Technology: Twitter પર પણ પોડકાસ્ટ કરી શકશે યુઝર્સ, જલ્દી જ ઉપલબ્ધ થશે ફિચર, જાણો કેવી રીતે મળશે સુવિધા

આજકાલ પોડકાસ્ટ (Podcast)નો ટ્રેન્ડ વધી રહ્યો છે. હવે ટ્વિટર (Twitter) પણ આ ઓડિયો ફીચર લોન્ચ કરવાની તૈયારી કરી રહ્યું છે. ટ્વિટરની લાઈવ ઑડિયો પ્રોડક્ટ સ્પેસ છેલ્લા બે વર્ષમાં વધુને વધુ લોકપ્રિય બની છે. તેને જોતા હવે કંપની તેના યુઝર્સને વધુ એક ઓડિયો ફીચર આપવા જઈ રહી છે. જો કે હજુ એ સ્પષ્ટ નથી થયું કે ટ્વિટરનું પોડકાસ્ટ (Twitter podcast) ફીચર એક સ્વતંત્ર ફીચર હશે કે સ્પેસનું જ વિસ્તરણ હશે. રિવર્સ એન્જિનિયર જેન મંચુન વાંગે આ નવું ફીચર જોયું છે. તેણે તેનો સ્ક્રીનશોટ પણ શેયર કર્યો છે.

સામે આવ્યો નવા ફિચરનો સ્ક્રીનશોટ

રિવર્સ એન્જિનિયર જેન મંચુન વાંગ દ્વારા શેયર કરાયેલ સ્ક્રીનશોટમાં એપ્લિકેશનના નીચેના બાર મેનૂમાં માઈક્રોફોન આઈકોન જોવા મળી રહ્યું છે. આના પર ટેપ કરવા પર વપરાશકર્તાઓને ‘પોડકાસ્ટ’ પેજ પર રીડાયરેક્ટ કરવામાં આવે છે. જો કે નવી સુવિધા કેવી રીતે કાર્ય કરશે તે વિશે જેને વધુ ખુલાસો કર્યો નથી. પોડકાસ્ટ ટેબ બધા વપરાશકર્તાઓ માટે ઉપલબ્ધ થાય તે પહેલા થોડો સમય લાગશે.

Spaces સાથે જોડાયેલ હોઈ શકે છે ટેબ

નોંધનીય છે કે વર્ષ 2020માં ટ્વિટર ક્લબહાઉસ ઓડિયો એપની તર્જ પર સ્પેસ ફીચર લાવ્યું હતું. યુઝર્સે તેને ખૂબ પસંદ કર્યું છે. ટ્વિટરએ સોશિયલ પોડકાસ્ટ પ્લેટફોર્મ બ્રેકર કંપની હસ્તગત કર્યા પછી તેની ઓડિયો-આધારિત સેવાઓમાં ઘણા ફેરફારો કર્યા છે. સહાયક પોડકાસ્ટની સાથે કંપની સર્જકોને કમાવાની નવી તકો આપી શકે છે અને બાદમાં ઓડિયો જાહેરાતોને પણ તેનો એક ભાગ બનાવી શકે છે.

રેકોર્ડિંગનો આપ્યો વિકલ્પ

થોડા દિવસો પહેલા ટ્વિટરે સ્પેસ ફીચરમાં નવું અપડેટ આપ્યું હતું. આ અપડેટ પછી મોબાઈલ યુઝર્સ ચેટરૂમ બનાવી શકશે અને તેમાં થઈ રહેલી વસ્તુઓને રેકોર્ડ કરી શકશે. આ રીતે સ્પેસ સેશનને રેકોર્ડ કરી શકાય છે અને પોડકાસ્ટની જેમ સાંભળી અથવા શેયર કરી શકાય છે. આ રેકોર્ડિંગ માત્ર 30 દિવસ માટે સેવ રહે છે. એક અલગ પોડકાસ્ટ સુવિધા સાથે Twitter Spotify અથવા Apple Podcasts સાથે સ્પર્ધા કરી શકે છે.

આ પણ વાંચો: DAP, NPK, Neem અને Urea ખાતરનો ક્યારે અને કેટલા પ્રમાણમાં કરવો જોઈએ ઉપયોગ ? જાણો તમામ વિગત

આ પણ વાંચો: Tech News: એવું તો શું થયુ કે યુક્રેનના લોકો આટલી મોટી સંખ્યામાં ડાઉનલોડ કરી રહ્યા છે ટ્રાન્સલેશન એપ, જાણો કારણ