PBKS vs MI : સૂર્યકુમાર યાદવે તોડ્યો રેકોર્ડ, સૌથી વધુ રન બનાવવા મામલે સચિન તેંડુલકરને પાછળ છોડી દીધો
પંજાબ કિંગ્સ સામેની મેચમાં, સૂર્યકુમાર યાદવે સિઝનની શરૂઆતથી જે રીતે રન બનાવ્યા હતા તે જ રીતે રન બનાવવાનું ચાલુ રાખ્યું. આ દરમિયાન, સૂર્યાએ આ સિઝનમાં 600 રનનો આંકડો પણ પાર કર્યો. સાથે જ તેણે એક મોટો રેકોર્ડ પણ બનાવ્યો અને સચિન તેંડુલકરને પણ પાછળ છોડી દીધો.
IPL 2025માં ખરાબ શરૂઆત બાદ મજબૂત વાપસી કરનાર અને પ્લેઓફમાં સ્થાન મેળવનાર મુંબઈને આ સ્તરે પહોંચાડવામાં સૂર્યકુમાર યાદવની મજબૂત બેટિંગે મુખ્ય ભૂમિકા ભજવી હતી. લીગની છેલ્લી મેચમાં પણ સારું પ્રદર્શન કરી સૂર્યકુમાર યાદવે વિશ્વ રેકોર્ડ બનાવ્યો. સૂર્યકુમાર યાદવે T20 ક્રિકેટમાં સતત સૌથી વધુ વખત એક ઈનિંગમાં 25 કે તેથી વધુ રન બનાવવાનો રેકોર્ડ નોંધાવ્યો છે. એટલું જ નહીં, તેણે સચિન તેંડુલકરનો રેકોર્ડ પણ તોડી નાખ્યો.
સૂર્યકુમાર યાદવે શાનદાર અડધી સદી ફટકારી
IPLની 69મી મેચમાં મુંબઈ અને પંજાબ કિંગ્સ આમને-સામને હતા. આ બંને ટીમો માટે આ સિઝનના લીગ તબક્કાની છેલ્લી મેચ હતી. ઉપરાંત, પ્લેઓફમાં પ્રથમ કે બીજું સ્થાન મેળવવાની દ્રષ્ટિએ તે એક મોટી સ્પર્ધા હતી. આવી સ્થિતિમાં, મુંબઈને તેના સૌથી મહત્વપૂર્ણ બેટ્સમેન પાસેથી શાનદાર પ્રદર્શનની અપેક્ષા હતી અને સૂર્યકુમાર યાદવે પણ ટીમને નિરાશ કરી ન હતી. છેલ્લી મેચમાં શાનદાર અડધી સદી ફટકારીને ટીમને પ્લેઓફમાં લઈ જનાર સૂર્યાએ આ વખતે પણ જોરદાર ઈનિંગ રમી અને ટીમને મજબૂત સ્કોર સુધી પહોંચાડવામાં મહત્વપૂર્ણ ભૂમિકા ભજવી.
સૂર્યાએ બનાવ્યો નવો વર્લ્ડ રેકોર્ડ
છઠ્ઠી ઓવરમાં પહેલી વિકેટ પડ્યા બાદ મુંબઈનો વાઈસ્ કેપ્ટન સૂર્યા ક્રીઝ પર આવ્યો અને આવતાની સાથે જ બાઉન્ડ્રી ફટકારીને રન બનાવવા લાગ્યો. આ દરમિયાન, સૂર્યાએ નવમી ઓવરના છેલ્લા બોલ પર ચોગ્ગો ફટકાર્યો, જેના કારણે તેનો સ્કોર 22 રનથી 26 રન થઈ ગયો. સૂર્યાએ આ એક ચોગ્ગો મારીને ઈતિહાસ રચ્યો.
Consistency ka dusra naam Surya Dada #MumbaiIndians #PlayLikeMumbai #TATAIPL #PBKSvMI pic.twitter.com/Inmr3XRAH1
— Mumbai Indians (@mipaltan) May 26, 2025
લીગ સ્ટેજની દરેક મેચમાં 25 થી વધુ રન
ભારતીય T20 ટીમના કેપ્ટન સૂર્યકુમાર યાદવે સતત 14મી ઈનિંગમાં 25 રનનો આંકડો પાર કર્યો. આ સાથે, તેણે દક્ષિણ આફ્રિકાના ભૂતપૂર્વ T20 કેપ્ટન ટેમ્બા બાવુમાને પાછળ છોડીને એક નવો વિશ્વ રેકોર્ડ બનાવ્યો. એટલું જ નહીં, IPLના ઈતિહાસમાં પહેલીવાર કોઈ બેટ્સમેને લીગ સ્ટેજની દરેક મેચમાં 25 થી વધુ રન બનાવ્યા.
કારકિર્દીનું શ્રેષ્ઠ પ્રદર્શન
એટલું જ નહીં, સૂર્યકુમાર યાદવે આ ચાર સાથે 605 રનનો આંકડો પણ પાર કર્યો અને IPL ઈતિહાસમાં પોતાના સૌથી વધુ રન બનાવ્યા. આ પહેલા, સૂર્યાએ IPL 2023માં 605 રન બનાવ્યા હતા, જે તેના કારકિર્દીનું શ્રેષ્ઠ પ્રદર્શન હતું.
સચિનને પાછળ છોડ્યો
ખાસ વાત એ છે કે તેણે મુંબઈના ભૂતપૂર્વ કેપ્ટન અને મહાન બેટ્સમેન સચિન તેંડુલકરનો રેકોર્ડ પણ તોડ્યો. સચિને 2010ની સિઝનમાં 618 રન બનાવ્યા હતા, જે IPLની છેલ્લી 17 સિઝનમાં મુંબઈના કોઈપણ બેટ્સમેન દ્વારા બનાવેલા સૌથી વધુ રન હતા. સૂર્યાએ સચિનને પાછળ છોડી દીધો અને 650 રન પૂરા કર્યા.
આ પણ વાંચો: IPL 2025માં SRHના ખરાબ પ્રદર્શન બાદ કાવ્યા મારન આ સ્ટાર ખેલાડીઓને કરશે ટીમની બહાર !
Published On - 10:13 pm, Mon, 26 May 25
