Happy Birthday Pullela Gopichand: બનવું હતું ક્રિકેટર, બન્યા બેડમિન્ટન ખેલાડી અને પછી કોચ તરીકે નામના મેળવી

Happy Birthday Pullela Gopichand: ક્રિકેટમાં ભારત લાંબા સમયથી વૈશ્વિક શક્તિ રહ્યું છે. પરંતુ એવી અન્ય રમતો પણ છે જ્યાં ભારતે ઝંડો લહેરાવ્યો છે. તેમાંથી એક બેડમિન્ટન છે.

ભારત તાજેતરના સમયમાં બેડમિન્ટનમાં ખૂબ જ સફળ રહ્યું છે અને છેલ્લી ત્રણ ઓલિમ્પિકથી દરેક ઓલિમ્પિકમાં આ રમતમાં મેડલ જીતી રહ્યું છે. ભારતે લંડન ઓલિમ્પિક-2012 (London Olympics-2012), રિયો ઓલિમ્પિક્સ-2016 (Rio Olympics-2016)અને ટોક્યો ઓલિમ્પિક્સ-2020 (Tokyo Olympics-2020)માં આ રમતમાં મેડલ જીત્યા છે. એવું નથી કે, અગાઉ આ રમતમાં ભારતની ખ્યાતિ નહોતી. પરંતુ માત્ર એક-બે ખેલાડીઓ જ ચમક્યા હતા.

તેમાં પ્રકાશ પાદુકોણ, સૈયદ મોદી જેવા નામ સામેલ હતા, પરંતુ આ ખેલાડીઓ ઓલિમ્પિક મેડલ જીતી શક્યા ન હતા. તાજેતરમાં ભારતે આ રમતમાં જે સફળતા મેળવી છે તેનો શ્રેય હાલમાં ટીમના રાષ્ટ્રીય કોચ પુલેલા ગોપીચંદ (Pullela Gopichand)ને જાય છે. આજે ગોપીચંદનો જન્મદિવસ છે. ગોપીચંદનો જન્મ 16 નવેમ્બર 1973ના રોજ થયો હતો.

ગોપીચંદ પોતે એક મહાન ખેલાડી હતા. પ્રકાશ પાદુકોણ પછી જો કોઈએ ભારતીય બેડમિન્ટનની જવાબદારી સંભાળી હોય તો તે ગોપીચંદ હતા. તેણે આ ગેમની ટ્રિક પ્રકાશ પાદુકોણ પાસેથી શીખી હતી. 2001માં ઓલ ઈંગ્લેન્ડ બેડમિન્ટન ચેમ્પિયનશિપ જીતવી એ તેની કારકિર્દીની મોટી સિદ્ધિ હતી.

આ ટુર્નામેન્ટ જીતનાર તે બીજો ખેલાડી હતો. તેમના પહેલા આ કામ માત્ર પ્રકાશ પાદુકોણ જ કરી શક્યા હતા. ઇજાઓને કારણે ગોપીચંદની કારકિર્દી પર ભારે અસર પડી હતી. તે એકવાર પ્લાસ્ટરવાળા પગ સાથે રમ્યો હતો. આ વાત 1996ની છે, જ્યારે સાર્ક બેડમિન્ટન ટૂર્નામેન્ટમાં રમતી વખતે તેને ઘૂંટણમાં ઈજા થઈ હતી, પરંતુ ગોપીચંદ હિંમત ન હાર્યા અને રમ્યા.

કોચ તરીકે સફળ

એક ખેલાડી તરીકે ગોપીચંદ ઘણી સફળતાઓથી વંચિત રહ્યા. તેમાંથી એક ઓલિમ્પિક મેડલ હતો. સંપૂર્ણ ક્ષમતા હોવા છતાં, ગોપીચંદ ઓલિમ્પિક મેડલ જીતી શક્યા નહોતા, પરંતુ તેમણે કોચ તરીકે આ ખામી પૂરી કરી. ભારતે 2012 લંડન ઓલિમ્પિકમાં મહિલા સિંગલ્સ કેટેગરીમાં બ્રોન્ઝ મેડલ જીત્યો હતો. આ મેડલ તેને સાઈના નેહવાલે આપ્યો હતો.

સાઈનાની સફળતા પાછળ ગોપીચંદની મહત્વની ભૂમિકા હતી કારણ કે, તે સાઈનાના કોચ પણ હતા અને ટીમ ઈન્ડિયાના કોચ પણ હતા. ચાર વર્ષ પછી ગોપીચંદે આ દેશને ઓલિમ્પિક ગેમ્સમાં એક ડગલું આગળ લઈ લીધું. પીવી સિંધુએ રિયો ઓલિમ્પિક-2016માં સિલ્વર મેડલ જીત્યો હતો.

સિંધુ ગોપીચંદની એકેડમીમાં ટ્રેનિંગ પણ લઈ રહી હતી અને તે સમયે ગોપીચંદ ટીમના હેડ કોચ પણ હતા. ત્યારબાદ સિંધુએ ટોક્યો ઓલિમ્પિકમાં પણ બ્રોન્ઝ મેડલ જીત્યો હતો. તેમણે 2001માં ખેલ રત્ન જીત્યો હતો અને 2009માં ભારત સરકારે તેમને દ્રોણાચાર્ય પુરસ્કારથી સન્માનિત કર્યા હતા.

ક્રિકેટર બનવા માંગતો હતા

ગોપીચંદને ભારતના અન્ય બાળકોની જેમ ક્રિકેટ વધુ પસંદ હતી. તે બાળપણમાં ક્રિકેટ વધુ રમતા હતા. પરંતુ 11 વર્ષની ઉંમર સુધીમાં તે બેડમિન્ટનમાં ખ્યાતિ હાંસલ કરી રહ્યો હતો અને તેથી જ તેના મોટા ભાઈએ તેને આ રમતમાં આગળ લઈ લીધો. અહીંથી ગોપીચંદે ક્યારેય પાછું વળીને જોયું નથી. પરિણામ એ આવ્યું કે, ગોપીચંદના રૂપમાં આ દેશને એક એવો ખેલાડી મળ્યો જેણે પોતાની રમતથી દેશને નવી ઉંચાઈઓ પર લઈ ગયો અને જ્યારે તેઓ નિવૃત્ત થયા ત્યારે તેમણે કોચ તરીકે દેશને ઐતિહાસિક સિદ્ધિઓ આપી.

નિવૃત્તિ લીધા પછી ગોપીચંદે કોચ બનવાનું નક્કી કર્યું. આ માટે તેણે હૈદરાબાદમાં એકેડમી ખોલવાનું વિચાર્યું. તેણે એક ઈન્ટરવ્યુમાં જણાવ્યું કે, સરકારે આ કામમાં તેની મદદ કરી અને જમીન આપી પરંતુ તેને એકેડમી બનાવવા માટે સંઘર્ષ કરવો પડ્યો. આ માટે તેણે પોતાનું ઘર ગીરવે રાખ્યું હતું. આજે, ગોપીચંદની એકેડમીમાં ઘણા દિગ્ગજ ખેલાડીઓ રમે છે અને તે વિશ્વસ્તરીય સુવિધાઓ સાથેની એકેડમી હોવાનું કહેવાય છે.

આ પણ વાંચો : હવે બળાત્કારીઓની ખેર નથી : સુરતમાં એક મહિનામાં પાંચ કેસોમાં બળાત્કારીઓને કડક સજા ફટકારાઇ