાઈ રહ્યા છે, જ્યારે 3 ને રજા આપવામાં આવી છે. આ તમામની આરોગ્ય સ્થિતિની વિગતો માંગી છે.
• તપાસની પ્રગતિ: પોલીસ અને વહીવટી તંત્ર દ્વારા ઘટના પાછળ જવાબદાર લોકો સામે શું કાર્યવાહી કરવામાં આવી તેની તપાસનો પ્રોગ્રેસ રિપોર્ટ.
• વળતરની વિગત: પીડિત પરિવારો અને ઇજાગ્રસ્તોને કોઈ આર્થિક સહાય કે વળતર ચૂકવવામાં આવ્યું છે કે કેમ, તેની સ્પષ્ટતા પણ આયોગે માંગી છે.

ઉલ્લેખનીય છે કે, 23 એપ્રિલની આ આગે ઔદ્યોગિક સુરક્ષા સામે મોટા સવાલો ઉભા કર્યા હતા. હવે જ્યારે માનવ અધિકાર આયોગે હસ્તક્ષેપ કર્યો છે,ત્યારે જવાબદાર અધિકારીઓ અને કંપની સંચાલકો સામે ગાળિયો કસાય તેવી પૂરેપૂરી શક્યતા છે.