Tech News: દેશમાં આ મહિનાથી શરૂ થશે 5G સેવા, અશ્વિની વૈષ્ણવે કહ્યું ટૂંક સમયમાં થશે સ્પેક્ટ્રમની હરાજી
5G Service In India: ટેલિકોમ રેગ્યુલેટરી ઓથોરિટી ઓફ ઈન્ડિયા (TRAI) દ્વારા આયોજિત એક ઈવેન્ટમાં અશ્વિની વૈષ્ણવે કહ્યું હતું કે ડિજિટલ અંતરને ઘટાડવું એક એવી દુનિયામાં વધુ મહત્વનું બની જાય છે જ્યાં ટેક્નોલોજી આર્થિક વિકાસમાં મહત્ત્વપૂર્ણ ભૂમિકા ભજવી રહી છે.
કેન્દ્રીય મંત્રી અશ્વિની વૈષ્ણવે બુધવારે કહ્યું કે 5G સેવાઓ માટે લગભગ સંપૂર્ણ તૈયારીઓ કરી લેવામાં આવી છે. આ સેવા સપ્ટેમ્બર-ઓક્ટોબર સુધીમાં શરૂ થશે. ટેલિકોમ રેગ્યુલેટરી ઓથોરિટી ઓફ ઈન્ડિયા (TRAI) દ્વારા આયોજિત એક ઈવેન્ટમાં તેમણે કહ્યું હતું કે ડિજિટલ અંતરને ઘટાડવું એક એવી દુનિયામાં વધુ મહત્વનું બની જાય છે જ્યાં ટેક્નોલોજી આર્થિક વિકાસમાં મહત્ત્વપૂર્ણ ભૂમિકા ભજવી રહી છે. આથી સરકાર પણ સમાવેશી વૃદ્ધિ સુનિશ્ચિત કરવા તમામ પ્રયાસો કરી રહી છે. દેશમાં આ વર્ષે સપ્ટેમ્બર-ઓક્ટોબરથી સ્વદેશી 5G (5G Service In India) સેવા શરૂ થશે. 5G દ્વારા 1.5 લાખથી વધુ નોકરીઓનું સર્જન થવાની અપેક્ષા છે.
તેમણે ખાતરી આપી કે આ ટેક્નોલોજી સારી અને ઓછી કિંમત સાથે સારી ગુણવત્તાની હશે. ટ્રાઈના ચેરમેન પીડી વાઘેલાએ જણાવ્યું હતું કે ભારતના 13 શહેરોમાં પ્રારંભિક તબક્કે 5જી સેવાઓ શરૂ થશે. ત્યારબાદ તેને તબક્કાવાર સમગ્ર દેશમાં શરૂ કરવામાં આવશે.
નોકરીઓનું થશે સર્જન
ટેલિકોમ સચિવ કે રાજારામને જણાવ્યું હતું કે ભારત નેટથી લઈને સ્પેસ કોમ્યુનિકેશન અને 5G થી લઈ ફિક્સ્ડ લાઇન બ્રોડબેન્ડ સેવાઓ સુધીના ક્ષેત્રોમાં મોટી સંખ્યામાં નોકરીઓનું સર્જન કરશે. તે ક્ષેત્રોમાં વધુ નોકરીઓનું સર્જન થશે, જ્યાં હજુ ઘણી ઓછી છે. ટૂંક સમયમાં અમે નીતિગત અવરોધોને દૂર કરવાની આશા રાખીએ છીએ.
કાઉન્સિલ એક લાખ લોકોને તાલીમ આપશે
ટેલિકોમ સેક્ટર સ્કિલ કાઉન્સિલે જણાવ્યું હતું કે 5G, ક્લાઉડ કમ્પ્યુટિંગ, આર્ટિફિશિયલ ઇન્ટેલિજન્સ, બિગ ડેટા એનાલિસિસ જેવી નવી ટેક્નોલોજી ભૂમિકાઓમાં 1.5 લાખથી વધુ વ્યાવસાયિકોની માગ છે. આ સેક્ટરમાં માગ અને પુરવઠા વચ્ચે 28 ટકાનું અંતર છે, જે વધતું રહેશે. કાઉન્સિલ 3 વર્ષમાં એક લાખ લોકોને 5G સેવાઓ માટે તાલીમ આપશે.