Ahmedabad Breaking News : AMC ફૂડ વિભાગ એક્શન મોડમાં, 15 ગરબા ગ્રાઉન્ડ્સ પર 148 સ્ટોલ્સનું ચેકિંગ ! જુઓ Video
અમદાવાદમાં નવરાત્રિ દરમિયાન AMCના ફૂડ વિભાગે 15 ગરબા સ્થળોએ 148 ફૂડ સ્ટોલ્સની તપાસ કરી હતી. રજિસ્ટ્રેશન વગરના 41 સ્ટોલ્સનું સ્થળ પર રજિસ્ટ્રેશન કરાયું હતું. જ્યારે 35 ખાદ્ય પદાર્થોના પ્રાથમિક ટેસ્ટમાં તમામ નમૂના નિર્ધારિત માપદંડો મુજબના જણાયા હતા.
નવરાત્રિ દરમિયાન ગરબા સ્થળોએ ખાદ્ય પદાર્થોની ગુણવત્તા અને સ્વચ્છતા જાળવવા અમદાવાદ મ્યુનિસિપલ કોર્પોરેશન (AMC)ના ફૂડ વિભાગ દ્વારા તપાસ હાથ ધરવામાં આવી હતી. શહેરનાં 15 ગરબા સ્થળોએ આવેલા કુલ 148 ફૂડ સ્ટોલ્સની ચકાસણી કરવામાં આવી હતી. તપાસ દરમિયાન 41 સ્ટોલ્સનું રજિસ્ટ્રેશન ન થયું હોવાનું સામે આવ્યું હતું. જેના પગલે સ્થળ પર જ આ તમામ સ્ટોલ્સનું રજિસ્ટ્રેશન કરવામાં આવ્યું હતું.
પદાર્થો નિર્ધારિત માપદંડો મુજબના જણાયા
AMCના ફૂડ વિભાગ દ્વારા ફૂડ સ્ટોલ્સ પરથી ખાદ્ય પદાર્થોના કુલ 41 નમૂના લેવામાં આવ્યા હતા. આ ઉપરાંત, સ્થળ પર જ 35 ખાદ્ય પદાર્થોના પ્રાથમિક ટેસ્ટ પણ કરવામાં આવ્યા હતા. પ્રાથમિક તપાસમાં તમામ ખાદ્ય પદાર્થો નિર્ધારિત માપદંડો મુજબના જણાયા હતા. આ તપાસ દરમિયાન આયોજકો સામે કોઈ નોટિસ જારી કરવામાં આવી નહોતી કે અન્ય કોઈ કાર્યવાહી કરવામાં આવી નહોતી. જોકે, તહેવાર દરમિયાન ખાદ્ય પદાર્થોની ગુણવત્તા, સ્વચ્છતા અને ખાદ્ય સુરક્ષાના નિયમોનું પાલન થાય તે માટે AMC દ્વારા આયોજકો અને ફૂડ સ્ટોલ ધારકોને અપીલ કરવામાં આવી હતી.
આયોજકોએ લાગુ પડતા નિયમોનું પાલન કરવું જરૂરી
AMCના ફૂડ વિભાગે સ્પષ્ટ કર્યું છે કે તમામ સ્ટોલ ધારકો અને આયોજકોએ લાગુ પડતા નિયમોનું પાલન કરવું જરૂરી છે. ખાદ્ય સુરક્ષાના નિયમોનું ઉલ્લંઘન કરનાર સામે નિયમ મુજબ કાર્યવાહી કરવામાં આવશે. નવરાત્રિ દરમિયાન મોટી સંખ્યામાં લોકો ગરબા રમવા અને ખાણીપીણીનો આનંદ માણવા વિવિધ સ્થળોએ પહોંચતા હોય છે. આવી સ્થિતિમાં ખાદ્ય પદાર્થોની ગુણવત્તા અને સ્વચ્છતા જાળવવી મહત્ત્વપૂર્ણ છે. AMCની આ તપાસનો હેતુ તહેવાર દરમિયાન લોકોને સુરક્ષિત અને ગુણવત્તાયુક્ત ખાદ્ય પદાર્થો મળી રહે તે સુનિશ્ચિત કરવાનો છે.
