Trending Video : સિરીઝની પહેલી જ ઓવરમાં બુમરાહનો કહેર! કેપ્ટન ટોમ લાથમ કંઈ સમજે તે પહેલાં જ ઉડી ગઈ સ્ટમ્પ્સ; અમ્પાયર અને ન્યૂઝીલેન્ડના ખેલાડીઓ પણ રહી ગયા દંગ
ન્યૂઝીલેન્ડ સામેની પ્રથમ ટેસ્ટ મેચમાં ભારતીય બોલરોએ શાનદાર શરૂઆત કરી છે. ભારતીય કેપ્ટન શુભમન ગિલે ટોસ જીતીને પહેલાં બોલિંગ કરવાનો નિર્ણય લીધો હતો. ફાસ્ટ બોલરોએ પોતાના શાનદાર પ્રદર્શનથી આ નિર્ણયને સાચો સાબિત કર્યો હતો. પ્રથમ સેશનમાં જ ભારતે ન્યૂઝીલેન્ડના ચાર બેટ્સમેનોને પેવેલિયન ભેગા કર્યા છે. પ્રથમ દિવસની લંચ બ્રેક સુધી ન્યૂઝીલેન્ડે 23 ઓવરમાં 4 વિકેટ ગુમાવીને 60 રન બનાવ્યા હતા.

વેલિંગ્ટનના બેસિન રિઝર્વ મેદાન પર આજે ગુરુવાર (19 નવેમ્બર)થી ભારત અને ન્યૂઝીલેન્ડ વચ્ચે પ્રથમ ટેસ્ટ મેચની શરૂઆત થઈ છે. આ મેચમાં સ્ટાર ફાસ્ટ બોલર જસપ્રીત બુમરાહે યજમાન ટીમને પહેલી જ ઓવરમાં મોટો ઝટકો આપ્યો છે. બુમરાહે ઇનિંગ્સના ત્રીજા જ બોલ પર ન્યૂઝીલેન્ડના કેપ્ટન ટોમ લાથમને શૂન્ય રને આઉટ કર્યો હતો. શુભમન ગિલે પહેલાં બોલિંગ કરવાનો લીધેલો નિર્ણય બુમરાહે પોતાની ઘાતક બોલિંગથી તરત જ સાચો સાબિત કર્યો હતો.
જસપ્રીત બુમરાહે ટોમ લાથમને કેવી રીતે કર્યો OUT?
ટોમ લાથમને આઉટ કરવા માટે બુમરાહે શાનદાર બોલ ફેંક્યો હતો. બુમરાહે એકદમ સચોટ લાઇન અને લેન્થ પર બોલ નાખ્યો હતો. આ બોલ ઝડપથી અંદરની તરફ સ્વિંગ થયો હતો. લાથમે બોલને રમવાને બદલે છોડી દેવાનો નિર્ણય કર્યો હતો. પરંતુ બોલ સીધો ઓફ સ્ટમ્પ સાથે અથડાયો હતો. આ રીતે ન્યૂઝીલેન્ડનો કેપ્ટન પોતાનું ખાતું પણ ખોલી શક્યો નહોતો અને પેવેલિયન પરત ફર્યો હતો. મેચની પહેલી જ ઓવરમાં કેપ્ટનની વિકેટ પડતાં ન્યૂઝીલેન્ડની ટીમ પર શરૂઆતથી જ દબાણ આવી ગયું હતું.
Some introductions are best made with a BOOM.
Tom Latham gets a taste of Jasprit Bumrah’s brilliance in the very first over!
Watch the HERO VIDA India Tour of New Zealand, 1st Test, LIVE NOW on Sony Sports Network TV channels & Sony LIV.
#SonySportsNetwork #SonyLIV #NZVIND
— Sony Sports Network (@SonySportsNetwk) November 18, 2026
ટોમ લાથમના નામે નોંધાયો અનિચ્છનીય રેકોર્ડ
પ્રથમ જ ઓવરમાં શૂન્ય રને આઉટ થતાં ટોમ લાથમના નામે એક અનિચ્છનીય રેકોર્ડ પણ નોંધાયો છે. ટેસ્ટ ક્રિકેટમાં ઓપનર તરીકે સૌથી વધુ વખત શૂન્ય રને આઉટ થવાના મામલે તેણે ભારતના પૂર્વ વિસ્ફોટક બેટ્સમેન વીરેન્દ્ર સેહવાગની બરાબરી કરી છે. આ બંને ખેલાડીઓ આ યાદીમાં ચોથા સ્થાને છે. આ યાદીમાં વેસ્ટ ઇન્ડિઝનો ક્રેગ બ્રેથવેટ 19 વખત શૂન્ય રને આઉટ થઈને પ્રથમ સ્થાને છે. જ્યારે ઇંગ્લેન્ડના પૂર્વ કેપ્ટન માઇક આથર્ટન 17 વખત અને શ્રીલંકાના માર્વન અટાપટ્ટુ 16 વખત શૂન્ય રને આઉટ થયા છે.
બેસિન રિઝર્વ મેદાન પર ભારતને જીતની રાહ
વેલિંગ્ટનના બેસિન રિઝર્વ મેદાન પર ભારતનો ઇતિહાસ પણ ખાસ રહ્યો છે. ભારતીય ટીમ આ મેદાન પર છેલ્લી વખત ટેસ્ટ મેચમાં ફેબ્રુઆરી 1968 માં જીતી હતી. એટલે કે અનેક દાયકાઓ પછી આ મેદાન પર જીત મેળવવાનો પડકાર ભારતીય ટીમ સામે છે. આ ઉપરાંત, 2009 પછી ભારતીય ટીમ ન્યૂઝીલેન્ડની ધરતી પર ટેસ્ટ મેચ જીતી શકી નથી. આવી સ્થિતિમાં આ સિરીઝમાં ભારતીય ટીમ આ જૂનો ઇતિહાસ બદલી શકશે કે નહીં, તેના પર ક્રિકેટ ચાહકોની નજર રહેશે.
