Tech News: NASAએ ફરીથી રદ્દ કર્યું Artemis-Iનું લોન્ચિંગ, હવે આ કારણે કર્યું રોલબેક

નાસાનું આર્ટેમિસ 1 મૂન મિશન (Artemis-I Moon Mission) જાણે પૃથ્વી પર જ રહી જશે. નાસાએ ફરી એકવાર આ ખાસ મિશનનું લોન્ચિંગ રદ કરવું પડ્યું છે. આ વખતે તોફાને નાસાની તૈયારીઓ પર પાણી ફેરવી દીધું છે. ફ્લોરિડામાં ભારે વાવાઝોડાની આશંકા બાદ નાસા (NASA) દ્વારા જાહેર કરવામાં આવેલા નિવેદનમાં કહેવામાં આવ્યું છે કે તેણે આ ઐતિહાસિક માનવરહિત મિશનના પ્રક્ષેપણને રદ કરવું પડ્યું છે. નાસાએ કહ્યું કે ઉષ્ણકટિબંધીય તોફાન ઈયાન સંબંધિત હવામાનની આગાહીઓ પર ધ્યાન આપવામાં આવી રહ્યું છે. જો કે સ્પેસ ઓર્ગેનાઈઝેશને આ ક્ષણે આગળના પ્રક્ષેપણ વિશે કોઈ નક્કર માહિતી આપી નથી.

યુએસ નેશનલ હરિકેન સેન્ટરના એક નિવેદનમાં કહેવામાં આવ્યું છે કે ઉષ્ણકટિબંધીય તોફાન ઈયાન ફ્લોરિડા તરફ આગળ વધી રહ્યું છે અને તે ફ્લોરિડા પહોંચે ત્યાં સુધીમાં સપ્તાહના અંતમાં વધુ તીવ્ર થવાની ધારણા છે, જ્યાંથી નાસા તેના ઐતિહાસિક મિશનને શરૂ કરવાની તૈયારી કરી રહ્યું છે. જો કે, આર્ટેમિસ 1 ટીમ રવિવારે વિશાળ સ્પેસ લોંચ સિસ્ટમને વ્હીકલ એસેમ્બલી બિલ્ડિંગમાં પરત લાવવાનો નિર્ણય લેશે.

17-31 ઓક્ટોબર વચ્ચે થઈ શકે છે લોન્ચ

એવું કહેવામાં આવી રહ્યું છે કે જે SLS રોકેટ સાથે મિશન લોન્ચ કરવામાં આવનાર છે, તે લોન્ચ પેડ પર 137 કિલોમીટર પ્રતિ કલાકની ઝડપે હવાનો સામનો કરી શકે છે. ઘણી વખત રદ થયા બાદ મિશનના પ્રક્ષેપણ માટે નવી લોન્ચ વિન્ડો 4 ઓક્ટોબર સુધી નક્કી કરવામાં આવી હતી, પરંતુ આ મિશનને તૈયાર કરનારી ટીમનું માનવું છે કે વાવાઝોડાના ભયને કારણે તે અશક્ય છે. પરંતુ હવે એવું કહેવામાં આવી રહ્યું છે કે આગામી લોન્ચ વિન્ડો 24-26 અને 28 ઓક્ટોબર સિવાય આગામી દિવસોમાં મિશન 17-31 ઓક્ટોબરની વચ્ચે લોન્ચ થઈ શકે છે.

અમેરિકાએ અબજો ડોલર ખર્ચ્યા

નાસાનું આ મિશન ઘણી રીતે ખાસ છે. તેની સફળતાથી આગામી વર્ષોમાં ચંદ્રની યાત્રાને વધુ સુવિધાજનક બનાવી શકાશે. આર્ટેમિસ 1 સ્પેસ મિશન સાથે નાસા SLS રોકેટ અને માનવરહિત ઓરિઓન કેપ્સ્યુલનું પરીક્ષણ કરવાનો પ્રયાસ કરી રહ્યું છે. અમેરિકાએ આ મિશનને તૈયાર કરવામાં અબજો ડોલરનો ખર્ચ કર્યો છે, જેના લોન્ચિંગમાં વિલંબથી અમેરિકાને નુકસાન પણ થઈ શકે છે. અગાઉ ફ્યુઅલ ટેન્કમાં ટેક્નિકલ ખામીના કારણે મિશનને રદ કરવું પડ્યું હતું.