જુનાગઢના મગફળી સંશોધન કેન્દ્ર એ મગફળીમાં કર્યુ ક્રાંતિકારી સંશોધન, જાણો શું છે વિશેષતા ગિરનાર-4 અને ગિરનાર-5 જાતની

જૂનાગઢ મગફળી સંશોધન કેન્દ્ર દ્વારા ‘ગિરનાર 4’ અને ‘ગિરનાર 5’ નામની મગફળીની નવી સંશોધિત જાતોનું સફળ ઉત્પાદન કરવામાં આવ્યું છે. આ નવી જાતો ખેડૂતો માટે આર્થિક રીતે ખૂબ જ ફાયદાકારક સાબિત થઈ રહી છે. સામાન્ય મગફળીની સરખામણીએ આ પાકમાં હેક્ટર દીઠ 35 થી 45 મણ સુધીનું વિક્રમજનક ઉત્પાદન મેળવી શકાશે. આ નવી જાતોની સૌથી મોટી વિશેષતા એ છે કે તેમાં રોગપ્રતિકારક શક્તિમાં ઉત્તમ ફેરફાર કરવામાં આવ્યા છે, જેના કારણે પાકને રોગ-જીવાત ઓછી લાગે છે. એટલું જ નહીં, આ પાક ઓછી સિંચાઈ એટલે કે ઓછા પાણીમાં પણ ભરપૂર ઉત્પાદન આપે છે. આ ઉપરાંત, પાક તૈયાર થયા બાદ પશુઓ માટે પૌષ્ટિક અને કિંમતી લીલો ચારો પણ વિપુલ પ્રમાણમાં મળી રહે છે. માત્ર ખેડૂતો માટે જ નહીં, પરંતુ ગ્રાહકોના સ્વાસ્થ્ય માટે પણ આ મગફળીનું તેલ અમૃત સમાન છે.

આ મગફળીના તેલમાં ‘ઓલેઈક એસિડ’નું પ્રમાણ 60 ટકાથી વધીને 80 ટકા સુધી પહોંચ્યું છે. જેના કારણે આ તેલ હૃદયરોગના દર્દીઓ માટે અત્યંત રામબાણ ઈલાજ સમાન બની રહે છે. બજારમાં મળતા ખૂબ જ મોંઘા ઓલિવ ઓઈલનો આ એક શ્રેષ્ઠ અને સસ્તો વિકલ્પ છે, જે માત્ર 250 થી 300 રૂપિયા પ્રતિ લીટરમાં ઉપલબ્ધ થઈ શકશે. ​આ તેલની સંગ્રહ ક્ષમતા પણ ખૂબ જ વધારે છે, જેથી તે લાંબા સમય સુધી તાજું રહે છે અને ખરાબ થતું નથી. સામાન્ય રીતે તેલ એકવાર વાપર્યા પછી કાળું પડી જતું હોય છે, પરંતુ આ તેલને 4 થી 5 વાર તળવા માટે વપરાશમાં લીધા છતાં તેની ગુણવત્તા સુરક્ષિત રહે છે અને તે સ્વાદિષ્ટ રહે છે. હાલમાં યોજાયેલા કૃષિ સેમિનારમાં બિયારણ પ્રદર્શન સ્ટોલ પર ખેડૂતોને આ અંગેની વિગતવાર માહિતી આપવામાં આવી હતી, જેને ખેડૂતો તરફથી ખૂબ જ ઉત્સાહજનક પ્રતિસાદ મળ્યો છે. આમ, જુનાગઢના વૈજ્ઞાનિકોનું આ સંશોધન ખેડૂતોની સમૃદ્ધિ વધારવાની સાથે સાથે સામાન્ય લોકોના સ્વાસ્થ્યની રક્ષા કરવામાં પણ માઇલસ્ટોન સાબિત થશે.

Input Credit- Vijaysinh Parmar- Junagadh

દુબઈની ફ્લાઈટમાં કેપ્ટન સ્મિત મચ્છર પર હુમલો કરતા પહેલા ઓમાની પાયલટ શું બોલ્યો? આ કથિત આતંકી પાયલોટનું નામ કેમ જાહેર નથી કરાયુ?