FIFA World Cup 2026 : રાઉન્ડ ઓફ 16 ની 8 મેચોનું શેડ્યૂલ જાહેર, જાણો કઈ ટીમ ક્યારે, ક્યાં અને કોની સામે ટકરાશે

FIFA વર્લ્ડ કપ 2026માં હવે રોમાંચ ચરમસીમાએ પહોંચી ગયો છે. રાઉન્ડ ઓફ 32ના તમામ મુકાબલા પૂર્ણ થયા બાદ હવે રાઉન્ડ ઓફ 16નું ચિત્ર સ્પષ્ટ થઈ ગયું છે. ટુર્નામેન્ટની શરૂઆત 48 ટીમોથી થઈ હતી, પરંતુ હવે માત્ર 16 ટીમો જ ખિતાબની દોડમાં બાકી રહી છે. આ તબક્કામાં હારનો અર્થ સીધો ટુર્નામેન્ટમાંથી બહાર થવો હોવાથી દરેક મેચ ‘કરો અથવા મરો’ જેવી બનવાની છે.

રાઉન્ડ ઓફ 16 ની ટીમો થઈ નક્કી

રાઉન્ડ ઓફ 16 માં કેનેડા, મોરોક્કો, પેરાગ્વે, ફ્રાન્સ, બ્રાઝિલ, નોર્વે, મેક્સિકો, ઇંગ્લેન્ડ, યુનાઇટેડ સ્ટેટ્સ, સ્પેન, પોર્ટુગલ, બેલ્જિયમ, સ્વિટ્ઝર્લૅન્ડ, ઇજિપ્ત, કોલંબિયા અને આર્જેન્ટિનાએ પોતાનું સ્થાન નિશ્ચિત કર્યું છે. હવે આ 16 ટીમોમાંથી માત્ર આઠ ટીમો જ ક્વાર્ટર ફાઇનલમાં પ્રવેશ કરશે, જ્યારે બાકીની આઠ ટીમોનું વર્લ્ડ કપ અભિયાન સમાપ્ત થઈ જશે.

પ્રી-ક્વાર્ટર ફાઈનલમાં 16 ટીમોની ટક્કર

રાઉન્ડ ઓફ 16 ની પ્રથમ મેચ 4 જુલાઈએ કેનેડા અને મોરોક્કો વચ્ચે હ્યુસ્ટનમાં રમાશે. ત્યારબાદ 5 જુલાઈએ પેરાગ્વે સામે ફ્રાન્સ ટકરાશે. 6 જુલાઈએ બ્રાઝિલ સામે નોર્વે અને મેક્સિકો સામે ઈંગ્લેન્ડનો રસપ્રદ મુકાબલો યોજાશે. 7 જુલાઈએ પોર્ટુગલ સામે સ્પેન, યુનાઈટેડ સ્ટેટ્સ સામે બેલ્જિયમ અને આર્જેન્ટિના સામે ઈજિપ્ત વચ્ચે જંગ થશે, જ્યારે 8 જુલાઈએ સ્વિટ્ઝર્લૅન્ડ અને કોલંબિયા વચ્ચે છેલ્લી પ્રી-ક્વાર્ટર ફાઈનલ રમાશે.

રોનાલ્ડો-મેસ્સીની ટીમ કોની સામે ટકરાશે?

આ રાઉન્ડમાં તમામ મેચો પર સમગ્ર વિશ્વની નજર રહેશે. ખાસ કરીને ક્રિસ્ટિયાનો રોનાલ્ડોની પોર્ટુગલ અને સ્પેન વચ્ચેનો મુકાબલો યુરોપિયન ફૂટબોલના બે દિગ્ગજોની ટક્કર હોવાથી સૌથી રોમાંચક માનવામાં આવી રહ્યો છે. બીજી તરફ લિયોનેલ મેસ્સીની આર્જેન્ટિના સામે મોહમ્મદ સલાહની ઈજિપ્તનો મુકાબલો પણ ચાહકો માટે વિશેષ આકર્ષણનું કેન્દ્ર રહેશે.

વિનિસિયસ vs હાલેન્ડની ટક્કર

આ ઉપરાંત બ્રાઝિલ અને નોર્વે વચ્ચેની મેચ પણ હાઈ-વોલ્ટેજ મુકાબલો છે. વિનિસિયસ જુનિયર અને એર્લિંગ હાલેન્ડ જેવા સ્ટાર ખેલાડીઓ આમને-સામને હોવાથી આ મેચ પર પણ સૌની નજર રહેશે. હવે જોવાનું એ રહેશે કે કઈ આઠ ટીમો જીત મેળવી ક્વાર્ટર ફાઈનલમાં સ્થાન બનાવે છે અને કઈ ટીમોનું વર્લ્ડ કપ જીતવાનું સ્વપ્ન અહીં જ અધૂરું રહી જાય છે.

ગુજરાત ટાઈટન્સના રન મશીનની શ્રીલંકામાં બેક ટુ બેક સદી, છેલ્લી 11 માંથી 9 મેચમાં 50+ સ્કોર