Breaking News: શમીની રફ્તાર સામે આખી ટીમ નતમસ્ત! ઝહીર ખાનનો રેકોર્ડ તોડ્યો અને હૈદરાબાદને ઘૂંટણિયે પાડ્યું
હૈદરાબાદમાં રમાયેલી આઈપીએલની મેચમાં શમીએ પોતાની શાનદાર બોલિંગથી સૌનું દિલ જીતી લીધું. પાવરપ્લેમાં અત્યંત ચોકસાઈથી બોલિંગ કરીને તેણે વિરોધી ટીમના બે મુખ્ય બેટ્સમેનોને જલ્દી પેવેલિયન ભેગા કરી દીધા. આ પ્રદર્શનની સાથે જ તેણે દિગ્ગજ બોલર ઝહીર ખાનનો એક ખાસ રેકોર્ડ પણ તોડી નાખ્યો છે.
ઇન્ડિયન પ્રીમિયર લીગ (IPL)ની 19મી સીઝનનો 10મો મુકાબલો સનરાઇઝર્સ હૈદરાબાદ અને લખનૌ સુપર જાયન્ટ્સ વચ્ચે હૈદરાબાદના રાજીવ ગાંધી ઇન્ટરનેશનલ ક્રિકેટ સ્ટેડિયમમાં રમાઈ રહ્યો છે. આ મેચમાં લખનૌ સુપર જાયન્ટ્સના કેપ્ટન ઋષભ પંતે ટોસ જીતીને પહેલા બોલિંગ કરવાનો નિર્ણય લીધો હતો, જેને તેમના બોલરોએ સંપૂર્ણ રીતે સાચો સાબિત કર્યો.
આમાં મોહમ્મદ શમીએ અત્યંત મહત્વની ભૂમિકા ભજવી હતી. તેણે સનરાઇઝર્સ હૈદરાબાદના બે સૌથી ખતરનાક બેટ્સમેન અભિષેક શર્મા અને ટ્રેવિસ હેડને પેવેલિયનનો રસ્તો બતાવ્યો હતો. આ સાથે જ શમીએ ઝહીર ખાનને પણ પાછળ છોડી દીધો છે.
પાવરપ્લેમાં સૌથી વધુ વિકેટ લેવાના મામલે શમી સાતમા નંબરે પહોંચ્યા
મોહમ્મદ શમીએ સનરાઇઝર્સ હૈદરાબાદ સામેની મેચમાં પ્રથમ ઓવરના છેલ્લા બોલે અભિષેક શર્માના રૂપમાં પોતાની પ્રથમ વિકેટ ઝડપી હતી. ત્યારબાદ શમીએ પોતાની બીજી ઓવરના પહેલા જ બોલે ટ્રેવિસ હેડની વિકેટ લીધી હતી. આ સાથે હવે IPL ઇતિહાસમાં પાવરપ્લેમાં સૌથી વધુ વિકેટ લેવાના મામલે ‘મોહમ્મદ શમી’ ઝહીર ખાનને પાછળ છોડીને સાતમા સ્થાને પહોંચી ગયો છે. આ યાદીમાં લાંબા સમયથી ટીમ ઈન્ડિયાની બહાર રહેલા ફાસ્ટ બોલર ભુવનેશ્વર કુમાર ટોચ પર છે, જેણે IPL ઇતિહાસમાં પાવરપ્લે દરમિયાન અત્યાર સુધીમાં કુલ 79 વિકેટ ઝડપી છે.
IPLમાં પાવરપ્લેમાં સૌથી વધુ વિકેટ લેનારા બોલરો:
- ભુવનેશ્વર કુમાર – 79 વિકેટ
- ટ્રેન્ટ બોલ્ટ – 72 વિકેટ
- દીપક ચાહર – 67 વિકેટ
- સંદીપ શર્મા – 62 વિકેટ
- ઉમેશ યાદવ – 58 વિકેટ
- ઈશાંત શર્મા – 57 વિકેટ
- મોહમ્મદ શમી – 54 વિકેટ
- ઝહીર ખાન – 52 વિકેટ
શમીએ 4 ઓવરમાં આપ્યા માત્ર 9 રન
સનરાઇઝર્સ હૈદરાબાદ સામેની મેચમાં મોહમ્મદ શમીનું શાનદાર પ્રદર્શન જોવા મળ્યું હતું, જેમાં વિરોધી ટીમના આક્રમક બેટ્સમેનો પણ તેની સામે રન બનાવવા માટે સંઘર્ષ કરતા જોવા મળ્યા હતા. મોહમ્મદ શમીએ પોતાની 4 ઓવરના સ્પેલમાં માત્ર 9 રન આપીને 2 મહત્વની વિકેટ ઝડપી હતી.
