આ વર્ષના અંત સુધીમાં 20-25 શહેરો અને નગરોમાં 5G સેવાઓ શરૂ કરવામાં આવશે તેવું ટેલિકોમ પ્રધાન અશ્વિની વૈષ્ણવે (Ashwini Vaishnaw) શનિવારે જણાવ્યું હતું. તેમણે એ પણ સંકેત આપ્યો કે નવી સેવાઓની રજૂઆત સાથે વિશ્વના અન્ય દેશોની તુલનામાં ભારતમાં ડેટાની કિંમતો ઓછી રહેશે. ભારતમાં વર્તમાન ડેટા કિંમતો વૈશ્વિક સરેરાશ કરતા ઘણી ઓછી છે. વૈષ્ણવે કહ્યું કે 5Gની જમાવટ ઓગસ્ટ-સપ્ટેમ્બરથી શરૂ થશે. મંત્રીએ કહ્યું કે ભારત 4G અને 5G સ્ટેક્સ વિકસાવી રહ્યું છે અને ડિજિટલ નેટવર્ક્સમાં વિશ્વ માટે વિશ્વસનીય સ્ત્રોત તરીકે તેની સ્થિતિ મજબૂત કરવા તૈયાર છે. તેમણે TV9 – What India Thinks Global Summitમાં કહ્યું કે ઘણા દેશો ભારત દ્વારા વિકસાવવામાં આવી રહેલી 4G અને 5G પ્રોડક્ટ્સ અને ટેક્નોલોજીઓને પ્રાથમિકતા આપવા માંગે છે.
વૈષ્ણવે કહ્યું કે મંત્રાલય પ્રમોશનલ કૉલ્સના મુદ્દાને ઉકેલવા માટે એક મહત્વપૂર્ણ નિયમન પર કામ કરી રહ્યું છે. આ હેઠળ કોઈપણ કોલરનું KYC જાણી શકાય છે. તેમણે કહ્યું હું વિશ્વાસ સાથે કહી શકું છું કે વર્ષના અંત સુધીમાં ઓછામાં ઓછા 20-25 શહેરો અને નગરોમાં 5G તૈનાત થઈ જશે.
જ્યારે 5G સેવાઓની કિંમત વિશે પૂછવામાં આવ્યું ત્યારે અશ્વિની વૈષ્ણવે કહ્યું કે આજે પણ ભારતમાં ડેટા રેટ 2 યુએસ ડોલરની આસપાસ છે, જ્યારે વૈશ્વિક સરેરાશ 25 યુએસ ડોલર છે. તેમણે કહ્યું કે આ જ વલણ અન્ય ક્ષેત્રોમાં પણ રહેશે.
5G સ્પેક્ટ્રમ પર નવો હંગામો થયો છે. આ વખતે આ ક્ષેત્રમાં ટેક કંપનીઓ અને ટેલિકોમ ઓપરેટરો લશ્કર સાથે સામસામે છે. 5G નેટવર્કને લઈને બ્રોડબેન્ક ઈન્ડિયા ફોરમ એટલે કે BIF અને Amazon India, Meta, TCS, L&T જેવી કંપનીઓના સર્વિસ પ્રોવાઈડર વચ્ચે વિવાદ ચાલી રહ્યો છે. BIF સાથે સંકળાયેલી કંપનીઓ ઈચ્છે છે કે સરકારે વિશ્વની તર્જ પર ભારતમાં તેમને સીધું સ્પેક્ટ્રમ આપવું જોઈએ અને તેના પર નજીવી વહીવટી ફી લેવી જોઈએ.
આ કંપનીઓ એવો પણ દાવો કરે છે કે તેમને જાહેર નેટવર્ક સાથે કોઈ લેવાદેવા નથી, તેથી દેશની સુરક્ષા માટે કોઈ ખતરો નથી. આટલું જ નહીં તેમની પાસેથી સરકારને ઘણી આવક પણ થશે. તેનાથી વિપરિત ટેલિકોમ ઓપરેટરોની સંસ્થા સેલ્યુલર ઓપરેટર્સ એસોસિએશન (COAI)એ સ્પષ્ટપણે જણાવ્યું છે કે જો આ ખાનગી સાહસોને કેપ્ટિવ નેટવર્ક સ્થાપવાની મંજૂરી આપવામાં આવશે તો ટેલિકોમ ઓપરેટરો માટે વ્યવસાય કરવા માટે તે નિરર્થક બનશે.