T20 World Cup 2024 : સુપર-8માં ટીમ ઈન્ડિયા આ ટીમો સામે ટકરાશે, જાણો ત્રણેય ટીમો સામે કેવો છે રેકોર્ડ?

T20 વર્લ્ડ કપ 2024માં ટીમ ઈન્ડિયાની સુપર-8 મેચોની લાઈન-અપ તૈયાર થઈ ગઈ છે. મતલબ કે ICC ટૂર્નામેન્ટના આ તબક્કામાં ટીમ ઈન્ડિયા ક્યારે અને કઈ ટીમનો સામનો કરશે તેનું શેડ્યૂલ તૈયાર છે. સુપર-8માં ટીમ ઈન્ડિયા જે ટીમોનો સામનો કરવા જઈ રહી છે તે ક્રિકેટના સૌથી ટૂંકા ફોર્મેટમાં કોઈથી ઓછી નથી. આનો અર્થ એ થયો કે સુપર-8નો પડકાર ભારતીય ટીમ માટે ગ્રુપ સ્ટેજના પડકાર કરતાં વધુ હશે.

ત્રણેય વિરોધી ટીમનો ભારત સામે રેકોર્ડ

ટીમ ઈન્ડિયાએ 20 જૂને T20 વર્લ્ડ કપ 2024ના સુપર-8 સ્ટેજમાં તેની પ્રથમ મેચ રમવાની છે. આ મેચ અફઘાનિસ્તાન સામે થશે. આ પછી ટીમ ઈન્ડિયા સુપર-8માં બીજી મેચ 22 જૂને રમશે. આ મેચ બાંગ્લાદેશ સાથે થશે. ભારતીય ટીમે 24 જૂને ઓસ્ટ્રેલિયા સામે ત્રીજી અને છેલ્લી સુપર-8 મેચ રમવાની છે. હવે આ ત્રણેય વિરોધીઓ ટીમ ઈન્ડિયા માટે કેટલી મોટી સમસ્યા બની શકે છે તેનો અંદાજ તેમની સામે રમાયેલી અગાઉની મેચોના રેકોર્ડ પરથી લગાવી શકાય છે.

અફઘાનિસ્તાન સામે ભારતનો રેકોર્ડ

સુપર-8 મેચના બહાને ભારત અને અફઘાનિસ્તાન નવમી વખત T20 ક્રિકેટમાં સામ-સામે ટકરાશે. આ પહેલા રમાયેલી 8 મેચમાંથી 6માં ભારતે જીત મેળવી છે. 1 મેચ ટાઈ રહી છે જ્યારે 1 મેચ અનિર્ણિત રહી છે. મતલબ કે અફઘાનિસ્તાનની ટીમ હજુ સુધી ભારત સામે એકપણ T20 મેચ જીતવામાં સફળ રહી નથી.

બાંગ્લાદેશ સામે ટીમ ઈન્ડિયાનો રેકોર્ડ

ભારતની બીજી મેચ બાંગ્લાદેશ સામે છે. T20 ક્રિકેટમાં બંને ટીમોની આ 14મી મુલાકાત હશે. આ પહેલા રમાયેલી 13 મેચોમાં ભારતે 12 વખત જીત મેળવી છે. જ્યારે 1 મેચ બાંગ્લાદેશના નામે રહી છે. એટલે કે ભારત બાંગ્લાદેશ મુકાબલામાં ટીમ ઈન્ડિયા 12-1થી આગળ છે.

ઓસ્ટ્રેલિયા સામે ભારતનો રેકોર્ડ

હવે વાત કરીએ સુપર-8માં ભારતની ત્રીજી મેચની, જ્યાં ટીમ ઈન્ડિયાનો સામનો ઓસ્ટ્રેલિયા સાથે થશે. T20 ક્રિકેટમાં બંને ટીમનો આ 32મો મુલાબલો હશે. આ પહેલા રમાયેલી 31 મેચોમાંથી ભારતે 19 જીતી છે જ્યારે ઓસ્ટ્રેલિયાએ 11 મેચ જીતી છે. જ્યારે બંને ટીમો વચ્ચે 1 મેચ અનિર્ણિત રહી છે.

આ પણ વાંચો : T20 વર્લ્ડ કપમાંથી બહાર થયા બાદ શાહીન આફ્રિદી થયો ભાવુક, ચાહકો પાસેથી માંગ્યું સમર્થન