વોટ્સએપ વિશ્વભરમાં 2 બિલિયનથી વધુ વપરાશકર્તાઓ સાથેનું લોકપ્રિય મેસેજિંગ પ્લેટફોર્મ છે. મેટાની માલિકીની આ કંપની તેના વપરાશકર્તાઓ માટે એપ્લિકેશન અનુભવને બહેતર બનાવવા માટે નવા નવા ફીચર્સ લાવતી રહે છે. હવે એવા સમાચાર છે કે વોટ્સએપ તેની ડેસ્કટોપ એપમાં કોલ હિસ્ટ્રી ટ્રેકિંગની સુવિધા આપી શકે છે. WaBetaInfoના એક નવા સમાચારમાં આ દાવો કરવામાં આવ્યો છે.
WaBetaInfo એક ઓનલાઈન ટ્રેકર છે જે WhatsAppના નવા અને આવનારા ફીચર્સ શોધી કાઢે છે. સમાચાર અનુસાર, WhatsAppએ Microsoft Store પર Windows 2.2246.4.0 અપડેટ માટે તેનું બીટા વર્ઝન રિલીઝ કર્યું છે, જેમાં ડેસ્કટૉપ એપની અંદરથી કૉલ હિસ્ટ્રી મેનેજ કરવાની ક્ષમતા છે. દેખીતી રીતે આ ફીચર હાલમાં માત્ર ડેસ્કટોપ બીટા યુઝર્સ માટે જ ઉપલબ્ધ છે.
સમાચારમાં એક સ્ક્રીનશોટ શેર કરવામાં આવ્યો છે. આમાં, વોટ્સએપનો ઉપયોગ કરવા પર એક નવી કોલ ટેબ દેખાઈ રહી છે. નવા ટેબમાં યુઝર્સ વોટ્સએપની ડેસ્કટોપ એપમાં તેમના કોલ હિસ્ટ્રીની યાદી જોઈ શકે છે. તેઓ કોલ કાર્ડ ખોલીને કોલ વિશે પણ માહિતી મેળવી શકશે. રિપોર્ટમાં જણાવવામાં આવ્યું છે કે, “જોકે આ એપ બીટા વર્ઝન હોવાથી, બની શકે છે કે કોલ હિસ્ટ્રી તમારા મોબાઈલ ઉપકરણ સાથે તરત જ સિંક થઈ શકશે નહીં.” અપડેટેડ વર્ઝનમાં આ ફિક્સ થવાની અપેક્ષા છે. અત્યારે તે માત્ર થોડાક બીટા યુઝર્સ માટે રોલઆઉટ કરવામાં આવ્યું છે અને તેને ધીમે ધીમે વધુ બીટા ટેસ્ટર્સ સુધી પહોંચાડવામાં આવે તેવી અપેક્ષા છે.
અહેવાલો અનુસાર, WhatsApp તેના ડેસ્કટોપ વપરાશકર્તાઓ માટે એક નવા ફીચર પર કામ કરી રહ્યું છે. આને સ્ક્રીન લોક કહેવામાં આવે છે. આમાં, કોઈપણ વપરાશકર્તા જ્યારે પણ એપ્લિકેશન ખોલશે, ત્યારે પાસવર્ડ પૂછવામાં આવશે. આ વોટ્સએપમાં સુરક્ષાનું એક વધારાનું સ્તર ઉમેરશે અને જ્યારે યુઝર પોતે વોટ્સએપનો ઉપયોગ ન કરી રહ્યા હોય, ત્યારે તેના વોટ્સએપને અન્ય કોઈની પહોંચથી દૂર રાખવામાં આવશે. WaBetaInfo ના રિપોર્ટ અનુસાર, આ ફીચર હાલમાં ડેવલપમેન્ટ હેઠળ છે અને ભવિષ્યમાં કેટલાક બીટા ટેસ્ટર્સ માટે રિલીઝ થવાની અપેક્ષા છે.