કોંગ્રેસનું મનોમંથન : ગુજરાતની ચૂંટણી પહેલા કોંગ્રેસની ચિંતન શિબિર, 400થી વધુ દિગ્ગજ નેતાઓ રહેશે હાજર

Gujarat Assembly Election : ભાજપ બાદ હવે કોંગ્રેસ પણ ગુજરાત અને હિમાચલ વિધાનસભાની આગામી ચૂંટણી પહેલા એક્શનમાં જોવા મળી રહી છે. રાજસ્થાનના ઉદયપુરમાં આજથી કોંગ્રેસની ત્રણ દિવસીય નવ સંકલ્પ ચિંતન શિબર શરૂ થઈ રહ્યું છે. કોંગ્રેસની (Congress) ચિંતન શિબિર 13 થી 15 મે સુધી ચાલશે. આ ચિંતન શિબિરમાં (Congress chintan shivir) ચૂંટણીમાં સતત હારનો સામનો કરી રહેલી કોંગ્રેસ તેની પુનઃરચના અને ધ્રુવીકરણની રાજનીતિનો સામનો કરવા માટે વ્યૂહરચના ઘડશે. આ શિબિરમાં કોંગ્રેસના 400થી વધુ દિગ્ગજો ભાગ લેશે. કેમ્પમાં સામેલ થવા માટે રાહુલ ગાંધી (Rahul Gandhi) ટ્રેન દ્વારા ઉદયપુર પહોંચશે.

જેમાં સોનિયા ગાંધી અને પ્રિયંકા ગાંધી વાડ્રા પણ હાજરી આપશે. કહેવામાં આવી રહ્યું છે કે આ ચિંતન શિબિરમાં ઘણા મુદ્દાઓ પર મંથન કરવું પડશે. સાથે જ એ વાત પણ બહાર આવી રહી છે કે છાવણીમાં પાર્ટીના નેતાઓ અને કાર્યકરો રાહુલ ગાંધીને કોંગ્રેસ અધ્યક્ષ બનાવવાની માંગ કરી શકે છે.

વિધાનસભા ચૂંટણીમાં મળેલી હારની સમીક્ષા થશે

આ વર્ષની શરૂઆતમાં પાંચ રાજ્યોની વિધાનસભાની ચૂંટણીમાં પાર્ટીની હારની પૃષ્ઠભૂમિમાં ચિંતન શિબિરનું આયોજન કરવામાં આવી રહ્યું છે. છેલ્લા આઠ વર્ષમાં યોજાયેલી ચૂંટણીમાં પાર્ટીને અનેક ચૂંટણી હારનો સામનો કરવો પડ્યો છે. કોંગ્રેસે તેના કેટલાક અગ્રણી ચહેરાઓની વિદાય પણ જોઈ છે. ચિંતન શિબિર સોનિયા ગાંધીના લોકોને સંબોધનથી શરૂ થશે અને 15 મેના રોજ રાહુલ ગાંધીના ભાષણ સાથે સમાપ્ત થશે.