મેહોણાવાસીઓને સોમનાથ, દ્વારકા અને હરિદ્વાર જવા માટે હવે મળશે સીધી ટ્રેન, ત્રણ નવી ટ્રેનને મંજૂરી
મહેસાણાવાસીઓ માટે રેલવે કનેક્ટિવિટીમાં નોંધપાત્ર વધારો થયો છે. ત્રણ નવી ટ્રેનોને મંજૂરી મળતાં હરિદ્વાર, સોમનાથ અને દ્વારકા જેવા ધાર્મિક સ્થળો સાથે ઉત્તર ગુજરાતનું જોડાણ વધુ મજબૂત બનશે. વેરાવળ-હરિદ્વાર ટ્રેનને મહેસાણામાં સ્ટોપેજ મળ્યું છે, જ્યારે સોમનાથ અને દ્વારકા માટે સીધી ટ્રેન સેવાઓ ઉપલબ્ધ થશે. હવે ઉત્તર ગુજરાતના મુસાફરોને ધાર્મિક યાત્રા કરવી સરળ બનશે.
મહેસાણાવાસીઓ માટે રેલવે કનેક્ટિવિટીના ક્ષેત્રમાં એક મોટી અને મહત્વપૂર્ણ ભેટ મળી છે. ઉત્તર ગુજરાતના મુસાફરો માટે હરિદ્વાર, સોમનાથ અને દ્વારકા જેવા ધાર્મિક સ્થળો સાથે જોડાણ વધારતી ત્રણ નવી ટ્રેનોને મંજૂરી આપવામાં આવી છે, જે મુસાફરીને વધુ સરળ અને સુવિધાજનક બનાવશે.
આ નવી સેવાઓમાં, વેરાવળથી હરિદ્વાર જતી ટ્રેનને મહેસાણામાં સ્ટોપેજ આપવામાં આવ્યું છે. આ સ્ટોપેજથી મહેસાણા અને આસપાસના વિસ્તારોના મુસાફરોને હરિદ્વાર પહોંચવામાં ખુબ જ ફાયદો થશે. સોમનાથ જવા ઇચ્છતા મુસાફરો માટે પણ હવે સીધી ટ્રેનની સુવિધા ઉપલબ્ધ બનશે, જે લાંબા સમયથી પ્રતીક્ષામાં હતી.
દ્વારકા જવા માટે પણ મુસાફરોની સુવિધામાં વધારો થયો છે. ઓખા-હરિદ્વાર વચ્ચે નવી ટ્રેન શરૂ કરવાની જાહેરાત કરવામાં આવી છે, જે દ્વારકા માટે સીધી કનેક્ટિવિટી પૂરી પાડશે. આ ઉપરાંત, બાંદ્રા-દિલ્હી ટ્રેનને હરિદ્વાર સુધી લંબાવવામાં આવી છે, જેનાથી ઉત્તર ગુજરાતના મુસાફરોને અનેક ધાર્મિક સ્થળો સાથે વધુ સારી કનેક્ટિવિટી મળશે.
આ નિર્ણયથી ધાર્મિક યાત્રા કરતા મુસાફરો ઉપરાંત પ્રવાસીઓ અને વેપારીઓને પણ મોટો લાભ થશે. સાંસદ હરિભાઈ પટેલે આ મહત્વપૂર્ણ નિર્ણય બદલ રેલવેમંત્રી અશ્વિની વૈષ્ણવનો આભાર વ્યક્ત કર્યો છે. આ નવી રેલવે સેવાઓ ઉત્તર ગુજરાતના પરિવહન નેટવર્ક માટે અત્યંત મહત્વપૂર્ણ ગણાઈ રહી છે.
Input Credit- Manish Mistri-Mehsana
