Wimbledon 2022: યુકી ભાંબરી અને રામકુમાર રામનાથન ક્વોલિફાયના પ્રથમ રાઉન્ડમાં હાર્યાં

દેશના નંબર વન ટેનિસ ખેલાડી રામકુમાર રામનાથન (Ramkumar Ramanathan) અને યુકી ભામ્બરી (Yuki Bhambri) વર્ષના ત્રીજા ગ્રાન્ડ સ્લેમ વિમ્બલ્ડન 2022 (Wimbledon 2022) ના ક્વોલિફાઈંગ રાઉન્ડના પ્રથમ રાઉન્ડમાં હારી જતાં વિમ્બલ્ડન ઓપન 2022 ની રેસમાંથી બહાર નીકળી ગયા છે. યુકી ભાંબરીને સ્પેનના બર્નાબે જપ્તા મિરાલ્સે હરાવ્યો હતો. જ્યારે રામનાથનને ચેક રિપબ્લિકના વિટ કોપરિવાએ હરાવ્યો હતો. યુકીને સ્પેનિશ ખેલાડીએ 7-5, 6-1થી હરાવ્યો હતો. જ્યારે રામનાથનને કોપરિવાએ 7-5, 6-4થી હરાવ્યો હતો.

મહત્વનું છે કે યુકી ભાંબરીએ સારી શરૂઆત કરી હતી. તેણે શરૂઆતમાં 5-3 ની સરસાઈ મેળવી હતી. પરંતુ મિરાલેસે ટૂંક સમયમાં જ મેચમાં વાપસી કરી લીધી હતી. સ્પેનિશ ખેલાડીએ ફરીથી ભારતીય ખેલાડીને તક આપી ન હતી અને શાનદાર જીત નોંધાવી હતી. 29 વર્ષીય યુકી ભાંબરીને ઈજાથી સુરક્ષિત રેન્કિંગ દ્વારા ક્વોલિફાઈમાં રમવાની તક મળી હતી. જો કે તેને મુશ્કેલ ડ્રો મળ્યો હતો. મિરાલ્સે તાજેતરમાં ઘણી સારી જીત નોંધાવી છે.

મિરાલેસ ફ્રેન્ચ ઓપનમાં ચોથા રાઉન્ડમાં પહોંચ્યો હતો

સ્પેનિશ ખેલાડી બર્નાબે જાપ્તા મિરાલેસે ગયા મહિને ક્વોલિફાઈંગ દ્વારા વર્ષના બીજા ગ્રાન્ડ સ્લેમ ટુર્નામેન્ટ ફ્રેન્ચ ઓપન (French Open 2022) ના ચોથા રાઉન્ડમાં પ્રવેશ મેળવ્યો હતો. આ દરમિયાન તેણે અમેરિકાના ટેલર ફ્રિટ્ઝ અને જોન ઈસ્નર જેવા ખેલાડીઓને હરાવ્યા હતા. જો કે ત્યાર બાદ તેને એલેક્ઝાન્ડર ઝવેરેવ સામે હારનો સામનો કરવો પડ્યો હતો. વિશ્વ ક્રમાંકિત 90મી ખેલાડી મિરાલેસ હવે ફ્રાન્સના એન્ટોઈન હોંગ સામે ટકરાશે.

કોપારિવા હવે સેબેસ્ટિયન ઓફનર સામે ટકરાશે

19મી ક્રમાંકિત કોપરિવાએ રામનાથનને માત આપી હતી. કોપરિવા ગયા વર્ષે સૌપ્રથમ ચર્ચામાં આવ્યો હતો. જ્યારે તેણે ડેનિસ શાપાવાલોવ જેવા ખેલાડીને ક્લેકોર્ટ પર સેમિ ફાઇનલ મેચમાં હરાવ્યો હતો. પ્રથમ સેટ ગુમાવ્યા બાદ રામનાથનને બીજા સેટમાં પ્રારંભિક લીડ હોવા છતાં હારનો સામનો કરવો પડ્યો હતો. કોપારિવા આગામી રાઉન્ડમાં ઓસ્ટ્રિયાના સેબેસ્ટિયન ઓફનર સામે ટકરાશે.