પૃથ્વીનો જબરદસ્ત શો ! ધોની અને વિરાટ કોહલીના વર્ષો જુના રેકોર્ડને પણ ધ્વસ્ત કરી દીધા

વિજય હજારે ટ્રોફી (Vijay Hazare Trophy) માં મુંબઇના કેપ્ટન પૃથ્વી શો (Prithvi Shaw) એ બેટને ખૂબ મનમુકીને વરસાવી દીધુ. 9 માર્ચે રમાયેલી ચોથી ક્વાર્ટર ફાઇનલ મેચમાં તેણે નોટઆઉટ 185 રનની ઇનીંગ રમીને મુંબઇને આસાન જીત અપાવી હતી. વિજય હજારે ટ્રોફી 2021 ની સિઝનમાં પૃથ્વી શોનુ આ ત્રીજુ શતક છે. સૌરાષ્ટ્ર (Saurashtra) એ પ્રથમ બેટીંગ કરતા 50 ઓવરમાં પાંચ વિકેટ ગુમાવીને 281 રન બનાવ્યા હતા. જવાબમાં મુંબઇએ તે સ્કોરને 41.5 ઓવરમા જ 1 વિકેટ ગુમાવીને હાંસલ કરી લીધો હતો. આમ મુંબઇની ટીમે જીત મેળવીને વિજય હજારે ટ્રોફીની સેમીફાઇનલમાં સ્થાન બનાવી લીધુ હતુ. શોએ ધુંઆધાર અણનમ 185 રન ની ઇનીંગ રમી હતી. સાથે જ મહેન્દ્રસિંહ ધોની (MS Dhoni) અને વિરાટ કોહલી (Virat Kohli) નો વર્ષો જુનો રેકોર્ડ પણ તોડી નાંખ્યો હતો.

લિસ્ટ એ ક્રિકેટ માં લક્ષ્યનો પિછો કરતો સૌથી વધુ રન બનાવવા વાળો ભારતીય ક્રિકેટર હવે પૃથ્વી શો નોંધાઇ ચુક્યો છે. જે રેકોર્ડ તેના પહેલા મહેન્દ્રસિંહ ધોનીના નામે નોંધાયેલો હતો. 2005માં શ્રીલંકાની સામે લક્ષ્યનો પિછો કરતા ધોનીએ અણનમ 183 રનની ઇનીંગ રમી હતી, વળી 2012માં પાકિસ્તાન સામે પણ વિરાટ કોહલીએ લક્ષ્યનો પિછો કરતા 183 રન કર્યા હતા. શો એ હવે આ બંનેને આ મામલામાં પાછળ મુકી દીધા છે.

પૃથ્વીએ 123 બોલમાં જ 21 ચોગ્ગા અને 7 છગ્ગા ની મદદ થી 185 રનની ઇનીંગ રમી હતી. મુંબઇને પ્રથમ ઝટકો યશસ્વી જયસ્વાલના રુપમાં લાગ્યો હતો. તે જોકે 75 રન બનાવીને પેવેલિયન પરત ફર્યો હતો. શો અને જયસ્વાલ વચ્ચે પ્રથમ વિકેટ માટે 238 રનની ભાગીદારી થઇ હતી. આદિત્ય તારે 20 રન બનાવીને અણનમ પરત ફર્યો હતો. સૌરાષ્ટ્ર તરફ થી સમર્થ વ્યાસ એ સૌથી વધુ 90 રનનુ યોગદાન આપ્યુ હતુ.