T20 WC Breaking : ICC ટુર્નામેન્ટની ફાઈનલમાં ભારત-ન્યુઝીલેન્ડની કેટલી વાર થઈ ટક્કર? જાણો કેવો છે રેકોર્ડ
T20 વર્લ્ડ કપ 2026ની ફાઇનલમાં ભારત અને ન્યુઝીલેન્ડ વચ્ચે 8 માર્ચે અમદાવાદના નરેન્દ્ર મોદી સ્ટેડિયમમાં ટાઇટલ માટે જંગ જોવા મળશે. બંને ટીમો પ્રથમ વખત T20 વર્લ્ડ કપની ફાઇનલમાં આમને-સામને આવી રહી છે, પરંતુ ICC ટુર્નામેન્ટની અન્ય ફાઇનલમાં તેઓ પહેલાથી ત્રણ વખત ટકરાઈ ચૂક્યા છે. આ મુકાબલાઓમાં કઈ ટીમનું પલડું ભારે રહ્યું છે તે જાણવું રસપ્રદ છે.
ભારતે 5 માર્ચે રમાયેલી સેમિફાઇનલ મેચમાં ઇંગ્લેન્ડને 7 રનથી હરાવીને T20 વર્લ્ડ કપ 2026ની ફાઇનલમાં પોતાનું સ્થાન પાકું કર્યું હતું. બીજી તરફ ન્યુઝીલેન્ડે દક્ષિણ આફ્રિકાને 9 વિકેટથી હરાવીને ફાઇનલમાં એન્ટ્રી મેળવી હતી. હવે 8 માર્ચે અમદાવાદના નરેન્દ્ર મોદી સ્ટેડિયમમાં બંને ટીમો વચ્ચે ખિતાબ માટે ટક્કર જોવા મળશે.
ત્રણ વખત ICC ટુર્નામેન્ટની ફાઇનલમાં ટક્કર
જો ICC ટુર્નામેન્ટની ફાઇનલના ઇતિહાસ પર નજર કરીએ તો ભારત અને ન્યુઝીલેન્ડ ત્રણ વખત આમને-સામને આવી ચૂક્યા છે. આ મુકાબલાઓમાં ન્યુઝીલેન્ડે બે વખત જીત મેળવી છે, જ્યારે ભારતે એક વખત જીતનો સ્વાદ ચાખ્યો છે. એટલે આ રેકોર્ડ પણ ફાઇનલ પહેલા ચર્ચાનો વિષય બન્યો છે.
ન્યુઝીલેન્ડ સામે ભારત બે વાર હાર્યું
બંને ટીમો વચ્ચે પ્રથમ ICC ફાઇનલ વર્ષ 2000ની ચેમ્પિયન્સ ટ્રોફીમાં રમાઈ હતી. આ મેચમાં ભારતે પહેલા બેટિંગ કરીને 265 રન બનાવ્યા હતા. જોકે ન્યુઝીલેન્ડે મજબૂત બેટિંગ સાથે 49.4 ઓવરમાં લક્ષ્યાંક હાંસલ કરીને ચાર વિકેટથી જીત મેળવી હતી અને ખિતાબ પોતાના નામે કર્યો હતો.
WTC ફાઈનલમાં ન્યુઝીલેન્ડે ભારતને હરાવ્યું
ત્યારબાદ વર્ષ 2021માં વર્લ્ડ ટેસ્ટ ચેમ્પિયનશિપની પ્રથમ ફાઇનલમાં ફરી ભારત અને ન્યુઝીલેન્ડ વચ્ચે ટક્કર જોવા મળી હતી. આ મેચમાં પણ ન્યુઝીલેન્ડે જ જીત મેળવી હતી. તેણે ભારતને 8 વિકેટથી હરાવીને ટેસ્ટ ક્રિકેટના પ્રથમ વિશ્વ ચેમ્પિયન બનવાનો ગૌરવ મેળવ્યો હતો.
2025ની ચેમ્પિયન્સ ટ્રોફીમાં ભારતની જીત
વર્ષ 2025ની ચેમ્પિયન્સ ટ્રોફીની ફાઇનલમાં ફરી એક વખત બંને ટીમો વચ્ચે ખિતાબ માટે જંગ જોવા મળ્યો હતો. દુબઈમાં રમાયેલી આ મેચમાં ન્યુઝીલેન્ડે પહેલા બેટિંગ કરીને ભારત સામે 252 રનનો લક્ષ્યાંક મૂક્યો હતો. જવાબમાં ભારતે સારૂ પ્રદર્શન કરીને 49 ઓવરમાં ચાર વિકેટ ગુમાવીને જીત મેળવી અને ખિતાબ પોતાના નામે કર્યો હતો.
ICC ટુર્નામેન્ટની ફાઇનલમાં ન્યુઝીલેન્ડ આગળ
આ રીતે જોવામાં આવે તો ICC ટુર્નામેન્ટની ફાઇનલમાં ભારત અને ન્યુઝીલેન્ડ વચ્ચે ત્રણ મુકાબલા થયા છે, જેમાં ન્યુઝીલેન્ડે બે અને ભારતે એક જીત મેળવી છે. હવે T20 વર્લ્ડ કપ 2026ની ફાઇનલમાં બંને ટીમો ફરી આમને-સામને આવશે ત્યારે આ રેકોર્ડ બદલાય છે કે નહીં તે જોવું ક્રિકેટ ચાહકો માટે ખૂબ રસપ્રદ રહેશે.
